2 Ko-Kɔrɔta-Karan 18 - ALLALA KUMƐ

Mansa Ehabu Makawandi-Koe Nɛbi Mɛkaya Bolo

¹ Yuda Mansa Yɛhosafatila mansayɛ sabatira ka gbiliyɛ sɔrɔn tumɛ min, a ya Isirɛla Mansa Ehabula dunmusi furu ala dan ye.

² San-dande tenbinɛ, Mansa Yɛhosafati tara Mansa Ehabu kɔndɔn tinɛ Samariya soe burɔ. Mansa Ehabu ya saga-siyaman anubɛ ninki-siyaman faga ka Yɛhosafati anubɛ a gba-fɛ-bilalɛnu gbiliya. Ehabu donta Yɛhosafati tole rɔ alako wo ni kofu a ma ka ta Ramɔti kɛnu kɛlɛ Kaliyadi nyamanɛ rɔ.

³ Mansa Ehabu ya Mansa Yɛhosafati manyinika, a ko, “I ti kofu ma ma? Ma ni ta Ramɔti kɛnu kɛlɛ.” Yɛhosafati ya a fɔ a ye ko, “I wulita tuma-wo-tuma, n bi i fɛ. I halalɛ le nna kɛlɛ-dannu na.”

⁴ Wo kɔma, Mansa Yɛhosafati ya a fɔ ko, “Kɔnɔ ma ni Mari fɔlɔn manyinika.”

⁵ Wo le ya a ma, Mansa Ehabu ya ala nɛbi mɔgɔ kɛmɛ nani kele ka wonu manyinika, a ko, “N ni ta Ramɔti kɛnu kɛlɛ, ka, n ka ta?” Nɛbi wonu ko, “Ta anu kɛlɛ. Mari si a ma, i ni nɔ-ko sɔrɔn anu ma.”

⁶ Kɔnɔ Yuda Mansa Yɛhosafati ya a manyinika tun ko, “Nɛbi-gbɛrɛkɛ sa nyɔ rɔ min si Mari manyinika ma ye, wa?”

⁷ Mansa Ehabu ya a fɔ a ye ko, “Mɔgɔ kelen bi nyɔ, Imilala den Mɛkaya, kɔni. Kɔnɔ wo ma di n ye mumɛ bawo a ti wɔlɔyiya-kuma fenfen fɔ n ye min di n tole la fɔ a yogomɛ gbansan!” Mansa Yɛhosafati ya ale Mansa Ehabu makawandi a ko, “Mansɛ, i wɔlɔ matɔlɔ! Ma ni a kele ka a manyinika.”

⁸ Wo le ya a ma, Mansa Ehabu ya ala wɔli-kɛlɛ do sɔ ko a ni ta Nɛbi Mɛkaya kele tiriya!

⁹ Wo ya a taran, mansa filɛ kɛnu mayiginɛ anuna waganɛnu tɔ gbere-kole ma Samariya soe don-dɛ la anuna mansaya-durukinu bi anu kan na. Nɛbi siyamɛ wonu bi wɔlɔyiya-kuma-fɔɛnu na anu yakɔrɔ.

¹⁰ Nɛbi do ye kɛnu tɛma, Kɛnayanala den Nɛbi Sɛdɛkaya, kɔni. Wo ya nɛgɛ donu bi ka anu nadan iko ninki-kere. A ya a fɔ Mansa Ehabu ye ko, “Mari ko i si Siriyanu kɛlɛ iko turɛ min kere manɛ nɛgɛ-gbansan la. Wo le si a ma, i ni anu nɔ.”

¹¹ Nɛbi-siyamɛ wo dama ya kuma kelan wo le fɔ. Anu bi a fɔla ko, “Ta Ramɔti kɛnu kɛlɛ. Mari si a ma, i ni anu nɔ.”

¹² Mansa Ehabu ya kilayɛ min nata Nɛbi Mɛkaya kele tinɛ, wo ya a fɔ Nɛbi Mɛkaya ye ko, “N ya a to, nɛbi doinu bi a fɔla ko Mansa Ehabu si nɔ-ko sɔrɔn kɛlɛ rɔ. Ile fanan ni kuma kelan wo le fɔ de!”

¹³ Kɔnɔ Nɛbi Mɛkaya ya a fɔ a ye ko, “A ye malebɛ Mari tɛma, nta Alla ye min fɔla n ye, n bi wo le latenbila mansɛ ma.”

¹⁴ Ale Nɛbi Mɛkaya kenɛ Mansa Ehabu ma, mansɛ ya a manyinika ko, “Malebɛ Mansa Yɛhosafati ni ta Ramɔti kɛnu kɛlɛ, ka, ma kana ta?” Nɛbi ya a fɔ a ye ko, “Awa, ta bui anu ma tun! I ye anu nɔla le serr! Mari si anu don i bolo.”

¹⁵ Kɔnɔ Mansa Ehabu ya a fɔ a ye ko, “N bara mɛ i makawandila iko siyaman, ni i ye kumala malebɛ Mari tɛma, fɔ i ni tonya-kunanɛ fɔ n ye.”

¹⁶ Nba, Nɛbi Mɛkaya ya wɔlɔyiya-kumɛ fɔ a ye ko, “N bara Isirɛla kɛlɛ-dannu tanyɛnsɛnnɛ yen kɔnkɛnu kuma iko saga-kandanna sa sagɛ minnu kun na. Mari ara a fɔ n ye ko anu yisi-kimanɛ ni sɛgi anu barɛ bawo kun-tigi sa anu kun na.”

¹⁷ Mansa Ehabu ya a fɔ Mansa Yɛhosafati ye ko, “N ma a fɔ i ye nun ko kumɛ min ma di n tole la, kɛ si wonu denu fɔ n ye?”

¹⁸ Nɛbi Mɛkaya ya a fɔ a ye tun ko, “I tole masɔ Marita kumɛ la. N bara Mari-mayiginɛ yen ala waganɛ rɔ Arinyɛni tɔ, ala melikanu kinkinɛ a la.

¹⁹ Ale Mari ya ala melikanu manyinika ko, ‘Yon si Mansa Ehabu yanfa alako a ni ta faga Ramɔti soe burɔ?’ Melika donu ya hɛnkili do labɔ. Melika doinu fanan ya hɛnkili-gbɛrɛkɛ labɔ.

²⁰ “Kɔnɔ a laban, Setanɛ nara iko nyinɛ. Wo ya a madon Mari la. A ya a fɔ Mari ye ko, ‘Nde si a yanfa le.’ “Mari ya wo manyinika, a ko, ‘Ile si ke a yanfala kama?’

²¹ “Nyinɛ wo ya a fɔ Mari ye worɔ ko, ‘Nde si ta a ma, Mansa Ehabula nɛbi bɛɛsi ni ma foninya-fɔlɛnu na.’ “Mari ya a fɔ a ye ko, ‘Awa, nba ta! I ni yanfɛ sigi a la bawo n bara la a la ko ile si a nɔ le.’ ”

²² Nɛbi Mɛkaya ya kumɛ kundon a ye, a ko, “A ara ma wo nya na le. Mari ara a ma, nɛbi kɛnu bara foninyɛ fɔ i ye ka i mayuwaya. Mari nyɛrɛ-nyɛrɛ ara tɔrɔyɛ latɛgɛ i ma.”

²³ Nɛbi Mɛkaya ban kɛ fɔla, Nɛbi Sɛdɛkaya tara a dɛ ratii pɔ! A ya a fɔ a ye ko, “Marita sɛnbɛ ya nde boloka muntuma ka ta kuma ile ye?”

²⁴ Nɛbi Mɛkaya ya a fɔ a ye ko, “Fɔ i wa ta i dogon bɔn do tɔnkɔn rɔ lun min, i ni na to a lɔnna.”

²⁵ Mansa Ehabu ya a fɔ a makandannɛ do ye ko, “Wo ni nɛbi kɛ bira ka ta a la so-tigi Amɔn warɛ. Wo ni a yira nna den Yohasi la fanan.

²⁶ Anu ni a ladon yele la. Anu kana fenfen di a ma fɔ biredi anubɛ yi ha n kɛndɛ ni sɛgi tun ka bɔ kɛlɛ rɔ.”

²⁷ Nɛbi Mɛkaya ya a fɔ ale mansɛ ye ko, “Ni ile kɛndɛ sɛgira tun ka bɔ kɛlɛ kɛ rɔ, nba, Mari ma kuma nde ye worɔ. Mɔgɛ bɛɛ ni a yili to nna kumɛ kɛ ko.”

Mansa Ehabu Faga-Koe

²⁸ Isirɛla Mansa Ehabu anubɛ Yuda Mansa Yɛhosafati tara Ramɔti kɛnu kɛlɛ tinɛ Kaliyadi nyamanɛ rɔ.

²⁹ Mansa Ehabu ya a fɔ Mansa Yɛhosafati ye ko, “Ma wa ta kɛlɛ rɔ tumɛ min, nde si n mayɛlɛma alako n ma ni filiya. Ile makirinɛ si to ila mansaya-kurɛnu tɔ.” Ale Mansa Ehabu ya a mayɛlɛma ka kura-gbɛrɛkɛnu bi. A tara kɛlɛ rɔ.

³⁰ Kɔnɔ wo ya a taran, Siriyanuna mansɛ ara a fɔ ala kɛlɛ-den-kunyɛnu ye ko anu denu kana na mɔgɔ-wo-mɔgɔ kɛlɛ fɔ ale Isirɛla mansɛ.

³¹ Wonu ya Yuda Mansa Yɛhosafati yen min kɛ, anu ya a lɔn ko Isirɛla mansɛ le ale la nun. Anu wulita a kan ma. Kɔnɔ ale Yɛhosafati gbele-gbelenta. Mari Alla ya a latanka ka wonu kunyɛ bɔ ale telen tɔ.

³² Kɛlɛ-den-kunyɛnu ya a lɔn tumɛ min ko Isirɛla mansa ma ale la, anu ya a to nyɔ.

³³ Kɔnɔ Siriya kɛlɛ-dan do ye nyɔ nun, wo ya ala kalabɛn lakɛ. Kalabɛn wo tara bɛn Isirɛla Mansa Ehabu la ka don a kɔgɔ-matanka-fan latugun tinɛ do rɔ. Ale Mansa Ehabu ya a fɔ ala kirindi-laburilɛ ye ko, “N bara tanban. Anu bara n magba. Ma sɛgi. Male ni bɔ kɛlɛ kɛ rɔ.”

³⁴ Anu bi kɛlɛ wo kun na, ale Mansa Ehabu gbɔnkunnɛ ala kirindi rɔ, a yɛ lamununnɛ Siriyanuna kɛlɛ-dannu na. Wurala-tumɛ la, a fagara.