Solomon i khulym 7 - Khumi Common Language Bible

Neampacho

¹ Nang ly khri pa-rei lyh ai hawi nai neampachy ne lawh ly! Vuinawn ka-pi phainai amchiu nai nang i kheuchi ly khri pa-rei apu parai. Nang i phai tangkengchi ly myn sa kawp nai keung i kupe lasa hawi atawm.

² Nang i laileung ly mui katui padeung yb nai kreip hang khau hawi atawm. Nang i kajeu ly jeupawm pauchi hawi ka-pu sa nai chohpui chomaw pau peung mang nai hawi atawm.

³ Nang i paleung kangthai ly sikhi cho kamphi hawi py, sisiu nyhrei hawi py atawm nai ne.

⁴ Nang i kaneaung ly kasai nuh hawi sa nai lengseaung yhm hawi atawm. Nang i meichi ly Hesabon mary pui katheu pa-kho sahawi i tuisampumchi hawi atawm. Nang i notareang ly Damaska mary pui ai ama hai nai Lebanon yhm ka-sang hawi atawm.

⁵ Nang i lu ly Karamela mawi ka-sang kamta asang hyp bo. Nang i khui nai sam ly khawitangeung kamta sadi iy, samrang ai malawn py meicho num hai pajau nai ne.

⁶ Nang ly khri pa-rei mo-cha hawi parai; khrei ai hawi parai nai mo-cha hawi angym nai ne.

⁷ Nang ly chamleaung keung kamta apu parai iy, nang i paleung kangthaichi ly chamleaung athai phrawnchi hawi atawm nai ne.

⁸ Kai ly chamleaung salo y lyn iy athaichi jaw ai. Nang i paleung kangthaichi ly kreip athai phrawn hawi py, nang i taho nai ali ly apple athai mui amseaung nai hawi py,

⁹ nang i labeaung ly tuikeh nai kreip hang hawi py atawm, nanai kai athang khai. Huna lawh baly huni kreip hang ly kai i khrei nai nang i labeaungteng hawi, hochi sala i nai tao aleaung mang hawihai palai leaung jo sy.

Neampachy

¹⁰ Kai i khrei nai keung ly kai ai peang, ni ly kai ai kadeaung naimy awm bo.

¹¹ Kai i paleungjyn y khrei nai keung awi, jeu jau ba; li prangchi mang y chei hawi sina, avangchi theung y vum jei hawi sina.

¹² Ani ly khawn angthodyh ang thau iy, kreip keungchi pau mo, pau y mo, nanai py, pauchi angdai mo, angdai y mo, nanai py, thaitleung keungchi pau mo, pau y mo, nanai py khen hawi sina. Huni meingtym y nang teng y kai i khrei nai kang pei ai.

¹³ Nang ly khuma athai mui amseaung nai pany ai nai ne. Ani i takun katheu pa-kho sahawi y tui parai nai thengthai athai cheaungkhang awm. Paleung jyn y khrei nai awi, kaimy nang i vui thengthai athai cheaungkhang pateung achu pi bo.