Leu Thui Nai 23 - Khumi Common Language Bible

Areng i khumichi theung i nyn va vui nai

¹ Tli chum nai neampacho, ti y baly neampacho i taheaung tameang nai khumi ai Areng i khumichi theung y tabawi ngau y.

² “Kamthu kamleaung sa naira i nga nai pajang cho hawi ni i kangpreang deung horei khrairei ly Areng i khumichi theung y tabawi ngau y.

³ “Ammon cheng, Moba cheng hawi nichi i kangpreang deung ho khrairei ly Areng i khumichi theung y tabawi ngau y.

⁴ Nangchi Aikupta pri i dengdairei theu u nai khala, nichi ly nangchi i ngai nai teicha teinei hawi tui pei u y. Mesopotamia pri Pethor mary i khumi Beora i chapo Balam ai alai iy, nangchi ai ang pasawi hai bo.

⁵ Na i py nangchi i Areng Tameuh ly nangchi ai tamen nai deaungkho y, Balam i pasawi nai ai tangai pi y; ni ly nangchi ai pasawi ai nai jeng y amtheaung hai bo.

⁶ Nangchi i pri khaw jo nai ryrei ly huni khumi chengchi i vui hawi ai nai hau u moh, sabawm py sabawm u moh.

⁷ “Edom chengchi ly nangchi i amjy ne nai deaungkho y, nichi ai niu ngai y nai awm u moh. Aikupta khumichi ai py niu ngai y nai awm u moh. Nangchi ly vaichi khala nichi i pri y awm u vai nai ne.

⁸ Nichi i kangpreangchi ly mo mang deung thom dengdairei, Areng i khumichi theung y tabawi pajau.

Tavai tai naira ai pachai nai

⁹ “Nangchi ly paleung ka-echi ai tiu nai thym khala, tavai tai naira reita leaungsai y, chai y nai ngiereichi amkyn u ai nai tla.

¹⁰ Khumi leaungrei ly vum y amang theu i, taheaung tui theu jai lawh baly, ni ly tai naira angam mang y awm ai nai tla.

¹¹ Huni khumi ly dym mang y tui ahiu pan iy, kani avah baly tai theung y kun teang pajau.

¹² “Imeaung lehra meingtym ly tai angam mang y sa ai nai tla.

¹³ Nangchi ly tai angam mang y imeaung leh nai khala, dengkeaung hawi sa nai lengpeaung atawn yb iy imeaung leh chum baly, huni hawi tai iy taphum teang ai nai tla.

¹⁴ Nangchi i tai naira ai ly nangchi ai ama hai iy, tavai eaung hai ai nai, nangchi i Areng ly tai theung y nangchi hawi vanrei awm nai deaungkho y, tai ai ly reita leaungsai y kachai khai ai nai tla. Areng my nangchi ai ang khai su y ai nai, chai y nai ngiereichi sa ai nai avo y.

Reita leu pei nai takhra takhrachi

¹⁵ “Yhmkeung teng i nai preang vui iy nang teng y abyh ai nai ang tym nai miseaung ai ly my i yhmkeung teng y pato ali teang moh.

¹⁶ Huni miseaung ly nangchi i marychi theung y, awm ai ngai nai mary y awm ai nai pei pi ai nai tla, nang ly ni ai ano moh.

¹⁷ “Israela cheng theung i neampacho py ne sy, neampachy py ne sy, chiu naira meingtym ai bima yhm palawn moh.

¹⁸ Bima kalopra i nga nai tangka ai tauh iy, nangchi i Areng Tameuh i meingtym kachaira y talam ai nai avo y. Areng ly huni kalop ai paso nai ne.

¹⁹ “Nang ly nangmychi Israela cheng tengtawi leaungrei ai tangka mo, teicha teinei mo, ti y baly vawnsai ha harei mo, alai ai nai pei nai khala, katy cho moh.

²⁰ Nangchi ly cheng takhrachi teng i katy la pajau, na i py Israela cheng tengtawi ly katy lo moh. Hini reita patawm baly Areng Tameuh my nangchi peang nai pri y, nangchi i sa nai ngiereichi amtheaung hai ai.

²¹ “Nangchi ly nangmychi i Areng Tameuh teng y vaineng adeu baly, huni adeu nai kamta sa khyp ai nai pathlai moh, pathlai lawh baly nang teng y kamngo tym ai.

²² Areng teng y vaineng adeu y naimy awm ai nai ngai baly awm pajau.

²³ Na i py amy kangai vaineng adeu lawh baly, adeu nai kamta sa takengkei ai nai tla.

²⁴ “Nangchi ly nangmychi Israela cheng tengtawi leaungrei i kreip akho theung y tako prei nai khala, kreip athaichi ngai nai ryrei jaw cha pajau, na i py yhm y syn ai nai ly ngo y.

²⁵ Nangchi ly nangmychi cheng tengtawi leaungrei i chohbai y aleaung prei nai khala, chohvuichi ngai nai ryrei kiu hawi pahui iy cha pajau, na i py chohvui ai cheaungchen hawi tyn ai nai avo y.