2 Ko-Kɔrɔta-Karan 11 - ALLALA KUMƐ

Nɛbi Sɛmayata Wɔlɔyiya-Kumɛ Wara-Koe

¹ Mansa Rihobowami ke Yerusalɛm soe burɔ, a ya kɛlɛ-den-kɛndɛ mɔgɔ waga kɛmɛ kelen ani mɔgɔ waga bi-segin (180,000) kundɛn ka bɔ Yuda anubɛ Bɛnyamɛ bɔnsɔn rɔ. A ya wonu nadɛn de alako ka ta Isirɛla mɔgɛ wonu kɛlɛ minnu siginɛ kantɔ-wara la bawo a sɔgɛ ye a la, wonu ni taran a kɔrɔ tun.

² Kɔnɔ Alla ya a fɔ Nɛbi Sɛmaya ye ko

³ a ni ta a fɔ Mansa Rihobowami anubɛ Yuda anubɛ Bɛnyamɛ bɔnsɔn-mɔgɛnu ye ko

⁴ anu kana ta anu na-kelen-nyɔgɛ Isirɛla mɔgɛnu kɛlɛ. A ko anu ni sɛgi anu barɛ. Koe min bɛɛsi ara ma kɛ la, ale Mari sako le wo la. Nɛbi Sɛmaya tara Mari kuman-kan wo latenbi anu ma tumɛ min, anu damasi sɛgira anu barɛnu tɔ.

Tarɛ Mini-Koe Soenu ma Mansa Rihobowami Bolo

⁵ Ale Mansa Rihobowami tora sigini Yerusalɛm soe burɔ. A ya tarɛ mini soe donu ma Yuda anubɛ Bɛnyamɛ nyamanɛnu tɔ.

⁶ A ya tarɛ mini soe minnu ma, wonu tɔgɛ le kɛnu na, Bɛtalehɛm wo, Itam wo, Tekoya wo,

⁷ Bɛti-Suri wo, Sɔkɔ wo, Adulam wo,

⁸ Kati wo, Marasa wo, Sifi wo,

⁹ Adorayim wo, Lesi wo, Asika wo,

¹⁰ Sora wo, Aiyalɔn wo, anubɛ Hiburɔn.

¹¹ A ya tarɛ wonu sɔ fanka rɔ ka kurugba kelen-kelen sigi soe wonu kun na. A dɔn-fan wo, a ɔlifi-tuli wo, a nɔnbɔ-gbɔ-yi wo, a ya wonu namara mɔgɛnu ye soe wonu tɔ.

¹² A ya soe wonu ma kɛlɛ-mirannu namara tinɛnu na alako Yuda anubɛ Bɛnyamɛ nyamanɛnu si to ata marɛ kɔrɔ nya min.

Lifayinu anubɛ Saraka-Masɔlɛnu Na-Koe Yuda Nyamanɛ Rɔ

¹³ Saraka-masɔlɛnu anubɛ Lifayi minnu siginɛ kantɔ-mɔgɛnu tɛma, wonu bɔra Isirɛla nyamanɛ wo rɔ ka na kofu Yuda kɛnu ma.

¹⁴ Anu ya anuna bɔnnu anubɛ anuna kolo-fen de-nyini-tinɛnu boloka ka ta Yuda nyamanɛ anubɛ Yerusalɛm soe burɔ bawo Isirɛla Mansa Yɛrabowami anubɛ ala dannu ma sɔn anu ni anuta saraka-masɔ-wɔlɛ kɛ Mari ye.

¹⁵ Ale Mansa Yɛrabowami ya ata saraka-masɔlɛnu yabɔ a nyɛrɛ ye alako wonu ni to sarakɛnu bɔla Alla-batobɛlɛnuna kɔ tinɛnu tɔ anubɛ nyinɛnu anubɛ bɛsɛnu ye, a ya minnu nadan tura-danla muninyɛ la.

¹⁶ Isirɛla mɔgɛ minnu duruta anu benba Isirɛlata Mari Alla-batoe la, wonu bilara Lifayinu fɛ ka na Yerusalɛm soe burɔ ka bɔ kantɔ-mɔgɛ wonu tɛma alako ka sarakɛnu bɔ anu benbanuta Mari Alla ye.

¹⁷ Wo le ya a ma, Yuda nyamanɛ tora fanka rɔ. San sawa dɛgɛdɛgɛ, mɔgɔ-burunɛ kɛnu bi Mansa Rihobowami fɛ gben! Anu tora ata sɛnbɛ kɔrɔ iko anu tora Mansa Dawuda anubɛ Mansa Silamɛni kɔrɔ nya min.

Mansa Rihobowamita Denbayɛ Wara-Koe

¹⁸ Mansa Rihobowami ya Mahalati furu. Mahalati kɛ fa le Mansa Dawudala den Yɛrɛmoti la. Mahalati kɛ na le Abiheli la. Abiheli fa le Yɛsila den Ɛliyabu la.

¹⁹ Mahalati kɛ ya den-kei mɔgɔ sawa sɔrɔn Mansa Rihobowami ye, Yewusi anubɛ Sɛmaraya anubɛ Seham.

²⁰ Wati tenbinɛ, a ya Abasalɔmta den Meyaka furu. Anu ya den-kei mɔgɔ nani sɔrɔn, Abaya anubɛ Atayi anubɛ Sisa anubɛ Sɛlomiti.

²¹ Ale mansɛ ya musi min furu ka yɛ, mɔgɔ tan-ni-segin anubɛ fɛ-sigi-musu mɔgɔ bi-wɔrɔ. A ya den-kei mɔgɔ mogan-ni-segin sɔrɔn anubɛ dunmusi mɔgɔ bi-wɔrɔ. Ala musinu anubɛ ala fɛ-sigi-musinu tɛma, a ya Meyaka ma a bara-musi la.

²² Ala den-keinu tɔ, Abaya di a ye anu dama ko. A ya a bole sɔ wo la ko ni ale sa tumɛ min, wo le ye tola a gbɛ rɔ mansayɛ la.

²³ Ale Mansa Rihobowami bɔra hɛnkilimaya-koe do la ka ala den-keinu sigi soe donu kun na Yuda anubɛ Bɛnyamɛ so-latankanɛnu tɔ. A ya dɔn-fen-siyaman di anu ma ka musu siyaman furu anu ye.