2 Ko-Kɔrɔta-Karan 14 - ALLALA KUMƐ

Sudan Kɛnu Nɔ-Koe Mansa Esa Bolo

¹ Mansa Abaya fagara tumɛ min, anu ya a togon Mansa Dawuda halala-luyi ma. Ala den Esa sigira a gbɛ rɔ. Mansa Esa kɛta wati rɔ, san tan dɛgɛdɛgɛ, kɛlɛ ma don Yuda nyamanɛ rɔ.

² Mansa Esa ya ata Mari Alla hɛnɛ bawo a ya ko-nyimɛ anubɛ ko-telennɛ kɛ a yala.

³ Alla-lɔnbɛlɛnuna saraka-mintan-tinɛnu wo, a bɛsi-kɔ-tina wo, a kuru-lɛsɛnɛ wo, anubɛ kɔlɔma minnu lɛsɛnɛ anuna bɛsi Asurala muninyɛ la wo, Mansa Esa ya wo bɛɛsi tinya.

⁴ A ya a fɔ Yuda mɔgɛnu ye ko anu ni anu benbanuta Mari Alla sako kɛ ka ala tɔnnu bira.

⁵ Ata wati rɔ, nyamanɛ wo taranta yisi-kimɛ rɔ bawo a ya Alla-batobɛlɛnuna bɛsɛnu anubɛ anuna isɛnti mintan tinɛnu tinya Yuda nyamanita soe bɛɛ rɔ.

^6-7 A ya a fɔ Yuda mɔgɛnu ye ko, “Ma ni nyamanɛ-kumafɛlɛn-bɛndɛ-layan-bɛnu sɔ ka tarɛ mini mata soe donu ma ka don-dɛ to anu ma minnu si balan. Nyamanɛ ara ma matɛ la bawo ma ara mata Mari Alla sako kɛ. Alla ara kilɛ tɛgɛ ma yogenu ma mala foolɛ bɛɛ rɔ.” Wo le ya a ma, a ya tarɛnu mini soe donu ma Yuda nyamanɛ rɔ bawo Mari ara yisi-kimɛ di anu ma.

⁸ Kɛlɛ-dan mɔgɔ waga kɛmɛ sawa (300,000) ye Mansa Esa bolo Yuda nyamanɛ rɔ. Nɛgɛ-walannu anubɛ tanbɛnu bi anu dama bolo. Kɛlɛ-dan mɔgɔ waga fila mɔgɔ waga bi-segin (280,000) ye a bolo ka bɔ Bɛnyamɛ bɔnsɔn-mɔgɛnu tɔ. Nɛgɛ-walannu anubɛ kalabɛnnu bi wonu bolo. Anu kerinte, ado anu kusan kɛlɛ kɛla.

⁹ Kɛlɛ-kurugbɛ do ye nyɔ min tɔgɛ Sera. A bɔra Sudan nyamanɛ rɔ. A nara kɛlɛ-den wulu kelen (1,000,000) na a bolo anubɛ kirindi kɛmɛ sawa (300). A tara ha Marasa soe burɔ.

¹⁰ Mansa Esa anubɛ ala kɛlɛ-dannu tara anu kun-kɔrɔ-bɛn. Anu kurun filɛ bɛɛ ya anu sɔ tinɛnu bi Safata lɛɛ rɔ Marasa soe dafɛ ka anu ya-lamunun anu nyɔgɔn na.

¹¹ Mansa Esa ya ata Mari Alla matara, a ko, “Ka kɛlɛ-den-siyamɛnu dɛnbɛ wo, ka kɛlɛ-den-dandenu dɛnbɛ wo, wo damasi kelen ile yala. Woletɔ, mata Mari Alla, i yandi, ma dɛnbɛ. Ma ye ma yigi sala ile rɔ. Ma ara na kɛlɛ-den-siyamɛ kɛnu kɛlɛ tinɛ ile tɔgɔ rɔ. Mari, mata Alla le ile la. Mɔgɔ-wo-mɔgɔ ti ke ile nɔla.”

¹² Mansa Esa anubɛ ala kɛlɛ-dannu ya kɛlɛ dabira wati min, Mari ya Sudan kɛnuna kɛlɛ-dannu nɔ anu ye. Anu ya anu buri anu kɔrɔ.

¹³ Esa anubɛ ala kɛlɛ-dannu ya anu sagaran ha Kirari soe. Anu ya Sudan kɛnuna kɛlɛ-den-siyaman faga ha a toenu ma ke anu kundɛnna anu kɛlɛ-koe la tun. Mari anubɛ Yuda kɛlɛ-dannu ya anu nɔ. Anu tara anu bolo-fen-siyaman na anu bolo.

¹⁴ Anu ya anuna so-siyaman tinya Kirari soela foolɛ rɔ bawo nyɔ-mɔgɔ-siyaman kilannɛ Mari la kumakɔɛ bolo. Yuda kɛlɛ-dan wonu tara fen-siyaman na anu bolo ka bɔ soe kɛnu tɔ.

¹⁵ Wo kɔma, anu ya saga-kandannɛ donuna dagɛnu bira-a-la ka anuna sagɛnu anubɛ anuna nyomɛnu bi anu bolo ka ta anu na anu bolo Yerusalɛm pon!