Hɛnkilimaya-Kumɛnu 30 - ALLALA KUMƐ

Ekurita Hɛnkilimaya-Kumɛ Fɔ Koe

¹ Yekala den Ekuri le ya kumɛ kɛ fɔ Itiyɛli anubɛ Yukali ye, a ko,

² “N hɛnkili mani ma iko mɔgɛnutɛ. A mani de iko sogenutɛ.

³ N ma hɛnkilimaya-ko lɔn. Hali Alla wara-koe, n ma a lɔn.

⁴ Kɔnɔ mɔgɔ yon bara yɛlɛ Arinyɛni tɔ ka sɛgi tun? Mɔgɛ yon bara ke a bole lagburula fɔnyɔ ma? Mɔgɛ yon bara ke kɔgɔ-yi-mumɛ bɛɛsi kɛla ala duruki rɔ ka ala duruki lagburu a ma? Mɔgɛ yon bara dugu-kole dan sa? Mɔgɛ kɛ anubɛ ala dan tɔgɛ ye kama? Ni min ya wonu tɔgɔ lɔn, i ni anu tɔgɔ ratɛgɛ n ye.

⁵ “Allata kumɛ bɛɛsi sɛninyani de! Fɛɛ sa anu na. A si ma tanka iko nɛgɛ-walan si kɛlɛ-kurugbɛ latanka nya min.

⁶ Mɔgɔ kana fen sa Allata kumɛ kuma. Ni min ya wo ma, a si wo makuma, ado mɔgɛnu si tɛgɛ a rɔ.”

Hɛnkilimaya-Kumɛ Donu

⁷ “E, Alla, n si i matara ko filala ko ma. Yanni n ni faga, i ni wonu kɛ n ye.

⁸ A fɔlɔtɛ, n nabɔ foninya-fɔɛ dafɛ pon! A fila nyɔgɛ, n kana ma fugarɛ la, ado n kana ma bana la fanan. Alako tun, nde ya n beli-koe sɔrɔn.

⁹ Bawo ni n mara fugarɛ la, tumado, n si kankanyɛ kɛ ka ma ile lafɛya-koe la. Ado nfan, ni n mara bana la fanan, tumado, n si a fɔ ko n mako sa ile Alla la.”

¹⁰ Mɔgɔ kana wɔli-kɛlɛ ratinya ala kun-tigi ye. I si dankalɛ sɔrɔn, ado wo kɔma, i si tɔrɔyɛ sɔrɔn.

¹¹ Mɔgɛ donu bi nyɔ, wonu bi anu fanu mɔɛnna, katarala anu nanu ma.

¹² Mɔgɛ donu fanan bi nyɔ, anu ya a lɔn ko anu nyɛrɛ sɛninyani de kɔnɔ yaga, anu kɔsɔnɛ lass!

¹³ Mɔgɛ donu fanan bi nyɔ, wonuna wasinteyɛ le gbuyɛ sanɛ anu yakɔrɛ ma.

¹⁴ Mɔgɛ donu fanan bi nyɔ, wonuna wɔli ma fenfen na fɔ ka bolo-kolɔnnu kensunya. Anu bi belenna buila anu ma iko sogo-feremɛnu.

¹⁵ Den-sunkurun fila ye nuguri bolo. Kelan tɔgɔ le, “N kɔ.” Doi wo fanan tɔgɔ le, “N kɔ.” A ye wo nya le fanan, fen nani bi nyɔ, wonu ti wasa.

¹⁶ A fɔlɔtɛ le kanbɛ la. A fila nyɔgɛ le gbandɛ la. A sawa nyɔgɛ le dugu-gbalanɛ la. Wo ti wasa yi-koe rɔ. A nani nyɔgɛ le tɛ la. Wo fanan ti wasa habadan!

¹⁷ Mɔgɛ min bi a na anubɛ a fa bɔrɔbɔla, a bɛnta, a furi-bolokanɛ ni to. Mansa-wala-kona anubɛ dogɛnu ni a furi dɔn.

¹⁸ Ko nani bi nyɔ min makawara, ado anu kɔrɛ-lɔn-koe gbɛlɛ.

¹⁹ A fɔlɔtɛ le kokɛ la. Wo si firifiri san ma nya min, n kawanɛ wo ma. A fila nyɔgɛ le duguma-fan la. Wo si tagama farɛ ma nya min, n kawanɛ wo fanan ma. A sawa nyɔgɛ le kulɔn la. Wo fanan si ta kɔgɔ-yi kuma nya min, n kawanɛ wo ma. A nani nyɔgɛ le kei anubɛ musi la. Wonu si diya nya min, n kawanɛ wo fanan ma.

²⁰ Koe do ye nyɔ fanan min makawara iko musu-yɛlan si ta yɛlɛnya-kɛ-tinɛ nya min. A ban fen-dɔn-kɛla ka a dɛ mafiran, wo kɔma, a si a fɔ ko, “Nde ya nfen tinya?”

²¹ Ko nani fanan bi nyɔ min gbɛlɛ duninya kɛ rɔ. Mɔgɛ ti ke munyuna wonu kɔrɔ.

²² A fɔlɔtɛ, ni yɔɔn mara mansɛ la, wo gbɛlɛ. A fila nyɔgɛ, ni kun-takolɔn ya a beli-koe bɛɛsi sɔrɔn, wo fanan gbɛlɛ.

²³ A sawa nyɔgɛ, musi min sɔn ma kin, ni wo tara kei-wara-sigi rɔ, wo gbɛlɛ. A nani nyɔgɛ, ni yɔɔn-musi sigira hɔrɛ kun na, wo fanan gbɛlɛ.

²⁴ Nima-fen nani bi nyɔ duninya rɔ, anu dɔgɔ kɔnɔ anu hɛnkili kolo.

²⁵ A fɔlɔtɛ le mɛnɛ-mɛnɛnɛnu na. Anu ta ma gbɛlɛ kɔnɔ anu si anu yigi sigi dɔn-fen-tɛgɛ-wati le la.

²⁶ A fila nyɔgɛ le kɔnkɔbarɛnu na. Anu dɔgɔ kɔnɔ anu barɛ le fara-woe la.

²⁷ A sawa nyɔgɛ le kondɔnnu na. Mansa sa anu kun na kɔnɔ anu damasi ye anu gbere kelen de ma.

²⁸ A nani nyɔgɛ, wo le dandanma-yirɛ la. Hali basɛ min bira ma gbo, wo le si ta mansɛ warɛ bɔn la, tamayi sa a rɔ.

²⁹ Nima-fen nani ye nyɔ min tagama-nya mafɛlɛn di.

³⁰ A fɔlɔtɛ le yarɛ la. Sɛnbɛ ye a la sogenu tɛma ado a ti kilan fenfen na.

³¹ A fila nyɔgɛ le dondɔn la, a tenbi kekela sisinu tɛma. A sawa nyɔgɛ le baa-kɔrɔn la. A nani nyɔgɛ le mansɛ la a tenbi ala kɛlɛ-dannu tɛma.

³² Ni mɔgɛ ara kuntanya-koe ladan ka a nyɛrɛ kɔrɔbi ka ko-yogomɛ rabɛn mɔgɛ do kan ma, a fisa, a ni a bole burun a dɛ la. A kana fenfen fɔ.

³³ Ni i ya bɛniki-kuran ratugu boloko-yogomɛ-kɛ, a si yɛlɛma toɛ la. Ado ni i ya mɔgɛ tɔntɔn a sunyɛ rɔ, yele si bɔ. A ye wo nya fanan, ni mɔgɛ ya yisi-magboya-koe ladan, wo si kɛlɛ-nyɔgɔnyɛ lana.