Leu Thui Nai 32 - Khumi Common Language Bible

¹ “Kani khusang hawi khaileaung bom vereichi awi, kai i thui nai ngiereichi ai hawihai palai tangai.

² Kai i patiu pi naichi ly kani amai kamta tla iy, khaileaung salo y kadam amai kamta angdeang ai. Kai i leu ly keung dichychi tleaung y kani nai hai nai kamta py, acha tleaung y kani nai hai sym nai kamta py lawm ai.

³ Kai ly Areng i amyn palo ai; mymy i khumichi my ly mymy i nang parai nai sai thui u ai.

⁴ “Areng ly nangchi ai ama hai nai keung ne; mymy i sa nai ngiereichi ly angym iy hawi parai. Nangchi i Tameuh ly ka-ym awm nai hawi leu meitang py ne; mymy ly apu parai nai hawi, hawi parai nai Tameuh py ne.

⁵ Na i py nangchi ly ka-ym by y, mymy i khumi lawm ai nai py ataing y, kamngo kawi nai hawi li-tapawp nai khumi cheng theaungchi ne.

⁶ Cheng naira by y iy khumi ka-khumchi awi, Areng ai hina nai kamta sa ai tla nai a? Mymy ly nangchi ai sa nai keung, nangchi i ampo, mymy ly nangchi ai khumi cheng harei ang lawn hai bo.

⁷ Lawn veng nai jangni i deung ai pany u, atitichi tym nai saichi ngamhm ngampochi teng y deng u. Saneng len nai miteaungchi teng y jangni i satangchi deng u.

⁸ Salo kangteng keh Tameuh ly pri tleirei i khujyhchi py, khumi cheng neangneangchi awm ai nai prichi py khujyh patleh pi. Pri tleirei y kani pri amtaw thau naichi khai pi takhra bo.

⁹ Na i py Jakob i kangpreangchi ai, mymy i vui y vawi takhra bo.

¹⁰ “Mymy ly nichi ai ali ho nai daichi ka-vym theung y amki ryry nai niu baly, mymy i cho chanau kypkyp kamta nichi ai hawihai palai kry nai ne.

¹¹ Ahmtlau ly chochi ai akheang nai patiu pi nai khala, mymy i pakhichi kadai iy dawmkhawn pi nai kamta, Areng y Israela chengchi ai pahawi nai ne.

¹² Cheng takhra tameuhchi i kasabawmra lo y naimy, Areng mymy tlairei naimy, mymy i khumichi ai pahawi bo.

¹³ “Mymy ly mymy i khumichi ai mawitleaung prichi peang hai iy, li hlauchira i theu nai amti amjangchi cha hai bo. Nichi ly lengseaung ka-kochira i khawi hang py, leungchip khaileaung y prau nai olive keungchira i asituichi py nga u nai ne.

¹⁴ Nichi i sichi, mi-ichi my kanu tui neangneang nga hai; nichi ly ti hawi keh nai sichi, beramchi hawi mi-ichi awm iy, lym patyp nai chohpui hawi, hawi keh nai kreip hang py cha nei ai nai nga u bo.

¹⁵ “Areng i khumichi ly nang ra nang ra nai ne, na i py tiu u lawh; nichi ly veung tlang hawi u, teicha teinei kajeu kawi pa-rei cha ai nai nga; mychi ai sa nai keung Tameuh ai khai su iy, sa thai naira awm nai keung ai hi u vui bo.

¹⁶ Nichi ly tameuh mynchi ai chiu nai kamngo molam y, katakhosi nai Areng ai kado theu hai bo.

¹⁷ Nichi ly amsi pajochi chiu vai y nai, Israela chengchi ahihawi vai y nai, tameuh takhrachi teng y apathyp u lawh.

¹⁸ Nichi ly sa thai naira awm nai atleu keung, mymychi ai hengra pei nai keung Tameuh ai tami u vui bo.

¹⁹ “Areng my hunichi niu nai khala kado theu i, mymy i cho chanauchi ai khai su bo.

²⁰ Areng my, ‘Hini khumichi ly paleung tang iy, ka-ym by y naichi ne; kai ly nichi ai kasabawm y leang bo,’ ‘Naibaly nichi ati lawm u na mo, nanai kakhen cham ai.

²¹ Nichi i tameuh mynchi hawimy kai ai kado ang theu hai bo; nichi i tameuh tatang ny y nai hawimy kai ai takho ang si hai. Hunai deaungkho y aso ami y nai khumi cheng lawm hai nai hawimy nichi ai kado theu hai ai. Cheng y nai khumi cheng lawm nai hawimy, nichi ai takhosi nai paleung tym hai ai.

²² Kai i kado theu nai ly mai kamta angveaung ai i, khaileaung tleaung y awm nai ngierei kang hai ai. Kado theu nai mai kangveaung ly tavau pri khrairei py, mawi kheutang khrairei py kang hai ai.

²³ “Kai ly nichi ai pajeng nairachi avum hai aninau ai. Kai i thailiho chynchi khei be na pa-rei nichi ai kako ai.

²⁴ Nichi ly kajeu kanglam hawi keaung nosora dei u ai; ka-jei awm nai no-na hawimy dei u bebe ai. Mawi kasichi ly nichi ai kei ai; pavui kangsochi my nichi ai patiu ai.

²⁵ Tavai takai deaungkho y khumichi ly lamchira dei u ai; yhmchira y ka-jei awm naichi avum ai. Thawndeangchi anglochi py dei u ai; deaungdicho kanu nei thym naichi hawi miteaung maichochi py tleaung y ai.

²⁶ Kai ly nichi ai katamyh keng ai i, khumi ami py nichi ai pany jo ai ny y leang bo.

²⁷ Na i py nichi i paleung ka-echi ly mymychi i haiho saho y kai i khumichi ai eaung nai ne, nanai amlyh am-e ai nai kapei ai ny y.’

²⁸ “Israela khumichi ly tau by y iy cheng naira pipi by y nai khumi cheng ne.

²⁹ Nichi ly ati mana nai y tavai sum u nai mo, nanai pany u y; ati mana nai deaungkho y mo, nanai py dawn pajau y.

³⁰ Khumi leaung sangreichi ai leaungrei my, khumi leaung meaungkateaungreichi ai leaung nyhrei my ati mana nai tiu pajau nai mo? Nichi i Areng Tameuh my nichi ai khai su nai deaungkho y, nichi i ati cheaungkhang sa thai nai Tameuh my nichi ai sum hai nai deaungkho y ne.

³¹ Nichi i paleung ka-echi ly mymychi i tameuhchi atho jy iy, Israela chengchi i Tameuh kamta sa thai naira len y, nanai pany u.

³² Nichi i paleung ka-echi ly Sodom mary, Komora mary kamta phra nai, khota iy paleih thai nai athaichi athai nai kreip angjyn keung kamta py,

³³ pavui i thailai num nai kreip hang kamta py lawm u bo.

³⁴ “Areng ly nichi i paleung ka-echi sa nai bawibawi pany nai deaungkho y, nichi ai pajeng ai nai neng ka-pe ajeng nai ne.

³⁵ Areng ly paleung ka-echi ai pajeng iy vawitheung tha ai; nichi i sum nai neng tym ai; nichi myh ai nai neng ly kasa bo.

³⁶ Areng ly mymy i khumichi atho kheih nai, paha nai niu nai khala atleu ai. Mymy teng y ahihawi iy chiu nai chiu nai khumichi jeaungmang nai niu nai khala, nichi ai pahen ai.

³⁷ Naibaly Areng ly mymy i khumichi teng y, ‘Nangchi ym iy cheaungkhang sa thai nai tameuhchi ly ma y mo?

³⁸ Nangchi ly huni tameuhchi teng y apathyp nai tawnbawi thau hawi kreip hangchi talam u bo. Huni tameuhchi ly vai jeu iy nangchi ai sabawm u na sy, jeu praw iy nangchi ai atleu pi na sy.

³⁹ “Kai leaungrei naini Tameuh ne; kai naini Tameuh tatang ne. Kai ly hengra la pi veng thai, hengra py kapei thai, hawi py sa thai; kai i sa nai ai ly ami py paka pajau y leang.

⁴⁰ Kai ly deungtasarei heng nai keung ne khyp i, kai ly kani mang y kiu pheu iy katauh bo.

⁴¹ Kai ly sadi nanai haisau kata iy, meitang naimy tara chih ai. Kai i paleung ka-echi ai vawitheung tha iy kai ai niu ngai y naichi ai ly pajeng ai.

⁴² Kai i thailiho chynchira y nichi i thi leaung ai; kai i haisau ly kai ai paka nai khumi ngiereichi ai tamyh ai. Kai ai paleung ka-e khai nai khumichi ai leaungrei py kangheng khai ai ny y; tamo nga nai hawi langheng hawi naichi malawn py dei u be ai.

⁴³ “Cheng theaung khumichi awi, Areng i khumichi ai palo u; mymy ly mymy i khumichi ai padei nai keung ngiereichi ai ly pajeng ai. Mymy ly mymy i paleung ka-echi ai vawitheung tha ai, mymy ly mymy i khumichi i kamngo pahen pi ai,” napi.

⁴⁴ Mosi hawi Nun i chapo Josua nini my Israela chengchi thai pa-rei, hini khulym thui hawi nai ne.

Mosi my kangkhym i leu pei naichi

⁴⁵ Mosi my Israela cheng bawibawichi teng y Tameuh teng i leu pei naichi thui pi pajau nai bo y,

⁴⁶ “Nangchi teng y vaini kaimy kang pei nai hini leu saichi hawihai patawm u. Nangchi i cho chanauchi py Tameuh i leu pei nai bawibawichi ai paleung hawi verei patawm ai nai patiu pi u.

⁴⁷ Hini leu pei naichi ly atyhtyh ny y leang; hunichi ly nangchi i heng ai nai sai tatang ne. Nangchi hini leu pei naichi patawm u baly Jordan tavo vai, nangchi peang ai nai pri y heng sau u ai,” napi.

⁴⁸ Huni kani y my Areng ly Mosi teng y,

⁴⁹ “Jeriko mary kangka Moba pri i Abarim mawichi mang y chei iy, Nebo mawi y lyn kalau; huni mawi salo mang dengdairei Israela chengchi teng y kaimy pei ai nai Kanan pri khen angdeang.

⁵⁰ Nang i amjo Aron ly Hora mawi saleung y dei nai kamta, nang ly huni Nebo mawi y dei teang ai.

⁵¹ Ati mana nai mo na baly nangni ly Zin daichi ka-vym i Kadesa mary sahawi Meriba tavo micheaung y tym nai thym khala, Israela chengchi i mo y kai ai tahm khai hawi y nai deaungkho y ne.

⁵² Nang ly kaimy Israela chengchi teng y pei ai nai pri y kun y naimy, kamlo mang dengdairei niu jo ai khyh,” napi.