Hɛnkilimaya-Kumɛnu 14 - ALLALA KUMƐ

¹ Musu-hɛnkilimɛ si ala denbayɛ sɔ kɔnɔ musu-kun-takolɔn si ala denbayɛ wayan ka a tii mɛmɛ!

² Mɔgɔ-latelennɛ si kilan Mari la kɔnɔ karagbɛlɛ kɛ-nya si a yira ko Mari ma di a ye.

³ Kun-takolɔnta-kumɛ si bosɛ sagan a nyɛrɛ kan ma kɔnɔ hɛnkilimɛta kumɛ si a tanka tɔrɔyɛ ma.

⁴ Ni sara-ninki sa mɔgɛ min bolo, wola bira-belebele lafani ma dɔn-fan la. Sara-ninkita-sɛnbɛ si a ma, dɔn-fan ni boroko-baraka.

⁵ Sereya-bɔla-nyimɛ ti foninyɛ fɔ kɔnɔ sereya-bɔla-yogomɛ si foninya-gbansan de fɔ.

⁶ Hali mɔgɔ-famayɛlɛnɛ ya hɛnkili nyini, a ti a sɔrɔn kɔnɔ hɛnkilimɛ si ko lɔn yona.

⁷ I kana na i gbɛrɛn kun-takolɔn ma alako a kana na i karan kuntanyɛ la.

⁸ Nfenna hɛnkilimɛ bolo la ti bira? Bawo yanni a ni ko-wo-ko ma, fɔ a wa a miri fɔlɔn. Nfenna kuntan si yuwaya-koe ladan? Bawo a ye ko-wo-ko ladanna, a ya a lɔn ko a ye tonyɛ le tɔ kɔnɔ wo fɛ-yan a la.

⁹ Mɔgɛ min si kilan hakɛ la ka a sɔn latelen, kun-takolɔn si yɛlɛn de wo ma. Kɔnɔ ko-telenni-kɛ si diya mɔgɔ-latelennɛ ye.

¹⁰ Mɔgɔ kelen pe ya ata tɔrɔyɛ anubɛ sewɛ dan lɔn. Mɔgɔ-gbɛrɛ ti ke wo nya lɔnna a bolo.

¹¹ Mɔgɛ min karagbɛlɛ, ko ti bɔ wo kɔmɛ rɔ kɔnɔ mɔgɔ-latelennɛ kɔmɛ si to sabatila.

¹² Tumado, mɔgɛ donu si a lɔn ko anu bi kila-nyimɛ le fɛ kɔnɔ yaga, kanbarɔ-ta-kilɛ le wo la.

¹³ Mɔgɛ do tɔrɔnɛ si taran kɔnɔ hali wo, a si yɛlɛn. Sewɛ do si a laban tɔrɔyɛ ma.

¹⁴ Mɔgɔ-yogomɛ si atɛ sɔrɔn ka a tɛgɛ ata ko-yogoma-kɛ ma kɔnɔ mɔgɔ-nyimɛ si a sarɛ sɔrɔn ala ko-nyima-kɛ rɔ.

¹⁵ Kuma-wo-kuma fɔra kun-takolɔn ye, a si la wo la kɔnɔ hɛnkilimɛ si a miri a ta tinɛ ma fɔlɔn.

¹⁶ Hɛnkilimɛ si kilan Mari la, a ni a bole bɔ ko-yogomɛ rɔ. Kɔnɔ kun-takolɔn ti a miri ko-ladan tinɛ. A kunyɛ wa wuli koe min na, a ye wo le ladanna.

¹⁷ Mɔgɛ min yisi lakala, a si kuntanya-koe ladan kɔnɔ hallintore kusan a yisi birala.

¹⁸ Kuntan ti fenfen sɔrɔn ata kuntanyɛla ko la fɔ yuwayɛ kɔnɔ hɛnkilimɛ barayi le lɔnnɛ la.

¹⁹ Tɔ-a-la, karagbɛlɛnu si to anu madula mɔgɔ-latelennɛnu ye. Mɔgɔ-yogomɛnu si na anu madu mɔgɔ-nyimɛnu ye.

²⁰ Bolo-kolɔn ti diya hali a sigi-nyɔgɛ ye kɔnɔ fen-tigi si diya mɔgɛ bɛɛ ye tɛrr!

²¹ Ni min ya a yɛ layigi a sigi-nyɔgɛ ma, wo tigi ara hakɛ kɛ. Kɔnɔ ni mɔgɔ-wo-mɔgɔ ya ko-nyimɛ kɛ bolo-kolɔn ye, wo tigi si barayi sɔrɔn.

²² Min bi ko-yogomɛ rabɛnna a hadama-den-nyɔgɛ kan ma, ko-nyima-kilɛ si to-a-rɔ wo ma. Kɔnɔ min bi ko-nyimɛ rabɛnna a hadama-den-nyɔgɛ ye, wo si diya mɔgɛnu ye. Anu si la a la fanan.

²³ Wɔli-belebele si tɔnɛ di mɔgɛ ma kɔnɔ kuma-teleka-teleka-fɔɛ si bolo-kolonyɛ lana mɔgɛ ma.

²⁴ Hɛnkilimɛ makiri-fan le ala nɔnfuli la kɔnɔ kun-takolɔn si lɔn ata kuntanyɛ fɛ.

²⁵ Sereya-bɔla-nyimɛ si mɔgɔ-niyi lakisi kɔnɔ sereya-bɔla-yogomɛ si mɔgɛ yanfa.

²⁶ Ni min kilanta Mari la, wo yili latɛgɛni de, ado anubɛ ala denbayɛ la si fɛrɛ.

²⁷ Ka kilan Mari la, wo si simayɛ di mɔgɛ ma iko tenke min ti gbala, ado kilan wo si a latanka gbɛrɛ ma min si mɔgɛ bira saya-kilɛ ma.

²⁸ Mɔgɛnu siya nya min, mansɛla gbiliyɛ ye koloyala wo nya na le, ado ni mɔgɛnu ma, fenfen ma ale kun-tigi la.

²⁹ Ni min si ke a yisi birala, hɛnkilimɛ le wo la. Kɔnɔ mɔgɛ min ti ke a yisi birala, wo ye a yirala ko hɛnkili sa a la.

³⁰ Yisi-kimɛ si kɛndɛyɛ di mɔgɛ ma kɔnɔ keliyɛ si mɔgɔ-kole tuli.

³¹ Min bi balanna bolo-kolɔnla bolo-fan ma, wo tigi ara bila Alla la kɔnɔ min bi a kɛ-nya-nyimɛ yirala bolo-kolɔn la, wo mani de iko a ye Alla le gbiliya tinɛ.

³² Karagbɛlɛla karagbɛlɛyɛ si a labui kɔnɔ hali sayɛ wa gbɛrɛn tumɛ min, mɔgɔ-latelennɛnu na si fɛrɛ.

³³ Hɛnkili si a sa-bole rabɛn hɛnkilimɛ kunyɛ rɔ. Hali kuntan si hɛnkili yen hɛnkilimɛ rɔ.

³⁴ Telenbagayɛ si a ma, nyamanɛ ni ta yarɔ kɔnɔ hakɛ si mɔgɛnu nayarabi pɔ!

³⁵ Mansɛ si sewa ala wɔli-kɛla-nyimɛ la kɔnɔ a yogomɛ min ti sɔn ala wɔlɛ kɛla, ale mansɛ si wo tɔrɔ.