2 Mansɛnu 18 - ALLALA KUMƐ

Yuda Mansa Hɛsakaya Wara-Koe

¹ Ilala den Mansa Hoseyala mansayɛ san sawa nyɔgɛ ma Isirɛla mɔgɛnu kun na, Mansa Ehasila den Hɛsakaya mara mansɛ la Yuda nyamanɛ rɔ san wo le la.

² A mansayara a sɔrɔn-san mogan-ni-loli nyɔgɛ le ma. San mogan-ni-kɔnɔntɔ fanan, a ye mansayɛ la Yerusalɛm soe burɔ. A na le Sakarayala den Abaya la.

³ Mansa Hɛsakaya ya koe min bɛɛsi ma ala mansayɛ kɔrɔ, wonu ya Mari hɛnɛ iko a benba Mansa Dawuda wara-koe ya Mari hɛnɛ nya min.

⁴ A ya Alla-batobɛlɛnuna bɛsi-kɔ-tina-mayɛlɛnɛnu tinya. A ya anuna kuru-lɛsɛnɛnu takerikeri. Anu ya kɔlɔma minnu lɛsɛ musila muninyɛ la ka a tɔgɔ sa Asura, a ya wonu tatɛgɛtɛgɛ. Hali wo, Musa ya silɛɛ min nadan duguma-fanla muninyɛ la, anu ya wo kele “Nɛhusitan.” Mansa Hɛsakaya ya wo fanan tinya bawo mɔgɛnu bara wo ma anuna bɛsɛ do la ka isɛnti mintan a ye.

⁵ Mansɛ lara Isirɛlata Mari Alla la. Mansa-gbɛrɛ fenfen sa nyɔ Yuda nyamanɛ rɔ min si ke Mansa Hɛsakaya kɛ rɔ Alla wara-koe rɔ.

⁶ A ya a latelen Mari ye. Hali tele-kelen-bɛrɛni, a ma Marita kumɛ bɔ a gbɛ rɔ. Mari ya tɔn minnu di Nɛbi Musa ma, a ya a ma a fɛrɛma wonu natɔnbagaya tinɛ.

⁷ Mari tora a fɛ. Mansa Hɛsakaya ya koe min bɛɛsi ma, wonu ya a munanfaga. Ale ma sɔn donna Asiriya mansɛta tɔnnu kɔrɔ fɔ a murutiyɛ min kɛra a ma. A sɔra a ye iko tele.

⁸ A ya Filisitinu nɔ kɛlɛ rɔ. Anu tara sigi so-wo-so rɔ, a si ta bui anu ma nyɔ. Hali Kesa soe min bi wulɛ la, wonubɛ so-mɛsɛ minnu bi wola foolɛ rɔ, a ya wonu bi.

⁹ Mansa Hɛsakayala mansayɛ san nani nyɔgɛ ma Yuda nyamanɛ rɔ, Mansa Hoseyala mansayɛ fanan san wɔrɔnfila nyɔgɛ le wo la Isirɛla nyamanɛ rɔ. San wo le nyɛrɛ la, Asiriya Mansa Salamanisa nara bui Isirɛla nyamanɛ ma ka Samariya soe kurun.

¹⁰ Anu bi kɛlɛ wo kun na san sawa kɔrɔ kɔnɔ tɔ-a-la, kɛlɛ ya Samariya soe wo bira. Kɛlɛ ya Samariya soe kɛ bira wati min, wo ya a taran, Mansa Hɛsakaya ara san wɔrɔ bɔ mansayɛ la Yuda nyamanɛ rɔ. Mansa Hoseya ara san kɔnɔntɔ bɔ mansayɛ la Isirɛla nyamanɛ rɔ.

¹¹ Wo kɔma, Asiriya mansɛ wo tara Isirɛla mɔgɛnu na birɛ rɔ a warɛ nyamanɛ rɔ. A ke anu na, a ya anu tatala. A ya donu nata Hela sigisɔn rɔ. A tara donu na Koson sigisɔn rɔ min bi Hebɔ bɛ dafɛ. A tara donu na Midinuna soenu tɔ.

¹² Samariya soe kasarata bawo Isirɛla mɔgɛnu ya hakɛ kɛ anuta Mari Alla la. Min sanɛ wo kuma, anubɛ Mari sarata min ma, anu ya wo tinya. Marita wɔli-kɛla Musa nyɛrɛ ya tɔn min bɛɛsi di anu ma, anu ya wonu tinya. Anu ma anu tole masɔ ka tɔn wonu bira.

Yuda Mɔgɛnu Makuma-Koe Asiriyanu Bolo

¹³ Yuda Mansa Hɛsakayala mansayɛ san tan-ni-nani nyɔgɛ ma, Asiriya Mansa Sɛnakaribu tara bui Yuda nyamanɛ ma ka so-kunbɛnu bi tarɛ mininɛ minnu ma.

¹⁴ Mansa Hɛsakaya ya kilayɛnu nata Mansa Sɛnakaribu ma Lesi soe burɔ. A ko, “N bara ko-yogomɛ le ma. I yandi, ma to nyɔ rɔ. I ya fenfenna ko fɔ, n si wo di i ma.” Asiriya mansɛ wo ya a fɔ a ye ko a ni wodi-gbɛ lata a ma minna gbiliyɛ anubɛ fui-fan bɔrɔ kɛmɛ ani bɔrɔ bi-loli rakɛn anubɛ sɛnɛ fanan minna gbiliyɛ anubɛ fui-fan bɔrɔ tan-ni-loli rakɛn.

¹⁵ Wodi-gbɛ min bɛɛsi ye Mari Bato-Bɔn anubɛ mansɛla bolɔn la, Mansa Hɛsakaya ya wo bɛɛ lata Asiriya mansɛ ma.

¹⁶ Ale nyɛrɛ ya sɛnɛ minnu sa Mari Bato-Bɔn bonda-dɛnu tɔnkɔn filɛnu anubɛ anu kankannu ma, a ya wonu bi ka wo damasi lata Asiriya Mansa Sɛnakaribu ma.

¹⁷ Asiriya mansɛ wo ya ala kɛlɛ-den-kun sawa bi ka ala kɛlɛ-den-siyaman bila wonu fɛ Lesi soe burɔ ka wonu nata Hɛsakaya bira tinɛ Yerusalɛm soe burɔ. Wonu ke Yerusalɛm, anu danta kura ku tinɛ dafɛ. Yi min madɛnnɛ kɔnkɛ kun tɛma, wo worɔn ye yigila ha kura ku tinɛ wo dafɛ.

¹⁸ Anu ya Mansa Hɛsakaya kele nyɔ rɔ. Helikayala den Ilayakim min bi mansɛla bolon-mafɛlɛnna wo, anubɛ Sɛbana min bi ala kɛdi-sɛbɛla wo, anubɛ Esafila den Yowa min bi kɛdi-sɛbɛnɛnu-namarala, ale Mansa Hɛsakaya ya ala mɔgɔ-ba sawɛ wonu nata anu ma.

¹⁹ Asiriyanuna mɔgɔ-ba kelen ya a fɔ mɔgɔ sawɛ wonu ye ko, “Mala nyamani-tigi le ya ma sɔ Mansa Hɛsakaya wara ko ma ni na a manyinika ko nfen ya a to, tamayi sa a rɔ.

²⁰ Wole ya a lɔn ko wola mansɛla kuma-teleka-telekɛ si sɛnbɛ sɔrɔn ka tenbi kɛlɛ-dannu anubɛ anuna halliyɛ la, wa? Wole lanɛ a la ko yon sɔnɛ wo fɛ murutiyɛ kɛ rɔ?

²¹ Ni wo yili-madiyanɛ Iyipiti mɔgɛnu denu na wo dɛnbɛn-koe la kɛlɛ rɔ, wonu mani de iko puka-gbalɛ sewuruyɛ la bawo a si keri mɔgɛ bolo tɔ ka a tanban. Mɔgɔ-wo-mɔgɔ ya a lɛngbɛn Iyipiti mansɛ rɔ, a ye mala wo tigi la wo nya na le.

²² Tumado, wo ye a fɔla le ma ye ko wo ye lala le wota Mari Alla la, wa? Mansa Hɛsakaya ya kan-tina-mayɛlɛnɛ minnu tinya wonu na, ale Mari bato tinɛ le ma wonu na, wa? Wo kɔma, a ma a fɔ wole Yuda kɛnu ye ko wonu ni to sarakɛnu bɔla saraka-mintan-tina kelan wo rɔ Yerusalɛm, wa?

²³ “Nba, awa, ma ni sarama-kan do kiri wona mala mansɛ tɔgɛ rɔ. Ni wole si ke mɔgɔ waga fila sɔrɔnna minnu si sigi soeenu na, ma si soeenu di wo ma ha waga fila.

²⁴ Hali kɛlɛ-den-kunyɛ min dɔgɔ ma rɔ, wo ti bɔ wo yakɔrɔ. Wole lanɛ a la ko Iyipiti kɛnu si soeenu anubɛ kirindinu nana wo dɛnbɛn tinɛ kɛlɛ rɔ, wa?

²⁵ A fɔra le ko male nara kan tinɛ kɛ kasara tinɛ ma nyɛrɛ ma le ni Mari ma male lana? Mari nyɛrɛ le ya a fɔ ma ye ko ma ni na wola nyamanɛ kɛ kasara pɔ!”

²⁶ Wo kɔma, Ilayakim anubɛ Sɛbana anubɛ Yowa ya a fɔ Asiriya mansɛla kandɛ wo ye ko, “I yandi, kuma ma ye Aramaki kan rɔ. Ma si wo ragbɛ le. I kana kuma ma ye mata Hiburu-kan rɔ alako mɔgɛ minnu bi tarɛ kuma san ma, wonu kana na ma kan ragbɛ.”

²⁷ Kandɛ wo ya a fɔ anu ye ko, “A sɔgɛ le wo la, nta mansɛla kumɛ kɛ ni fɔ wobɛ wota mansɛ dɔrɔn de ye, wa? N ma na wo la de! N bi kumala mɔgɛ bɛɛ le ye hali minnu bi san ma wo la. Wole dɔrɔn sa wo boe dɔnna ka wo suli min. Hali minnu bi tarɛ kuma pan, wonu fanan si anu boe dɔn ka anu suli min.”

²⁸ Wo kɔma, Asiriya mansɛla kandɛ wo ya a sɔ ka a kuli mayɛlɛ Hiburu-kan rɔ, a ko, “Wo ni wo tole masɔ. N bi nala mala mansa-makawanɛla kumɛ latenbila wo ma.

²⁹ A ko wola Mansa Hɛsakaya kana na wo mayuwaya bawo a ti ke wo kunkala a bolo.

³⁰ A ko fanan Hɛsakaya kɛ kana na a ma, wo ni la Mari la. A ko wo kana wo miri ko Mari si wo kisi le, ado wo ni la a la ko mata kɛlɛ-dannu si wola soe kɛ bi wo bolo.

³¹ A ko wo kana wo tole masɔ Mansa Hɛsakaya kɛ la. Mata mansɛ ko wo dama ni bɔ soe kɛ burɔ ka wo niyi latenbi ma ma. A ko ni wo ya wo ma, a si a ma worɔ, wo ni to wola ki-fen-gbɔɛnu dɔnna anubɛ wola kɔlɔntɔ-yinu minna

³² ha a ni wo bi yan ka ta wo la ata nyamanɛ rɔ min bi iko wotɛ kɛ. Wo ye tala ata nyamanɛ min tɔ wo la, wo si nɔnbɔ-gbɔ-yi sɔrɔn nyɔ, wo si nyɔɛ sɔrɔn nyɔ ka wo ma biredi la. Wo si liyi anubɛ ɔlifi-gbɔɛnu sɔrɔn nyɔ fanan. Ni wo ya mata mansɛ kɛta kumɛ to a gbɛ rɔ, wo ti faga. A ko wo kana a ma, wola mansɛ kɛ ni wo mayuwaya ka wo miri ko Mari si wo kisi le iko wola mansɛ ya a fɔ nya min.

³³ Sibolo-gbɛrɛkɛ do ye nyɔ rɔ minnuna bɛsɛ ara anuna nyamanɛ kunka Asiriya mansɛ bolo, wa?

³⁴ Mala mansɛ ko Hamati kɛnu anubɛ Arapadi kɛnuna bɛsɛnu bi mintɔ gbɛ? Sifafeyim kɛnu wo, Hena kɛnu wo, Ifa kɛnu wo, wonuna bɛsɛnu bi mintɔ? A ko bɛsɛ kɛ do kera Samariya soe kunkala, wa?

³⁵ A ko fanan, bɛsɛ kɛ do-wo-do ma ke ala nyamanɛ kunkala a ma. Nfenna wole mirinɛ ko Mari si Yerusalɛm soe kɛ kunka a bolo?”

³⁶ Kɔnɔ mɔgɛ wonu tadenɛ tora sɔni iko Mansa Hɛsakaya ya a fɔ anu ye nya min. Anu ma fenfen fɔ.

³⁷ Ilayakim anubɛ Sɛbana anubɛ Yowa ya anuna durukinu tafara yisi-tinyɛ bolo. Kandɛ wo ya kumɛ min bɛɛsi fɔ anu ma, anu tara wonu takaran Mansa Hɛsakaya ye.