TARA CHIH NAI KEUNGCHI 19 - Khumi Common Language Bible

Levi theaung khumi hawi my i aju katheang

¹ Israela chengchi samrang by y rai nai neng khala, Ephraim mawitleaung pri katem mang y awm nai Levi theaung khumi leaungrei ly Juda pri Bethlehem mary i neampachy leaungrei ai, aju katheang palawn ai nai la bo.

² Na i py huni neampachy ly juvo hawi ajo nai deaungkho y, Bethlehem mary y awm nai ampo yhm y ali vui i, hu y lo palyhrei awm vui.

³ Hunaibaly juvo ly ni ai mymy teng y vawi ali teang ai nai chei iy parawi ai nai adawn i, my i keaungngo kano kasau nyhrei hawi, miseaung ai hawi iy chei bo. Neampachy ly Levi theaung khumi ai yhm theung y kun ai nai palau nai khala ampo my niu i, amo theu naimy lamchung bo.

⁴ Ampu my ni ai kam i, ni ly hu y kani thomrei awm. Meaungcha ly huni yhm y cha nei anga iy

⁵ palyh kani khawn angthodyh ang thau i, tako ai nai angvei nai khala y, ampu my meaungcha teng y, “Biu an cho nei ly huni bo y tako ba,” napi.

⁶ Naibaly meaungcha ampu nini ly vanrei ateh hawi iy cha nei hawi bo. Naibaly ampu my, “Vaini py i ly amo theu naimy awm rai,” napi.

⁷ Levi theaung khumi ly ang thau i, tako ai nai tau i py, ampu my anawn ai nai kam nai deaungkho y, huni vum py huni yhm y i bi nai ne.

⁸ Pa-ngo kani khawn angthodyh, hu i nai theu ai nai ang thau nai khala, ampu my ni teng y, “Pahen parai naimy biu an cho rai; kani thun nai ryrei ajeng rai,” napi i, meaungcha ampu vanrei cha hawi bo.

⁹ Ni ly my i aju katheang hawi miseaung ai palau iy tako ai nai enten nai khala ampu my, “Khen cham, kani ka-reu bo; vai tanarei baly veng ryp ai bo; hi y dymrei i iy, amo theu naimy awm rai; khawndam khawn angthodyh phai vawi u,” napi.

^10-11 Na i py Levi theaung khumi ly hu y dymrei i bi ai nai ngai y i, atangra khai yb nai keaungngo kano kasau nyhrei, my i aju katheang hawi vanrei tako amteaung bo. Nichi ly Jerusalem mary napi nai Jebusi mary y tym nai khala ly kani dym ai nai kasa veng bo. Hunaibaly miseaung my yhmkeung teng y, “Jebusi khumichi awm nai mary y achi jei u sina,” napi.

^12-13 Na i py my i yhmkeung my, “Israela cheng ny y naichi i mary y achi anawn ai nai ngai y; mo mang y tako kyh iy Kibeah mary y, ti y baly Ramah mary y i u sina,” napi.

¹⁴ Naibaly nichi ly Jebusi mary katlen vui iy tako veangveang i, Benjamin cheng theaungchi i khu ka-peang theung y awm nai Kibeah mary y tym u. Naibaly kani py avah ryp bo.

¹⁵ Naibaly nichi ly huni mary y jei ai nai mary theung y kun u i, mary katheu pa-kho sahawi i angdymchy ra y ateh u; na i py nichi dymrei jei ai nai ami py palau y.

¹⁶ Huna nai nichi ateh u nai thym y, miteaung pui leaungrei ly hlau y kalop sa naira i, kani dym nai y vawi nai tym. Ni ly Kibeah mary y vai, awm nai ne i py, vaichi khala ly Ephraim mawitleaung meingtym y awm nai khumi ne. (Huni mary y awm nai takhra khumichi ly Benjamin cheng theaungchi ne.)

¹⁷ Miteaung pui ly mary apai katheu pa-kho sahawi i angdymchy ra y angvyn ai niu nai khala, “Nang ly ma mang i jeu nai mo? ma mang y chei ai mo?,” nanai deng.

¹⁸ Levi theaung khumi my, “Kaichi ly Juda pri Bethlehem mary y kachei u chum nai vai, kaichi ly kaimychi i yhm awm nai Ephraim mawitleaung meingtym kangtem mang y vawi teang nai ne; kaichi vaidym anga ai nai ami py palau y.

¹⁹ Kaichi ly kaimychi i keaungngo kano kasauchi i vui chohphi, kai hawi kaimy i aju hawi miseaung i vui teicha teinei hawi kreip hang py awm; kaichi ly ati sai py aly ngai y leang,” napi.

²⁰ Miteaung pui my, “Nang ly kai i yhm y ango ba! kaimy kang kry ai mang; hini adymchy ra vum jei ai nai avo y leang,” napi.

²¹ Hunaibaly ni ly huni khumichi ai, my i yhm mang y hawi iy, nichi i keaungngo kano kasauchi teicha pacho pi; my i angvynchi py kheu asi chum baly, teicha teineichi cha u bo.

²² Nichi ly amo theu naimy awmnem nai thym khala y, mary theung i neampacho kamleaung phyreichi ly yhm katanmeuh iy, katheu atum u; yhmkeung miteaung pui teng y py, “Nang hawi vanrei abang nai khumi ai patheu pi; kaichi ly ni hawi apang ahawi ai nai ngai!,” napi u.”

²³ Na i py miteaung pui ly angam mang y theu i nichi teng y, “Kai i ahawi ngai parai naichi awi, pahen parai naimy hina nai amso ngai nairachi ly so u mo kyh! Hini khumi ly kai i angvyn ne.

²⁴ Khen cham! hi y ni i aju katheang hawi, kaimy i chaniu anglo awm; nini ai kaimy kang patheu pi ai; nini hawi phai nangchi ngai nai kamta so u. Na i py kai i angvyn ai tunatanrei amso ngai nai ly so u moh!,” napi.

²⁵ Na i py huni khumichi ly ni i leu tangai y nai deaungkho y, Levi theaung khumi ly my i aju katheang ai patheu iy nichi teng y au pi i, nichi ly huni neampachy ai vumtorei pahyp y naimy pajang u iy, khutawi khala patleaung nanai ne.

²⁶ Khutawi nai khala neampachy ly juvo awm nai miteaung pui i yhm katheu pa-khora atlym su bo. Ni ly khutawi nai khala py huni meingtym y awm.

²⁷ Huni kani khawn mang y ni i juvo ly khuleaung amsa ai nai ang thau iy katheu paeaung nai khala, my i aju katheaung ly katheu kheutangra y kiu kheang naimy atlym su nai niu.

²⁸ Ni my, “Angthau jau, tako hawi sina bo,” napi i py, sai py pathang y. Hunaibaly ni ly neampachy i veu keaungngo kano kasau tleaung y theng iy, yhm mang y vawi hai bo.

²⁹ Yhm y tym nai khala ly yhm theung y kun hai i, haisau la iy aju katheang i veu ai beang holai nyhrei tameang bo. Naibaly Israela cheng theaung holai nyhreichi teng y beang beangrei pei pi nai ne.

³⁰ Huni leaungsai niu nai khumi bawibawichi my ly “Hina nai saichi ai achi mana khala py niu vai y; Aikupta pri i dengdairei Israela chengchi theu u nai vaini khrairei, hina nai awm vai y. Hunai deaungkho y achi ly hini molam y saisairei sa ai nai tla ai; ati mana sa u ai mo?,” nanai thui u bo.