TARA CHIH NAI KEUNGCHI 16 - Khumi Common Language Bible

Kaza mary y Samson tym nai

¹ Kanirei nai khala Samson ly Philistia chengchi awm nai Kaza mary y tym. Huni mary y neampachy kamleaung leaungrei ai avum i, ni hawi i ahawi bo.

² Kaza mary i khumichi ly Samson tym, nanai thai u nai deaungkho y, huni yhm ai kataingmeuh iy, apai pa-khora y vumtorei ajeng u bo. Nichi i dawn nai ly “Achi ly ni ai khutawi pa-rei ajeng iy padei vui ai,” nanai ne.

³ Na i py Samson ly aneng hyh ryrei i chum baly ang thau iy, mary apai katheu pa-khora i katheu dawn py, katheu chengheng py, atleangra hawi raurei mary apai katheu aphiu vui iy apu vui bo. Hunichi ai ly Hebron mary sahawi i, mawi salo y syn pi vui nai ne.

Samson hawi Delila

⁴ Huni bo y Samson ly Sorek leaunghawira y awm nai neampachy Delila ai khrei bi nai ne.

⁵ Philistia samrang leaung pangreichi ly Delila teng y chei i ni teng y, “Samson ly ati mana nai, hina tanrei atho awm na mo nanai py, ni ai ati mana patiu iy ana thai ai mo nanai py, pany pajau ai nai ni ai parawi hyp iy deng ba. Kaichi my leaungrei y tangkacho sang atlo chungvairei kang pei ai,” napi.

⁶ Hunaibaly Delila ly Samson teng y, “Nang hina tanrei atho ham nai ly ati mana nai y mo? Nang ai ati mana kawm iy pajau ai mo?,” nanai deng.

⁷ Samson my, “Jei y rai nai langvui kangtha saryhrei hawi kai ai kawm baly, kai ly khumi takhrachi kamta, atho di vui teang ai,” napi.

⁸ Naibaly Philistia samrangchi ly langvui kangtha saryhrei syn pi i, Delila ly Samson ai kawm bo.

⁹ Neampachy my ly takhra takun harei theung mang y, khumi phyreichi ai ajeng hai yb i, “Samson! Philistia chengchi ang jeu u bo!,” nanai aeu. Na i py Samson ly huni vuinawnchi ai, mai my kang-by vui nai kalang amai kamta, paleuby vui nai ne. Naibaly nichi ly ni i atho ham nai sai pany pajau y bo.

¹⁰ Delila my Samson teng y, “Khen cham, nang ly kai ai leu kateng thui pi y, kamthu palawn lawh be. Nang ai ati mana kawm pajau ai mo, nanai pahen parai naimy kai ai thui pi kyh, nanai parawi bo.

¹¹ Ni my, “Teaung vai y rai nai vuinawn kangthachi hawi kai ai kawm baly, takhra khumichi kamta atho di vui teang ai,” napi,

¹² Naibaly Delila ly vuinawn kangtha la iy, ni ai kawm cheng bo. Naibaly Delila ly “Samson! Philistia chengchi ang jeu u bo!,” napi. Khumichi ly takun harei theung y ajeng u nai ne. Na i py Samson ly my i kiubanra kawm nai vuinawnchi ai, kalang amai kamta paleuby vui nai ne.

¹³ Delila my Samson teng y, “Nang ly kai ai thui pi y naimy kamthu palawn bi bo; nang ai mana kangkawm ai mo? nanai kai ai thui pi ba,” nanai parawi bi bo. Samson my ni teng y, “Kai i sam palawn saryhrei ai pe ra y aneng hai cheng iy, thengbeang kamsui hawi tahen hai thleng baly, kai ly takhra khumi kamta atho di vui teang ai,” napi.

¹⁴ Huna nai khala Delila ly i ai nai ni ai parawi i, i hai nem bo. Ni i sam palawn saryhrei sa i, pe ra y aneng hai cheng iy tahen hai thleng bo. Naibaly, “Samson! Philistia chengchi ang jeu u bo!,” nanai aeu; Na i py Samson ly i anglaw i, my i sam ai pe ra i nai ajiu vui bo.

¹⁵ Naibaly Delila ly ni teng y, “Nang ly kai ai khrei y pui naimy, kai ai khrei nanai mana thui pajau ai mo? Nang ly kai ai kamthu palawn nai tlen thomrei awm bo. Nang ly atho awm nai sai, vai khrairei thui pi y veangveang lawh rai ly” napi.

¹⁶ Neampachy my kani tleitleirei deng veangveang i, ni my huni leu deng bihang nai molam y, paleung akawm na bo.

¹⁷ Hunai deaungkho y kangkhym y ly “Kai i sam ly tlenrei py avau vai y; kai ai tapen khyp khala i dengdairei, naziri khumi lawm ai nai Tameuh teng y au nai ne. Kai i sam vau vui lawh baly kai ly atho jum ai i, takhra khumichi kamta atho di vui teang ai,” nanai kateng khyp thui pi bo.

¹⁸ Huna nai leu kateng khyp thui, nanai Delila pany nai khala ly Philistia samrang teng y khumi pato i, “Hini tlenrei jeu u teang bi rai ba; kai ly Samson teng i leu kateng nga bo,” napi. Naibaly nichi ly tangkachi syn iy jeu u bo.

¹⁹ Delila ly Samson ai my i phai tleaung y pa-i chum baly khumi leaungrei ai palau iy, Samson i sam palawn saryhrei ai vau hai vui bo. Naibaly Samson teng y atho by y leang bo i, Delila ly ni ai ana amteaung nai ne.

²⁰ Ni ly Samson! Philistia chengchi ang jeu u bo! nanai aeu. Huna nai khala Samson ly ira i nai ang thau iy, angchei khala i kamta ly vai py mymy lawm teang lym ai, nanai athang khai; mymy ai Areng my khai su veng bo, nanai pany y.

²¹ Philistia chengchi my py ni ai patiu iy, ni i meihmchi tha pi piu vui bo. Ni ai ly Kaza mary mang y pahawi i, kheupaja sengkry hawi pakheng iy, theaung theung y choh deng hai.

²² Na i py ni i sam ly sai i, sau kyh ryhryh teang bo.

Samson dei nai

²³ Philistia samrangchi ly mychi i tameuh Dakon teng y apathyp ai nai hawi, eaung pawi sa ai nai akachu u. Nichi my, “Achi i tameuh ly achi ai, amychi i paleung ka-e Samson i tlang tleaung y eaung hai bo,” nanai khulym thui u.

^24-25 Nichi ly khri pa-rei amo theu u i, “Samson ai jeu hai u, ni ly achi ai amo theu hai na sy,” nanai thui u bo. Nichi ly Samson ai theaung theung i nai patheu u iy, mychi ai amo theu hai bo. Ni ai yhmmawmchi sala y angdo hai. Khumichi my ni ai niu baly, “Achi i tameuh ly achi i pri ai phra hai iy, achi i khumi neangneangchi ai padei nai paleung ka-e i tlang tleaung y achi ai eaung hai bo!,” nanai mymychi i tameuh ai palo u bo.

²⁶ Samson ly mymy ai pahawi nai deaungdi teng y, “Yhmmawm puichi ra y kai ai amkhaw hai ba; hunichi ra anghawi ai nai ngai,” napi.

²⁷ Huni yhm pui theung y ly neampacho neampachychi kawi nanai ne. Philistia samrang leaung pangreichi py, huni yhm pui theung y awm u. Neampacho neampachy bawibawi leaung sang thomrei tahm awm nai khumichi ly yhm pui amphu salo mang Samson i lam nai khen u nai ne.

²⁸ Huna nai khala Samson my, “Aw salo kangteng Areng, kai ai pany jo kyh ba; pahen nai Tameuh; kai i meihm nyhrei thapiu veng nai molam y, Philistia chengchi ai tlenrei khyhmy, vawitheung tha pajau ai nai kai ai hini tlenrei, atho pei ali teang kyh ba,” nanai chiu sa bo.

²⁹ Naibaly Samson ly yhm pui sala i yhmmawm pui nyhrei ai kiu nyhrei hawi amkhaw iy nui i,

³⁰ “Kai ai Philistia chengchi hawi vanrei dei ai nai pei ba,” nanai aeu. Ni ly athorei my atho patheu keng iy nui nai deaungkho y yhm pui ly samrang leaung pangrei hawi vanrei, khumi awm nai ngiereichi salo y anawi hai bo. Samson ly dei en nai neng khala y my i padei nai khumi vuikanai ly heng thym khala padei nai khumi vuikanai tleaung y nawi keh nai ne.

³¹ Samson i amnauchi hawi takhra yhm dengtheungchi ly jeu iy ni i veu la u i, Zorath mary hawi Esatola mary sala i, ampo Manon tapreaung y up bo. Ni ly Israela chengchi ai saneng apomrei lu sa pi nai ne.