THEU NAI 20 - Khumi Common Language Bible

Leusai Horei pei nai

¹ Tameuh my,

² “Kai ly nangchi ai miseaung achei nai, Aikupta pri i dengdairei pahawi nai keung nangchi i Areng Tameuh ne.

³ “Kai ny y baly tameuh takhra y chiu moh.

⁴ “Kani khusangra i heng nai amjy, khaileaung salo i heng nai amjy, khaileaung anui tui theung i heng nai amjychi ka-tawm mynchi ly nangmychi i vui so u moh.

⁵ Kai ly nangchi i Areng Tameuh ne i, mani myn ai py chiu u moh. Hunai deaungkho y myn ai lu meung u moh, chiu py chiu u moh. Kai ai niu ngai y nai keungchi ai ly nichi i katu chanauchi tlang tleaung y, deung thom deung palyh khrairei kapajeng ai.

⁶ Na i py kai ai tamen iy kai i reita patawm nai khumichi ai ly deung kangthau sang ho khrairei katamen ai.

⁷ “Kai i amyn thui rumrang moh; kai ly nang i Areng Tameuh ne i, kai i amyn thui rumrang nai khumi ai ly kapajeng ai.

⁸ “Anawn kani y ja ai nai tami reng moh. Huni kani ai ly kachai khai takhra ai nai tla.

⁹ Nang ly kani tariurei sala y, sa ai avo nai kalopchi sa ai nai tla;

¹⁰ Saryh kani ly Tameuh i vui khai takhra nai anawn nai kani ne. Huni kani y ly nangmy hawi nang i cho chanauchi, miseaungchi, tawnbawichi, angvynchi py kalop sa ai nai avo y.

¹¹ Kai Areng ly kani tariurei sala y my kani khusang, khaileaung, pangli hawi huni theung y awm nai cheaungkhangchi ai sa iy saryh kani y anawn nai ne. Naibaly Areng my huni Anawn nai kani ai ly amtheaung hai iy kani kachai palawn bo.

¹² “Nang i Areng Tameuh my pei nai pri y heng sau ai nai, nang i amhm, ampo ai tahm khai.

¹³ “Khumi ai padei moh.

¹⁴ “Pajang so moh.

¹⁵ “Paviu moh.

¹⁶ “Amichi ai ka-chawi naimy seu rumrang moh.

¹⁷ “Ami i yhm hlau paleung no moh; ami i aju py, miseaungchi ai py, tawnbawichi py, keaungngo kano kasauchi py, mymy i atitichi py paleung no moh,” napi.

Khumichi i jei nai

¹⁸ Khumi mipuichi ly kani pajyh nai katyn, baw eng nai katyn hawi amlosadi theu nai, mawi verei mai khyh theu naichi ai niu nai, thai nai khala jei hyn u i, kamlo mang y angdo u bo.

¹⁹ Nichi my Mosi teng y, “Nangmy kaichi teng y Areng i leu pei nai amti pi ba, kaichi tangai ai mang; na i py Tameuh kypkyp my kaichi teng y leu pei lawh baly kaichi ly dei ai,” napi.

²⁰ Naibaly Mosi my, “Jei u moh; nangchi ai cham ai nai py, nangchi ly mymy i leu tangai iy kamngo so y ai nai py, Tameuh ang jeu nai ne,” nanai pathang.

²¹ Na i py mipuichi ly kamlo kyh y angdo u jo rai. Mosi naini Tameuh awm nai tamai kaveng sahawi y chei tapai khyh nai ne.

Maicham i vui Reitachi

²² Areng my Mosi dengdairei Israelachi teng y thui pi nai ly “Kai, Areng ly kani mang dengdairei nangchi teng y leu pei nai nangchi pany u bo.

²³ Nangchi ly kai ai naini chiu ai nai tla khyh; nangmychi i vui muku, tangkachi hawi tameuh mynchi sa iy chiu u moh.

²⁴ Apathyp ai nai vui y khaileaung hawi maicham sa ai nai tla; huni maicham salo y nang i beram, si, mi-i tawnbawi bom verei ai py, leunghawi kapathypra py, leng patlum ai nai tla. Kai ai chiu ai nai khai takhra nai meingtym tleirei y kang jeu iy amtheaung hai ai.

²⁵ Nangchi ly kai i vui lengseaung hawi maicham sa baly, si nai lengseaung hawi so moh; tamo hawi si nai lengseaung maicham ly chai y i, kai i vui y teaung ngau y nai ne.

²⁶ Maichamra y kheubyn so moh; sa lawh baly, nangchi maicham tleaung y lyn nai khala tlang ka-keu awm nai niu ai.