Hɛnkilimaya-Kumɛnu 12 - ALLALA KUMƐ

¹ Ni min si sɔn latelan ma, lɔnnɛ di wo tigi ye kɔnɔ ni min ti sɔn latelan ma, kun-takolɔn le wo la.

² Mari diyana-mɔgɛ le mɔgɔ-nyimɛ la kɔnɔ a si yanfante tɔrɔ.

³ Mɔgɔ ti ko lasa karagbɛlɛyɛ rɔ kɔnɔ ni mɔgɔ-latelennɛ ya ko lasa, a la ti maga tun.

⁴ Furu-musu-nyimɛ si a ma, ala kei ni sewa ala ko la kɔnɔ musu-kɔndɔgbɔɛ si ala kei tɔrɔ iko kolota-kirayɛ wa mɔgɔ bira.

⁵ Mɔgɔ-latelennɛ le si a miri telenbagayɛ ma kɔnɔ mɔgɔ-yoge-miriya bɛnnɛ yanfanteyɛ le ma.

⁶ Mɔgɔ-yoge-darɔ-kan bɛnnɛ mɔgɔ-fagɛ le ma kɔnɔ mɔgɔ-nyimɛ-darɔ-kan si mɔgɔ dɛnbɛ ka a kisi.

⁷ Mɔgɔ yogela ban-bole si a ma, a ti a nyɔgɔn to tun kɔnɔ mɔgɔ-latelennɛ tɔgɔ ti tunu.

⁸ Mɔgɔ si hɛnkilimɛ gbiliya iko a ye ala hɛnkilimayɛ lawɔlila nya min kɔnɔ kuntan ma di mɔgɛnu ye.

⁹ Yanni mɔgɛ ni a nyɛrɛ ma iko fen-tigi, kɔnkɛ ye ala bɔn la, a fisa, a ni wɔli alako a ni a beli-fan sɔrɔn.

¹⁰ Mɔgɔ-nyimɛ kusan ala kolo-fannu fɛ-birala kɔnɔ karagbɛlɛ ye anu bira boloko-yogomɛ le kɛla.

¹¹ Dɔn-fan ti dasa wɔli-kɛla-nyana-warɛ bɔn la kɔnɔ mɔgɛ min ti sɔn a nyɛrɛ tɔrɔ koe ma fɔ ka nɔnfulu-lakalamɛ nyini, hɛnkilima ma wo la.

¹² Karagbɛlɛ si nyini a karagbɛlɛ-nyɔgɛ le bolo-fan ma. Kɔnɔ mɔgɔ-latelennɛ munna ara faga bawo a mani de iko kɔlɔma min si gbɔ yisikiri!

¹³ Mɔgɔ-karagbɛlɛ si bira a nyɛrɛta kuma-yogomɛ la iko gbɛrɛ kɔnɔ mɔgɔ-latelennɛ kunyɛ si bɔ tɔrɔyɛ rɔ.

¹⁴ Mɔgɔ ye tɔnɛ sɔrɔnna ala kuma-nya-nyimɛ le fɛ, ado a si barayi sɔrɔn iko a kɛ-nya-nyimɛ ye nya min.

¹⁵ Tuma-wo-tuma, kuntan ye a mirila ko a ye tonyɛ le tɔ kɔnɔ hɛnkilimɛ si kawandili-kan bira.

¹⁶ Kuntan si kɔrɔtɔ tiriya kɔnɔ manyini-kumɛ bɔrɔ ti taran hɛnkilimɛ ye.

¹⁷ Sereya-bɔla-nyimɛ si tonyɛ fɔ kɔnɔ sereya-bɔla-yogomɛ si foninyɛ le fɔ.

¹⁸ Kuma-yogoma-fɔlɛla kumɛ si to mɔgɔ-sɔn sɔgɔla a rɔ kɔnɔ hɛnkilimɛta kumɛnu si to mɔgɔ yisi-kimɛla.

¹⁹ Siyi ye tonyɛ la burubukai kɔnɔ siyi sa foninyɛ la feu!

²⁰ Minnu miriya bɛnnɛ ko-yogomɛ ma, yanfante le wonu na kɔnɔ mɔgɛ min bi yisi-kimɛ lanala mɔgɛnu tɛma, wonu si sewa.

²¹ Ko-yogoma ti ma mɔgɔ-latelennɛnu na kɔnɔ karagbɛlɛ-sarɛ le yakɔrɔ-mamɔɛ la.

²² Foninya-fɔlɛ ma di Mari ye kɔnɔ mɔgɛ min si a darɔ-kan latɔnbagaya, wo le di Mari ye kosɛbɛ!

²³ Hɛnkilimɛ ya ko-wo-ko lɔn, a ti a nyɛrɛ matɔgɔ wo rɔ kɔnɔ kuntan si lɔn ata kuntanya-kumɛnu fɛ.

²⁴ Mɔgɛ min sɛbɛ wɔlɛ ma, wo si sɛnbɛ sɔrɔn mɔgɛnu tɛma kɔnɔ tinya-mansayɛ si mɔgɛ ma yɔɔn la.

²⁵ Hɔnya si sigi mɔgɛ kuma iko dunɛ kɔnɔ kɔntɔ-diya-kumɛnu si a ma, a ni sewa.

²⁶ Mɔgɔ-latelennɛ si kila-nyimɛ sa a diyana-mɔgɛ kɔrɔ kɔnɔ mɔgɔ-yogomɛ si a ta-nyɔgɛ bila kila-yogomɛ fɛ.

²⁷ Donse min tinyanta, sogo ti taran wola dagɛ rɔ kɔnɔ mɔgɛ min si a raya a tanyinɛ ma, wo si ma fen-tigi la.

²⁸ Telenbagayɛ si simaya-kilɛ yira mɔgɛ la, ado kilɛ wo dan sa.