Hɛnkilimaya-Kumɛnu 15 - ALLALA KUMƐ

¹ Kuma-makimani-fɔɛ si mɔgɔ-yisi-bɔnɛ kimɛ kɔnɔ kuma-yogoma-fɔɛ si tɛ tugu mɔgɔ-yisi-bɔnɛ la.

² Hɛnkilimɛta kumɛ si hɛnkili di mɔgɛnu ma kɔnɔ kuntanya-kumɛ si to tugula kuntan dɛ rɔ.

³ Mari kolan ye kan-tinɛ bɛɛ la. Hali a nyimɛ anubɛ a yogomɛ, a si wo bɛɛ yen.

⁴ Kuma-nyimɛ si simayɛ di mɔgɛ ma kɔnɔ kuma-yogomɛ si mɔgɔ yisi tinya pɔ!

⁵ Ni min ya a kan-kɔ sɔ a fala kawandili-kan la, yuwɛ le wo tigi la kɔnɔ ni min ya wo bira, hɛnkilimɛ le wo tigi la.

⁶ Fen-koloma-siyaman bi mɔgɔ-latelennɛ bolo kɔnɔ karagbɛlɛta tɔnɛ ma fenfen na fɔ tɔrɛ.

⁷ Hɛnkilimɛ si lɔnnɛ ranyɛnsɛn mɔgɛnu tɛma kɔnɔ kuntanyɛ ti wo ma.

⁸ Hali karagbɛlɛla sarakɛ, Mari ti sɔn a la kɔnɔ mɔgɔ-latelennɛ tenbi a madiyala, wo di ale Mari ye kosɛbɛ!

⁹ Karagbɛlɛ kɛ-nya ma di Mari ye kɔnɔ mɔgɛ min bi ko-latelennɛ mala, wo le di Mari ye.

¹⁰ Min bi kila-latelennɛ bolokala, wo si makololi-belebele sɔrɔn. Ni min ya a kan-kɔ sɔ kawandili-kan la, a ti siyi labɔ.

¹¹ Hali sayɛ min dogonnɛ, ni Mari ye wo yenna, kumanato a ti ke male mɔgɔni-gbuyi-miriya lɔnna.

¹² A ma di mɔgɔ-famayɛlɛnɛnu ye, mɔgɛ ni anu denu kawandi. Anu ti sɔn tala hɛnkilimɛnu bara anu makawandi-koe rɔ.

¹³ Mɔgɛ min sewanɛ a burɔ, wo si to yɛlɛnna mukuyɛɛ! Yakɔrɔ-mamɔɛ si a ma, mɔgɛ ni a funu.

¹⁴ A sɔgɛ ye hɛnkilimɛ la, a ni a kunyɛ lafa lɔnnɛ la kɔnɔ kuntan si kuntanyɛ gburu a gban rɔ.

¹⁵ Bolo-kolon-gbɛ yisi lafanɛ kɔndɔfili le la kɔnɔ min si wasa a bolotɛ kuma, tuma-wo-tuma wo sewani de!

¹⁶ Yanni i ni ma nɔnfulu-tigi la, i yakɔrɔ-mamɔnɛ, a fisa worɔ, i ni fen-ni sɔrɔn, i kilannɛ Mari la.

¹⁷ Yanni wo ni to sogo-kɛɛnmɛ dɔnna, koninteyɛ ye wobɛ wo na-kelen-nyɔgɛnu tɛma, a fisa, wobɛ wo na-kelen-nyɔgɛnu ni to sɔsɛ dɔnna keninteyɛ rɔ.

¹⁸ Mɔgɛ min yisi lakala, a si a ma, kɛlɛ ni ta yarɔ tiriya kɔnɔ min si a munyu, wo si kɛlɛ-wuyan bɔ a la.

¹⁹ Tinya-mansɛ ye tala kila-wo-kila fɛ, a si a fɔ ko wɔnɛnu bi kilɛ wo la kɔnɔ mɔgɔ-latelennɛ ye tala kan-bo-kan, wola kilɛ lakani de a yala fagba!

²⁰ Den-hɛnkilimɛ si a ma, a sɔrɔnnɛnu ni sewa kɔnɔ kuntan si yoo anu ma.

²¹ Kuntan si to sewala ala kuntanyɛ rɔ kɔnɔ hɛnkilimɛ si to ko-latelennɛnu nadanna.

²² Ni mɔgɛ min ma a kawandililɛ sɔrɔn, wo ti ta yarɔ. Ni min ya a kawandililɛ sɔrɔn, wo wara-koe si ta yarɔ.

²³ Mɔgɛ min si kumɛ yabi hakikɛ-kɛ, wo si a diya don a nyɛrɛ rɔ, ado ni a ya kumɛ labɔ a tumɛ rɔ, wo fanan di a ye.

²⁴ Hɛnkilimɛ si to simaya-kilɛ fɛ min si a tanka ka a bɔ saya-kilɛ ma.

²⁵ Mari si mɔgɔ-wasinɛnu kɔmɛ rade dogbe kɔnɔ a si kɛɛ-musi latanka ka a wara-koe lasabati.

²⁶ Miriya-yogomɛnu ma di Mari ye kɔnɔ kuma-nyima-fɔlɛta kumɛnu sɛninyanɛ a yala.

²⁷ Tɔnɔ-yogoma-nyininɛ si nanparan lana a kebilɛ kuma kɔnɔ min ti sɔn dogonta-fan la, wo si simayɛ sɔrɔn.

²⁸ Mɔgɔ-latelennɛ si a miri kuma-yabi-tinɛ kɔnɔ kuma-yogomɛ-latiri ye bɔla mɔgɔ-yogomɛ dɛ rɔ.

²⁹ Mari si a wɔlɔ matɔlɔ mɔgɔ-latelennɛnuna madiyalɛnu na kɔnɔ Mari fɛ-yan karagbɛlɛnu na pon!

³⁰ Ni mɔgɛ ya a yakɔrɔ-nyimɛ yira i la, wo si a ma, i yisi ni sewa, ado kuma-nyimɛ si a ma, mɔgɔ niyi ra ni diya a ma.

³¹ Mɔgɛ min si sɔn a tole masɔla kawandili-kan la, a di wo ye ka to sigini hɛnkilimɛnu tɛma tuma-wo-tuma.

³² Ni min ye a kan-kɔ sɔla latelan la, wo tigi ma di a nyɛrɛ ye kɔnɔ ni min sɔnta labilɛ ma, wo tigi si ko nya-yen.

³³ Ni mɔgɛ kilanta Mari la, a si hɛnkilimayɛ wara-koe karan. Yanni mɔgɛ ni gbiliyɛ sɔrɔn, fɔ a wa a nyɛrɛ famayigi.