Hɛnkilimaya-Kumɛnu 21 - ALLALA KUMƐ

¹ Mari ye yi-gbere latelenna nya min, a si mansɛ yisi fanan natelen wo nya na le.

² Mɔgɛ ya a lɔn ko a ye koe min bɛɛsi ladanna a nyɛrɛ ma, wo latelenta kɔnɔ Mari le ya ma yisirɔ-koenu lɔn.

³ Ka ko-latelennɛ kɛ, wo di Mari ye saraka-bɔɛ ko.

⁴ Karagbɛlɛ si a nyɛrɛ kɔrɔbi ka wasi, ado hakɛ le wo la.

⁵ Mɔgɛ min bi a sɛbɛ donna wɔlɛ ma, wo si ma le nɔnfulu-tigi la. Kɔnɔ min bi fen-kalamɛ nyinina, wola ban le bolo-kolonyɛ la.

⁶ Mɔgɛ ye nɔnfuli min nyinina foninyɛ rɔ, nɔnfuli wo si a boloka tiriya, ado a si ma gbɛrɛ la a ye ka a faga.

⁷ Karagbɛlɛla karagbɛlɛyɛ si ma yili-kole la a ye ka ta a la pon bawo a sa sɔnna ka ko-latelennɛ ma muk!

⁸ Mɔgɔ-yogenu kɛ-nya ma telen kɔnɔ mɔgɔ-nyimɛ, wonu bi ko-latelennɛ kɛla.

⁹ Yanni musu-sɔnkɔtoe ni to i yakɔrɔ-mamɔla bon-hakikɛ la, a fisa, i ni taran bon-nɛ do la i dan na.

¹⁰ Ko-yogoma-kɛ-sɔgɛ si to karagbɛlɛ birala tuma-wo-tuma. Karagbɛlɛ ti kinikini a sigi-nyɔgɛ ma hali!

¹¹ Mɔgɛ min si hɛnkili bɔrɔbɔ, anu ba a tɔrɔ, wo si a ma, kuntan fanan ni hɛnkili sɔrɔn kɔnɔ i wa hɛnkilimɛ karan min na, a si wo kɔrɛ lɔn ka a tɔnɛ sɔrɔn.

¹² Alla min natelennɛ, wo kolan ye karagbɛlɛla bon-burɛ la, ado a si anu kasara pɔ!

¹³ Mɔgɛ min bi a bole burunna a tole la alako a kana bolo-kolɔnnu di-kɛ-kan lamɔɛn, ale fanan tenbi dila lunyɛ do, a di-kɛ-kan la ti mɔɛn.

¹⁴ Ni wobɛ mɔgɛ do sɔsɔra, i ni i madiya a la fen-ni na dogɔn tɔ, wo si a ma, a yisi ni kimɛ.

¹⁵ Ni koenu na ye telenna a kilɛ fɛ, wo di mɔgɔ-telennɛnu ye kɔnɔ wo si a ma, karagbɛlɛnu kun ma ni kɔ kosɛbɛ!

¹⁶ Mɔgɔ-wo-mɔgɔ ya a kian bɔ hɛnkilimaya-kilɛ ma, wo tigi ara a kian sɔ kanbarɔ-ta-kilɛ ma.

¹⁷ Ni bakalanteyɛ diyara mɔgɔ-wo-mɔgɔ ye, wo tigi si ma bolo-kolɔn la. Ni gbɛɛ-minyɛ anubɛ dɔn-fen-diyama-dɔn diyara min ye, wo tigi ti ma nɔnfulu-tigi la.

¹⁸ Karagbɛlɛnu bi anu mirila ko-yogomɛ minnu sigi koe rɔ mɔgɔ-telennɛnu ma, wo ye sɛgila anu denu denu kɔgɔ rɔ.

¹⁹ Yanni i ni to sigini musu-sɔnkɔtoe dafɛ bɔn la, a fisa, i kelan ni ta i sigi wula-kunyɛ la.

²⁰ Hɛnkilimɛ si to fen-kolomɛnu namarala a nyɛrɛ ye kɔnɔ kun-takolɔn wo ti ke a yigi sigila.

²¹ Mɔgɛ min bi telenbagayɛ anubɛ keninteyɛ nyinina, wo tigi si sabati ka simayɛ anubɛ gbiliyɛ sɔrɔn.

²² Hali so-burɔ-mɔgɛnu tagbɛlɛ, tarɛ mininɛ soe wo ma, kɛlɛ-kurugbɛ min hɛnkili kolo, wo si ta soe wo bira-a-la.

²³ Yanni i ni nanparan sɔrɔn, a ma i fɛrɛma kuma tinɛ.

²⁴ Ni i ya mɔgɔ-wo-mɔgɔ yen mɔgɔ mayɛlɛnna, wasinte anubɛ sɔnkɔtoe le wo tigi la, ado nyɛrɛ-kɔrɔbiyi di a ye.

²⁵ Fan minnu sɔgɛ ye tinya-mansɛ birala, wo le ye a fagala bawo a ti sɔn a bole manɔgɔla wɔli-kɛ-tinɛ.

²⁶ Tele-wo-tele, a si to a mirila fan wonu ma kɔnɔ telenbagɛ, wo si ke le fan nila mɔgɛnu ma.

²⁷ Karagbɛlɛla saraka-bɔɛ ma di Mari ye katarala ni ko-yogoma-kɛ-sɔgɛ tonɛ a yisi rɔ.

²⁸ Ni foninya-fɔlɛ ya sereyɛ bɔ, a si kasara kɔnɔ telenbagɛta kumɛ si to a gbɛ rɔ.

²⁹ Karagbɛlɛ si a nyɛrɛ layiri ka a nyɛrɛ ma iko a kerinte kɔnɔ mɔgɔ-latelennɛ si anu miri anuna ko-ladan-nya ma.

³⁰ Ni Mari ye min kan ma, hali hɛnkili ye wo tigi bolo, a ya ko lɔn, wonu ti ko nyinya a ma.

³¹ Mɔgɔ si soeenu tabɛn kɛlɛ-kɛ-koe la kɔnɔ min bi kɛlɛ nɔla, Mari le ye wo latɛgɛla.