Hɛnkilimaya-Kumɛnu 18 - ALLALA KUMƐ

¹ Mɔgɛ min ti hɔn a ta-nyɔgɛ la fɔ a nyɛrɛ, wo tigi ye hɛnkilimayɛ lafɛyala.

² Ko-nya-yen ma di kun-takolɔn ye. Fɔ ka to a nyɛrɛ miriyanu takaranna, wo le di a ye.

³ Ko-yogoma-kɛ si miliyɛ lana mɔgɛ kuma. Miliyɛ si yarabiyi sanba mɔgɛ ma.

⁴ Kumɛ min bi bɔla hɛnkilimɛ da rɔ, a kɔrɛ-lɔn gbɛlɛ iko tungban-kɔrɛ ye nya min. Ale hɛnkilimɛ si to hɛnkili-kurɛnu nabɔla a da rɔ iko tenke si to bɔla a denkɛ rɔ nya min.

⁵ Mɔgɔ kana lafisayalɛ kɛ ka karagbɛlɛ yiliki ma a yoe la anubɛ ka mɔgɔ-latelennɛ-yoe ma a yiliki la.

⁶ Kun-takolɔn darɔ-kan si nanparan lana a nyɛrɛ kuma, ha anu ni a gbesi.

⁷ Kuntanta kumɛ si a ma, a wara-koe ni bui bawo a ye kumɛ min nabɔla a da rɔ, wo si ma a ye iko gbɛrɛ.

⁸ Nafigila kumɛ si diya mɔgɔ tole la iko dɔn-fen-diyamɛ si a diya don mɔgɛ rɔ nya min.

⁹ Mɔgɛ min ti wɔlɛ kɛ a kin na, wonubɛ kasarante rakɛn de!

¹⁰ Mari le mɔgɔ niyi lakisilɛ la iko so-latankanɛ, telenbagɛnu si anu buri ka ta anu dogon kan min.

¹¹ Nɔnfulu-tigi ya ala nɔnfuli le lɔn ala kisilɛ la. A ya a lɔn ko tarɛ le ala fen-tigiyɛ wo la, mɔgɛ ti ke tenbila min na.

¹² Mɔgɔla wasinteyɛ le ye a labuila. Mɔgɔ-famayiginɛ le ye gbiliyɛ sɔrɔnna.

¹³ Mɔgɔ ni a tole masɔ yanni a ni kumɛ yabi. Ni min ti wo ma, kun-takolɔn le wo la ado miliyɛ ti bɔ a fɛ.

¹⁴ Mɔgɛ si ke ka a ragbɛlɛya kirayɛ rɔ kɔnɔ ni a yigi tɛgɛnɛ a nyɛrɛ la, a ti ke wo mala.

¹⁵ Hɛnkilimɛ si karan tuma-wo-tuma, ado tuma-wo-tuma, a ye hɛnkili-kura-nyinɛ la.

¹⁶ Sanbɛ si kilɛ laka mɔgɛ ye, ado ni mɔgɔ-ba do yen-sɔgɛ ye i la, i ni a sanba fan do la.

¹⁷ Mɔgɔ fila wa sɔsɔ, mɔgɔ kelen fɔlɔn ni atɛ rakaran, i si a fɔ ko tonyɛ ye wo le le bolo kɔnɔ ni a ta-nyɔgɛ fanan ya nyinikalɛ lawuli, i si tɛgɛ ale rɔ.

¹⁸ Ni mɔgɔ-ba fila sɔsɔra koe dola ko la, wo ni korɔn lakɛ anu tɛma. Tumado, sɔsɔlɛ wo si ban koron-nakɛ wo fɛ.

¹⁹ Ni mɔgɛ ya a na-kelen-nyɔgɛ yisi-tinya-koe ladan, wo burɛ-lɔn-koe gbɛlɛ a bolo iko tarɛ mininɛ soe min ma. Ala diminyɛ si ma wo tɛma iko tarɛ min dɛ latogonnɛ nɛgɛ-kankan la.

²⁰ Hɛnkilimɛ ye kumɛ min nabɔla a dɛ rɔ, wo si fa wo tonɛ la. A ye fan min sɔrɔnna a darɔ-kan fɛ, wo si a wasa.

²¹ Mɔgɔla kumɛ tenbira niyi anubɛ sayɛ la. Kuma-siyaman-fɔɛ di min ye, wo si nanparan sɔrɔn ka a tɛgɛ a darɔ-kan ma.

²² Ni kei min ya musi sɔrɔn, wo ara fen-nyima sɔrɔn. A ni a lɔn wo rɔ ko Mari ara ko-nyimɛ kɛ a ye.

²³ Bolo-kolɔn si a makinikini-kumɛ fɔ madiyalɛ tinɛ kɔnɔ nɔnfulu-tigi si nyɛɛ a ma a yabi tinɛ.

²⁴ Hali mɔgɛ diyana-mɔgɛ si siyaya duk kɔnɔ mɔgɔ kelen de ye nyɔ anubɛ min si diya ka tenbi a na-kelen-nyɔgɛ la.