Hɛnkilimaya-Kumɛnu 22 - ALLALA KUMƐ

¹ Tɔgɔ-nyimɛ tenbira nɔnfuli la. Mɔgɛ wa to gbiliyɛ rɔ mɔgɛnu bolo, wo tenbira sɛnɛ anubɛ wodi-gbɛ la.

² Mari le ya mɔgɛ bɛɛsi dan, bolo-kolɔn wo, fen-tigi wo.

³ Hɛnkilimɛ si tɔrɔyɛ yen nala yarɔ, a ni a masangba. Kɔnɔ kun-takolɔn wo pɔrɔka-pɔrɔkɛ le ye tala a kun fɛ ka ta a kian layigi nanparan rɔ sokobo! Yarɔ gbɛ, a ni nimisa.

⁴ Ni i ya Mari gbiliya, i ni i nyɛrɛ famayigi a ye. Wo si a ma, i ni nɔnfuli anubɛ gbiliyɛ anubɛ simayɛ sɔrɔn.

⁵ Wɔnɛnu anubɛ gbɛrɛnu bi mɔgɔ-radunɛnuna kilɛ la. Ni mɔgɛ ko a ni a nyɛrɛ tanka wo ko-sufanu ma, fɔ a ni a masɛgi kilɛ wo la.

⁶ Mɔgɛ ni ala dan kolo ka a bila kila-nyimɛ fɛ, a bɛnnɛ a ni to min fɛ. Ni i ya wo ma, a ti kila-nyimɛ wo boloka ha a si kɔrɔya.

⁷ Bolo-kolɔn si to yɔɔnyɛ rɔ fen-tigi kɔrɔ. Mɔgɛ wa yili tɛgɛ mɔgɔ-wo-mɔgɔ ma, a ara ma wola yɔɔn la.

⁸ Ni mɔgɛ ya telenbɛliyɛ le ki, a si nanparan le tɛgɛ wo gbɛ rɔ nyɔ. Min sanɛ wo kuma, ala mɔgɔ bira-boloko-yogomɛ si ban de!

⁹ Mɔgɔ-kɔlɛ anubɛ duwɛ le bawo a ye dɔn-fan dila bolo-kolɔnnu ma.

¹⁰ Ni wo ya mɔgɔ-wasinɛ gben wo kurun tɔ, wo si kɛlɛ-nyɔgɔnyɛ anubɛ sɔsɔlɛ ban de wo tɛma.

¹¹ Mɔgɛ min kusan kumala, ado a yisi makanɛ de, wo mɔgɔ-sufa di, hali mansɛ ye.

¹² Mari ti sɔn foninya-fɔlɛla foninyɛ ma, kɔnɔ a si tonyɛ kumafunfan.

¹³ Tinya-mansɛ si to sigini bɔn la. A kɛnɛna a fɔla ko, “Yarɛ ye kilɛ la. Ni n tara, a ye n fagala le.”

¹⁴ Yɛlan-dɛ mani de iko denka-rayan-bɛ, minnu bi Marita diminyɛ kɔrɔ, wonu denu bi buila a rɔ.

¹⁵ Kun-takolonyɛ ye dennɛ le bolo ma kɔnɔ ni i ya a lasanfan bosɛ la, a si kun-takolonyɛ wo boloka.

¹⁶ Ni mɔgɛ ya ko-yogomɛ ma bolo-kolɔn la alako a ni ma nɔnfulu-tigi la, fɔ ale fanan ba ma bolo-kolɔn la, yɔ! Ni mɔgɛ tora fan dila nɔnfulu-tigi ma, ale fanan si ma bolo-kolɔn la.

Hɛnkilimaya-Kuma Bi-Sawɛ Wara-Koe

¹⁷ Wo ni wo tole masɔ. N si wo karan hɛnkilimaya kumɛ la. Wo ni wo niyi sa a kuma.

¹⁸ Ni wo tora wo mirila anu ma wo kunyɛ rɔ ka anu fɔ, wo si sewa.

¹⁹ N bi wo karanna kɛ la bi woletɔ wo si la Mari la wo yisi bɛɛ la.

²⁰ N bara kuma bi-sawa sɛbɛ wo ye. Anu bɛɛsi lafanɛ kawandili-nyimɛ anubɛ hɛnkili la.

²¹ Anu si wo karan tonyɛ la woletɔ ni mɔgɛ do ya wo manyinika, wo si tonyɛ fɔ a ye a kilɛ fɛ.

-1-

²² Mɔgɔ kana tɔnɛ sɔrɔn bolo-kolɔn kuma anuna bolo-kolonyɛla ko la. I kana bolo-kolɔn kɔndɔfili kiti tɛgɛ tinɛ.

²³ Mari le si anuna kɛlɛ kɛ anu ye ka wo niyi ragbɛrɛn.

-2-

²⁴ Mɔgɛ min yisi kolo, i kana wo ma i diyana-mɔgɛ la.

²⁵ Tumado, a sɔn si to i bolo ma, i ti ke min bolokala. Tɔ-a-la, wo si ma gbɛrɛ la i ye.

-3-

²⁶ Mɔgɔ kana i nyɛrɛ ma yili-bolomɛ la

²⁷ bawo ni i ma ke a sarala, anu si ila sa-fan gbɔrɔndo i kɔrɔ.

-4-

²⁸ I benbanu ya dan-kuri min sigini to, i kana wo bɔ a gbɛ rɔ.

-5-

²⁹ Mɔgɔ-wo-mɔgɔ kusan wɔlila, wo ti to ata wɔlɛ kɛla dogɔn tɔ. Hali mansɛ, a si a bolo don a wara-koe rɔ ala wɔli-nyimɛ wola ko la.