Hɛnkilimaya-Kumɛnu 17 - ALLALA KUMƐ

¹ Yanni mɔgɛ ni fen dɔn ladiyɛ rɔ rayogobo-yagaba, wobɛ kɔndɔfili, a fisa, a ni to biredi-gbalɛ dɔnna yisi-kimɛ rɔ.

² Bonna-wɔli-kɛla-hɛnkilimɛ si taran bon-tigila den-milibɛlɛ kun na bɔn la. Anubɛ bon-tigi wola dannu ta si kɛnya kɛɛ-sɔrɔn rɔ bɔn wo la.

³ Sɛnɛ anubɛ wodi-gbɛ kɔrɔ si bɔ tɛ rɔ kɔnɔ Mari le si mɔgɔ yisi kɔrɔbɔ.

⁴ Karagbɛlɛ si a tole masɔ a karagbɛlɛ-nyɔgɛ kuman-kan la. Foninya-fɔlɛ si a tole masɔ a foninya-fɔ-nyɔgɛ la.

⁵ Min bi yɛlɛnna bolo-kolɔn ma, wo ara bila a Dali-Mari la. Min bi yɛlɛnna mɔgɔ-magboyanɛ ma, wo fanan si ata tɔrɔyɛ sɔrɔn.

⁶ Benbe si a wasi a mamanɛ la iko dan si a wasi a fa la nya min.

⁷ I ti i miri hɛnkilimaya-kumɛ ma kun-takolɔn bolo nya min, i ti i miri foninyɛ fanan ma kun-tigi bolo wo nya na le.

⁸ Mɔgɛ donu ya a lɔn ko anu si kabana-koe ladan dogonta-fan la. Anu ya a lɔn ko a si koe bɛɛ nyinya anu ma.

⁹ Ni i ko i ni diya mɔgɛnu ye, fɔ i ni anu sɔn yamatogon. Ni i tora anu sɔn fɔla, i ti i diyana-mɔgɛ sɔrɔn.

¹⁰ Makuma kelan si ko-nyinya hɛnkilimɛ ma ka tenbi bosɛ dan-nya kɛmɛ la kuntan ma.

¹¹ Mɔgɔ-yogomɛ si to murutiyɛ kun na, ado anu bi min natala wo bira tinɛ, ni wo kera a ma, a ti kinikini a ma.

¹² Yanni i ni kun-takolɔn taran masiba-koe ladanna, a fisa, i ni yara-denbɛ taran minna dannu bara tunu a ma.

¹³ Ni mɔgɛ ya ko-nyimɛ sara ko-yogomɛ la, yakɔrɔ-mamɔɛ ti bɔ ala bɔn la.

¹⁴ Ka sɔsɔlɛ lawuli, wo mani de iko yi wa balan sɔgɔ. I ni sɔsɔlɛ wo ban yona alako a kana na to koloyala.

¹⁵ Ka yo-tigi yiliki anubɛ ka mɔgɔ-yilikinɛ boloka, wo fenfen ma di Mari ye.

¹⁶ Hali yuwɛ ya karan san, a ti ko nyinya a ma bawo yi sa a kunyɛ rɔ.

¹⁷ A bɛnta diyana-mɔgɔ filɛ ni to keninteyɛ yirala anu nyɔgɔn na. A fisa, mɔgɛ ni a na-kelen-nyɔgɛ dɛnbɛ tɔrɔyɛ rɔ.

¹⁸ Hɛnkili sa mɔgɛ min na, wo le ye a sɔla yili-bolomayɛ la mɔgɛnu tɛma.

¹⁹ Sɔsɔli-sɛ di mɔgɛ min ye, hakɛ di wo tigi ye. Nyɛrɛ-matɔgɔlɛ anubɛ nanparan ti fara.

²⁰ Karagbɛlɛ ti da lafaga. Kuma-fila-fɔlɛ anubɛ nanparan le.

²¹ Ni mɔgɛ ya den-kun-takolɔn sɔrɔn, a si nimisa. Ni mɔgɛ ya den-karagbɛlɛ sɔrɔn, a ti sewa wola ko la.

²² Ni-radiyɛ anubɛ kɛndɛyɛ le ye tala anu nyɔgɔn fɛ kɔnɔ yisi-tinya si mɔgɔ-siyi madɔgɔya.

²³ Kiti-tɛgɛla-yogomɛ si dogonta-fan bira. Wo ko-sunu si telenbagayɛ tinya.

²⁴ Hɛnkilimɛ si to a yɛ lakalanna ka hɛnkilimayɛ makofu kɔnɔ kun-takolon-miriya si ta kan tinɛ bɛɛ rɔ.

²⁵ Kun-takolɔn si diyi-kɛ anubɛ yakɔrɔ-mamɔɛ sanba a sɔrɔnnɛnu ma.

²⁶ A ma kin, mɔgɛ ni ko-tinyabɛlɛ tɔrɔ. Ni mɔgɔ-ba ye ko-latelennɛ kɛla, a ma kin, mɔgɛ ni wo gbesi wola ko la.

²⁷ Kuma-pɔrɔtɔ-parata-fɔɛ ma di ko-lɔnnɛ ye. Mɔgɛ min si ko nya-yen, wo yisi ti bɔ yona.

²⁸ Ni kun-takolɔn kera kunna a dɛ ma, mɔgɛnu si a lɔn de hɛnkilimɛ la.