TARA CHIH NAI KEUNGCHI 9 - Khumi Common Language Bible

Abimelek

¹ Kideon i chapo Abimelek ly Sekhem mary y awm nai, amhm mang i amjo amnauchi teng y chei iy, mary i khumichi teng y,

² “Nangchi ly Kideon i chapo leaung vui saryhreichi my peang nai ngai u a? ti y baly khumi leaungrei my peang nai ngai u a? Abimelek ly nangchi i thi ngan kamji ne nanai pany u,” nanai thui hai bo.

³ Ni i amhm mang i amjo amnauchi my py, hini satangchi ai Sekhem mary y awm nai khumichi teng y amti pi u bo. Abimelek ly mychi hawi amjo amnau ka-bi ne nai deaungkho y, Sekhem mary i khumichi ly ni i nithun abang ai nai ngai u nai ne.

⁴ Nichi ly mychi hawi leu maikawm asa nai Bala tameuh achura yhm i, tangkacho vui saryhrei Abimelek teng y pei pi u. Huni tangka hawi ni ly yhm hlau amny y nai khumi leaung vui saryhreichi ai, mymy nithun abang ai nai alai nai ne.

⁵ Hunaibaly Ophra mary y awm nai ampo i yhm y chei iy, Kideon i chapochi, my i amjo amnau leaung vui saryhreichi ai, lengseaung harei salo y padei. Na i py Kideon i chapo kasawi Jotham ly aheu vui nai deaungkho y, deira i nai tleaung bo.

⁶ Naibaly Sekhem mary hawi Bethamilo mary i khumi bawibawichi ly amkawm u iy, Sejhem mary i ka-ma-ra ngopraibiu keung mang y chei iy, Abimelek ai samrang palyn u bo.

⁷ Jotham ly huni satang thai nai khala, Kerizim mawi saleung y lyn kalau i, angdo naimy aeu iy hina nai thui bo; “Nangchi Sekhem mary i khumichi awi, kai i leu tangai u! Hunaibaly Tameuh my nangchi i leu tangai lym ai.

⁸ Jangni y dengkeaung keungchi ly mychi i vui samrang leaungrei vawi ai nai chei u bo. Nichi ly Olive keung teng y, ‘Kaichi i tlang tleaung y samrang so ba,’ napi u.

⁹ Olive keung my, ‘nangchi ai kang peang lawh ai nabaly, tameuhchi i tahm awm nai hawi khumichi i tahm awm ai nai sabawm pi nai, kai i asitui patheu nai ly anawn vui ai nai tla ai,’ nanai pathang.

¹⁰ Huna nai khala dengkeaung keungchi ly thaidu keung teng y chei iy, ‘kaichi i tlang tleaung y samrang so ba,’ nanai takeng u.

¹¹ Na i py thaidu keung my, ‘nangchi ai kang peang ai nabaly, kai ly hawi iy athai katuichi athai nai anawn vui ai nai tla ai,’ napi.

¹² Hunaibaly dengkeaung keungchi ly kreip angjyn keung teng y tym i, ‘nang ly jeu iy kaichi tlang tleaung y samrang so ba,’ nanai takeng u.

¹³ Na i py kreip angjyn keung my, ‘nangchi ai kang peang ai nabaly, kai ly Tameuh i paleung hawi khumi i paleung ai amo theu hai reng nai kreip hang patheu pi nai ly anawn vui ai nai tla ai,’ nanai pathang.

¹⁴ Naibaly dengkeaung keung bawibawichi ly aleng phreung teng y, ‘jeu ly kaichi i tlang tleaung y samrang so ba,’ nanai takeng u.

¹⁵ Aleng phreung my ly ‘nangchi ly kai ai meitang khyp, nangchi i tlang tleaung y samrang sa ai nai ngai hai nabaly, kai i ka-khuira jeu iy abyh u; huna nai abyh y lawh baly kai i changpichi sala mang maikhyh theu iy, Lebanon Seda keungchi ai kang hai pawn ai,’ nanai pathang.

¹⁶ Hunaibaly Jotham my thui bi nai ly “Naibaly nangchi ly Abimelek ai samrang palyn naira y meitang khyp, paleung hawi naimy ka-ym awm nai khumichi ne a? Nangchi ly Kideon i kahawi sa naichi pany jo iy, ni i sa pi nai saichi hawi amlau pa-rei, ni i dengtheungchi ai, kahawi sa pi u teang ai a?

¹⁷ Kai i ampo ly nangchi i vui tavai tiu pi nai py, mymy i tlang areu iy nangchi ai Midian chengchi teng i, atleu pi nai py pany u jo ba.

¹⁸ Na i py nangchi ly vaini my, ni i dengtheungchi ai ka-awi sa u lawh bo. Ni i chapo leaung vui saryhreichi ai, lengseaung harei salo y padei u veng bo. Miseaungnu hawi nga nai chapo Abimelek ly nangchi i amjo amnau lawm nai hawimy, ni ai nangchi my samrang palyn u bo.

¹⁹ Naibaly Kideon hawi ni i dengtheungchi ai, vaini nangchi sa u nai kalop ly paleung kahawi ne baly, nangchi ly Abimelek hawi vanrei amo theu u na sy.

²⁰ Na i py hini kalop ly teng y nai kalop ne lawh teu baly, Abimelek teng i mai kadeu theu iy, Sekhem mary hawi Bethamilo mary i khumichi ai kang hai na sy; Sekhem mary hawi Bethamilo mary khumichi teng i py mai kadeu theu iy, Abimelek ai kang hai sy,” napi.

²¹ Naibaly Jotham ly amjo Abimelek ai jei nai deaungkho y preang i, Beera mary y chei iy hu y awm vui bo.

²² Abimelek ly Israela pri y saneng thomrei peang.

²³ Hunaibaly Tameuh my Abimelek hawi Sekhem mary i khumichi ai khrukhra hai nai deaungkho y, nichi ly Abimelek ai tiu u bo.

²⁴ Hina nai kamta tym nai ly Kideon i chapo leaung vui saryhreichi ai padei ai nai atho pei nai, Sekhem mary i khumichi hawi Abimelek ai, kamngo vang heung teang nai ne.

²⁵ Sekhem mary i khumichi ly Abimelek ai kangviu y tiu ai nai, mawi saleung y tamcheaung khai u; tamcheaungchi ly chei kathiu, chei kalau nai khumichi i vawnsaichi lawm u bo. Huni satang ai Abimelek ly thai nai ne.

²⁶ Huna nai khala Ebed i chapo Ka-la ly my i amjo amnauchi hawi Sekhem mary y tym; Sekhem mary i khumichi my ly ni ai ym u nai ne.

²⁷ Nichi bawibawi ly kreip akhochi mang y chei u iy kreip athaichi jaw i, kreip hang sa chum baly, amo theu nai pawi harei sa u. Nichi ly mychi i tameuh yhm mang y chei u i, cha nei iy Abimelek ai panui hai u bo.

²⁸ Ka-la my, “Achi Sekhem mary i khumichi ly ati mana nai khumichi mo? Achi ly Abimelek i miseaung y awm u lawh mo? Ni ly ami mo? Ni ly Kideon i chapo ny y lawh a? Zebula ly ni i leu tangai lawh i py, achi ly ati mana nai ni i miseaung y awm lawh ai mo? Nangchi nupaichi ai palum pi nai keung Hamor tlang tleaung y ka-ym awm u!

²⁹ Kai ly hini khumichi i lu ne lawh teu baly, Abimelek ai palai vui ai. ‘Nang i tavaimichi ai atho pei iy kai ai tiu ba,’ nanai ni teng y kathui ai!” napi.

³⁰ Mary peang nai keung Zebula ly Ka-la i thui nai leu thai nai khala kado theu i,

³¹ savaichi pato i Abimelek teng y, “Ebed i chapo ka-la ly my i amjo amnauchi hawi vanrei, Sekhem mary y tym bo. Nichi ly nang ai mary theung y kun ai nai ang pei u ai ny y.

³² Hunai deaungkho y nang ly nangmy i khumichi hawi vum y jeu iy, daichi theung y aheu ba.

³³ Khawn khutawi kani si nai khala ang thau iy, tlenrei khyhmy mary ai tiu ba. Ka-la hawi ni i khumichi ly nang ai tiu ai nai chei u nai khala, nang ly nangmy i awm naichi hawi tiu ba,” napi.

³⁴ Hunaibaly Abimelek hawi my i khumi bawibawichi ly vum y jeu u iy phy palyhrei phy i, Sekhem mary angam mang y abyh u bo.

³⁵ Nichi ly Ka-la theu iy, mary apai pa-khora angdo nai niu u nai khala, mymychi abyhra i nai theu u.

³⁶ Ka-la ly nichi ai niu i, Zebula teng y, “Khen cham! mawi saleungchi mang, khumichi ang satla kathiu lawh ly!” napi. Zebula my, “Hunichi ly khumichi ny y leang, mawichi i pa-puichi teu,” napi.

³⁷ Ka-la my ly “Khen cham! mawi i dengdairei khumichi satla u bo; khumi phyrei ly amo sara i ngopraibiu keung lam mang ang jeu u dudu bo! " napi bi.

³⁸ Huna nai khala Zebula my, “Nang i leu ali len nai ly vai, ma mang y tym pawn mo? Hini Abimelek i miseaung y achi mana awm u nai mo? nanai thui nai khumi ly nang ny y a? Huni khumichi ly nangmy khumi aniu y na pa-rei thui nai khumichi ne. Vai, nang ly theu iy, nichi ai tiu jau ba,” napi.

³⁹ Ka-la ly Sekhem mary i khumichi ai lu sa iy, Abimelek ai tiu bo.

⁴⁰ Abimelek ly Ka-la ai hui iy tiu; naibaly Ka-la ly angpreng vui bo. Mary katheu pa-kho sahawi y my, khumi neangneangchi ly tamo nga u bo.

⁴¹ Abimelek ly Aruma mary y awm; Zebula ly Ka-la hawi, ni i amjo amnauchi ai Sekhem mary i dengdairei patheu vui i, nichi ly huni mary ai jeu bi ai nai ngo y leang bo.

⁴² Huni bo i kani y Sekhem mary i khumichi ly daichi y chei ai nai ka-dawn awm, nanai Abimelek pany nai deaungkho y,

⁴³ my i khumichi ai phy thom phy iy, daichi mang oh u bo. Mary theung i khumichi theu nai niu baly, nichi ai tleh ai nai abyhra i nai theu bo.

⁴⁴ Huna nai thym khala Abimelek hawi ni i khumichi ly mary katheu pa-kho typ ai nai chei u nai thym y, takhra kamkawm nyhrei nai ly daichi mang i khumichi ai tleh pawn nai ne.

⁴⁵ Atiu nai ly kani khengrei ne; Abimelek ly mary ai nga vui chum baly, mary i khumichi ai padei iy mary apaichi panawi pawn i, palawi hei nai ne.

⁴⁶ Sekhem yhm ka-sangra i miteaung keh bawibawichi ly huni satang thai u nai khala, mymychi leu maikawm asa nai Bala tameuh yhm i, khaw parai nai takun theung y kun u.

⁴⁷ Abimelek ly nichi hu y awm, nanai pany baly,

⁴⁸ mymy i khumichi hawi vanrei, Zalmon mawi mang y kalau iy peuseng hawi dengkeaung changpi harei tameang i apu. Mymy i khumichi ai py, hunai kamta sa u kaliki ai nai leu pei bo.

⁴⁹ Hunaibaly khumi luteng dengkeaung changpi ha harei tameang iy, Abimelek nithun abang u i, khaw parai nai takun ai mai leng u bo. Yhm ka-sang theung i khumi bawibawichi ly dei u bo. Huni khumichi i vuikanai ly neampacho neampachy bawibawi leaung sangrei tahm awm.

⁵⁰ Naibaly Abimelek ly thebe mary mang y chei i, katanmeuh iy nga vui bo.

⁵¹ Mary theung y khaw parai nai yhm ka-sang awm; miteaung kehchi hawi neampacho neampachy bawibawichi ly huni yhm ka-sang theung y kun u nai ne. Nichi ly yhm ka-sang ai katheu kho typ iy, salo sambeu y lyn u.

⁵² Abimelek ly yhm ka-sang ai, tiu ai nai jeu bo. Ni ly yhm ka-sang katheu mai leng ai nai ahihawi nai khala,

⁵³ neampachy leaungrei ly choh nip nai lengseaung harei hawi Abimelek i lu y aphi i lu kawi phiu bo.

⁵⁴ Huna nai khala ni ly my i tavai ateaung syn pi nai thawndeang leaungrei ai palau kaliki i ni teng y, “Nang i haisau aphiu ly kai ai tleh vui jau; kai ly neampachy i kiu y dei, nanai thui nai ngai y,” napi. Hunaibaly thawndeang ly Abimelek ai haisau hawi tleh vui bo.

⁵⁵ Israela chengchi ly Abimelek dei nai satang thai u nai khala, mymychi i yhm mang y vawi u bo.

⁵⁶ Huna nai Abimelek ly mymy i amjo amnau leaung vuisaryhreichi ai tleh nai molam y, ampo i tlang tleaung y kamngo sa nai ne i, Tameuh my pajeng hai bo.

⁵⁷ Kideon i chapo Jotham my pasawi nai kamta Sekhem mary i khumichi py, mychi i hawi y nai molam y, kamngo pajengra avum u nai ne.