Hɛnkilimaya-Kumɛnu 23 - ALLALA KUMƐ

-6-

¹ I wa i sigi kun-tigi fɛ fen-dɔn-tinɛ, i ni a lɔn wobɛ min bi fen-dɔn kun na.

² Ni i si fen-ba dɔn, i ni i buyi-dan lakiri.

³ I kana i lagbɛ ala dɔn-fen-diyamɛnu ma. Tumado, a ye i bolo-labira-koe le tɔ kɔrɛ kɔnɔ i ma a lɔn.

-7-

⁴ Ila hɛnkili lawɔli alako i kana i nyɛrɛ tinya nɔnfulu-nyini-tinɛ.

⁵ Ni i ya wo ma, ila wodi si gban i bole tɔ iko kokɛ si gban nya min ka ta a ye pon!

-8-

⁶ I kana fen dɔn kɔrɔnditore warɛ. Ala dɔn-fen-diyamɛnu-sɔgɛ kana to i birala sogesoge!

⁷ A si i latuntun a bolo-fan ma kɔnɔ hali wo, i kɔ-sɔgɔ sa a la bawo a si to a mirila dɔn-fan wo sɔrɔn-bole ma.

⁸ Ni a taranta, i wara fen-nɛ min dɔn, i wa wo lateseri, i wara baraka-birɛ min kɛ a ye, wo damasi si ma fufafuyi la.

-9-

⁹ Hali i ma i tɔrɔ hɛnkilimaya-kumɛ fɔla kun-takolɔn ye bawo a ti sɔn a bira-koe ma fɔ ka i lafɛya.

-10-

¹⁰ I kana dan-kuri bɔ a gbɛ rɔ ka kelennɛnuna dugi do tɛgɛ a la

¹¹ bawo Mari le anu kumafunfannɛ la, ado sɛnbɛ-tigi le ale la.

-11-

¹² I tole masɔ i karan-mɔgɛ la ka i raya karan ma.

-12-

¹³ Tamayi kana i bira ila dan kolo tinɛ bawo gbesili ti a faga,

¹⁴ ado wo si a ma, a la ni kisi.

-13-

¹⁵ Nna den, ni i mara hɛnkilimɛ la, wo si a ma, n ni sewa.

¹⁶ N ba i yen hɛnkilimaya-kumɛ fɔla tuma-wo-tuma, n si n wasi i la.

-14-

¹⁷ Keliyɛ kana i bira hakɛ-tiginu wara-koe ma. Marita gbiliyɛ min bi ile rɔ, wo le ni sɛnbɛ sɔrɔn i yisi rɔ yati!

¹⁸ Ni wo mara, i wara-koe si to sabatila dɛɛ.

-15-

¹⁹ Nna den, i ni i tole masɔ bɛrɛkɛ! I ni i miri a kila-bɛrɛbɛrɛ fɛ alako i si i sigi nya min duninya kɛ rɔ.

^20-21 I kana gbɛɛ-minna-wɛnu anubɛ nugulamɛnu ma i diyana-mɔgɛ la bawo anu bara-koe si a laban bolo-kolonyɛ ma. Wo si a ma anu ni to kinɔgɔla, ado anu si to fɛrɛyɛ rɔ.

-16-

²² I tole masɔ i fa la bawo ale le ya i sɔrɔn. I kana i na bɔrɔbɔ hali a wa kɔrɔya.

²³ Tonyɛ wo, karan wo, hɛnkilimayɛ wo, hali i wa fen bɔ alako ka wonu sɔrɔn, wo kin. I kana wonu felen fenfen na.

²⁴ Mɔgɔ-latelennɛ fa si sewa le. Ni a taranta mɔgɔla dan mara le hɛnkilimɛ la, wo si a ma, a fa ni a wasi a la.

²⁵ I ni a ma, i fa anubɛ i na ni anu wasi i la. A kin, i na ni sewa ila ko la.

-17-

²⁶ Nna den, i yɛ sɔ n na. I ni i sanka n ma ka n kɛ-nya bi.

²⁷ Musi-yɛlan mani de iko denka-rayan-bɛ.

²⁸ A si i makɔni kilɛ la iko kankan. A si a ma, anu ba bila ale musi-yɛlan wo fɛ, kei-siyaman ni lanayɛ tinya anuna musinu bara la.

-18-

^29-30 Min si gbɛɛ min ka a dan-natenbi, tuma-wo-tuma a ye gbɛɛ-kura mafɛlan le la, ado mɔgɛ wo makinikininta. Tuma-wo-tuma, ale ye kɛlɛ-tɛgɛ anubɛ yasere-masɛ le la. I ya a yen tuma-wo-tuma, a magboro-gboroni de! A ya-kole si mɔ puipui!

³¹ Hali gbɛɛ wo ye a labɔla wose-wose ka kanfa, ado a min-koe ma gbɛlɛ, a kana i yɛ sɔgɔ a la ha a sɔgɛ ni i bira.

³² Kɔnɔ ni i ya wo ma, a laban, a si i ma iko duguma-fan wa mara mɔgɛ ma.

³³ Gbɛɛ si i kunyɛ rafin ha i ni fan donu yen, i ma duru minnu yenna. A si a ma, i ti ke i mirila a kin na! A si a ma, i ni to kuma nigili-nagalɛnu fɔla.

³⁴ A si i ma iko i sa tinɛ ye tinki-tankala i la iko kulɔn tenbi tinki-tankala kɔgɔ-yi kuma.

³⁵ I si to a fɔla ko, “A manɛ iko anu bara n gbesi le kɔnɔ n ma kala sɔrɔn wo ma. N ti ke n kunyɛ kɔrɔbila ni n ma n da raka gbɛɛ la.”