TARA CHIH NAI KEUNGCHI 15 - Khumi Common Language Bible

¹ Neng kra kyh iy choh tyn nai neng tym nai khala, Samson ly mi-icho harei syn naimy aju teng y pavai ai nai chei. Ni ly neampachy i ampo teng y, “Kai ly kaimy aju i takun mang y kun ai nai ngai,” napi. Na i py ampo my kun ai nai pei y.

² Ni my Samson teng y, “Nang ly kai i chaniu ai khrei y leang bo, nanai athang khai nai deaungkho y, ni ai ly nang i ahawi teng y kapei veng bo. Na i py ni i amnau ly mo-cha hawi keh; ni i jeng y huni anglo ai nang la pajau mang,” napi.

³ Samson my, “Philistia chengchi ai hini tlenrei kai i sa nai molam y, kai ai hawi y nai pany u y leang!, nanai thui iy,

⁴ ni ly theu jo i, khiva chungvai thomrei patiu; khiva nyhrei i tamai patawm iy thang nai sala y maiteaung thang bo.

⁵ Naibaly maiteaungra y mai pateu iy, Philistia chengchi i li mang y patleaung jo bo. Hina nai hawi my ni ly tyn chum nai choh khyh chang y, tyn y rai nai chohchi raurei mai y kang hai bo. Olive akhochi py mai y kang pawn nai ne.

⁶ Hini ly ami my sa nai mo, nanai Philistia chengchi ly adeng ahui nai khala, Timnah mary i ampu ly Samson i aju ai Samson i ahawi teng y pei vui nai molam y, Samson my hina nai sa nai ne nanai pany u. Huna nai y nichi ly huni neampachy hawi ampo i yhm ai mai leng vui bo.

⁷ Samson ly Philistia chengchi teng y, “Nangchi ly hina nai sa u lawh bo i, kai py nangchi ai vawitheung kangtha teang y ryrei ly kai anawn py y leang nanai kai vaineng abeu!” nanai thui iy,

⁸ nichi ai athorei my tiu. Ni ly khumi neangneangchi ai padei chum baly, Etam lengseaung tapiu theung y awm vui bo.

Samson my Philistia chengchi ai pajau nai

⁹ Philistia chengchi ly Juda pri y chei iy tai u i, Lehi mary ai tiu u bo.

¹⁰ Juda pri i khumichi my nichi teng y, “Nangchi ly kaichi ai ati mana nai tiu u lawh mo?” nanai deng i, nichi my, “Samson my kaichi ai sa nai kamta sa teang ai nai molam, ni ai patiu ai nai kang tym u nai ne,” nanai pathang u bo.

¹¹ Huna nai khala y Juda pri i khumi leaung sang thomreichi ly Samson awm nai Etam lengseaung tapiu y chei i ni teng y, “Philistia chengchi ly achi ai angpeang nai ne, nanai nang ly pany y nai sai a? Nang ly kaichi ai mana sa hai lawh mo?,” napi. Ni my ly nichi teng y, “Nichi my kai i tlang tleaung y sa nai kamta, kai py sa teang nai teu,” nanai pathang.

¹² Nichi my Samson teng y, “Kaichi kang tym nai ly nang ai kawmrang iy, huni khumichi teng y au ai nai ne,” napi u. Samson my nichi teng y, “Nangchi my kai ai padei y leang, nanai leu adeu u,” napi.

¹³ Nichi my, “Hawi mang, kaichi ly nang ai kawm iy nichi teng y au ai; nang ai kaichi my kang padei y leang mang,” nanai leu adeu u bo. Naibaly nichi my Samson ai vuinawn kangtha nyhrei hawi kawm u nai bo y, lengseaung tapiu i nai hawi u ali teang bo.

¹⁴ Lehi meingtym y tym nai khala, Philistia chengchi ly aeu naimy ni teng y angpreng u. Areng i sa thai naira ly tlenrei khyhmy Samson teng y atho ham hai nai deaungkho y, ni ly my i kiuchi ai kawmcheng nai vuinawnchi ly mai my kang nai kalang amai kamta, leuby hai vui nai ne.

¹⁵ Naibaly ni ly jangvai my dei nai keaungngo kano kasau i kajai hiu harei niu i akhui iy, huni hawimy khumi leaung sangrei ai padei bo.

¹⁶ Huna nai y Samson ly “Keaungngo kano kasau kajai hiu hawi, khumi leaung sangrei ai kapadei; Keaungngo kano kasau kajai hiu hawi veuchi pakheng chup hai bo,” nanai khulym thui nai ne.

¹⁷ Huni bo y ni ly keaungngo kano kasau kajai hiu ai aphi vui. Hina nai leaungsai tym nai meingtym ai Ramath Lehi, nanai palau u bo.

¹⁸ Naibaly Samson ly khri pa-rei tui ahai i, Areng teng y, “Hini eaung nai pawi pui ai nangmy kai ai pei bo; vai, kai ly tui kanghai y dei ai bo a? Tameuh by y nai hini Philistia chengchi kiu y, kai ai patiu hai ai bo a?,” nanai chiu sa.

¹⁹ Huna nai khala y Tameuh ly Lehi meingtym khaileaung thiukau naira y am-i hai i, tui theu bo. Samson ly huni tui nei i, khesere teang bo. Hunai deaungkho y huni tuino ai Hakonanai amyn pathi i, vaini khrairei Lehi meingtymra y awm nai ne.

²⁰ Samson py Philistia chengchi my peang nai neng khala y Israela chengchi ai saneng apomrei lu sa.