Leu Thui Nai 14 - Khumi Common Language Bible

So ngau y nai paleung si nai ka-ma-ra

¹ “Nangchi ly nangchi i Areng Tameuh i khumi cheng ne. Hunai deaungkho y kadeichi i vui paleung si nai khala, amy i ngan tlangra y tamo apei piupa nai, lupang sam avau lawp nai so ngau y.

² Areng ly khaileaung pri khumi cheng bawibawichi theung i, nangchi ai mymy i khumi palawn ai nai vawi takhra nai deaungkho y, nangchi ai nangchi i Areng Tameuh my peang nai ne.

Chai nai hawi chai y nai tawnbawichi

³ “Areng my chai y napi nai tawnbawi ngierei i mawi ly cho ngau y.

⁴ Nangchi cha pajau nai mawi ly; si, beram, mi-i,

⁵ sisiu, sitha, sopajo, chakhi napi nai

⁶ muiken ako iy pichy palawi nai mawichi ne.

⁷ Na i py muiken ako y iy, pichy palawi y nai mawichi ly cho ngau y. Kula-iu, jeung, sapautavui ly cho ngau y. Hini mawichi ly pichy palawi i py muiken ako y nai deaungkho y, chai y nai mawi, nanai palawn ai nai tla.

⁸ Eu mawi py cho ngau y, eu ly muiken ako i py pichy palawi y nai deaungkho y chai y nai mawi, nanai palawn ai nai tla. Paka nai hini mawichi ly cho ngau y. Hunichi i kadei veuchi malawn py nam ngau y.

⁹ “Nangchi ly kachyh hawi alih awm nai ngo ngierei ly cha pajau.

¹⁰ Na i py kachyh hawi alih by y nai mana mawichi ly cho ngau y. Hunichi ai ly chai y, nanai palawn ai nai tla.

¹¹ “Nangchi ly chai nai tavochi naini cha pajau.

^12-18 Na i py nangchi cho ngau y nai tavochi ly: ahmtlau, beaungku, ahm pui, tengtum, langna, o-a, tavo kula-iu, zenjaw, obeaung, obeaung asang, tuisakreu, tuilym, uithaw hawi phanglauchi ne.

¹⁹ “Pakhi awm nai mipochi ly chai y nai deaungkho y cho ngau y.

²⁰ Chai nai mipochi ly cha u pajau.

²¹ “Atyhtyh naimy dei nai tawnbawi mawi cho ngau y. Nangchi hawi saleaung vanrei awm nai cheng takhrachi ly huni mawi cho palai sy, ti y baly cheng takhrachi teng y jo u pajau. Nangchi ai ly nangchi i Areng Tameuh my peang nai ne i, nangchi ly mymy i khumichi ne. “Beram cho, ti y baly mi-i cho ai ly amhm i kanu tui hawi vanrei byh ngau y.

Horei y harei talam nai reita

²² “Nangchi i li hlauchira i saneng tleirei theu nai amti amjang bawibawi theung i horei y harei khai takhra ai nai tla.

²³ Naibaly nangchi i Areng Tameuh my vawi takhra nai, mymy ai chiu nai meingtym hareira chei iy, hunira mymy i mo y choh, kreip hang, olive asitui, si hawi beramchi i cho chaluchi theung i, horei y harei ly cha u pajau. Huna nai sa nai ly nangchi i Areng Tameuh ai jei kaji naimy tahm khai jojo ai nai avo, nanai nangchi pany u ai nai tla.

²⁴ Areng ly nangchi ai amtheaung hai nai deaungkho y, nga nai yhmtheaung katui theung i horei y harei ly Tameuh ai chiu nai meingtym y syn ai nai palo lawh baly,

²⁵ huni vawnsaichi ai jo iy, nga nai tangka ai chiu naira meingtym harei khyh naira y syn ai nai tla.

²⁶ Huni tangka hawi nangchi kangai si mawi, beram mawi, kreip hangchi van iy, huni meingtym nangchi i Areng Tameuh i mo y, nang hawi nang i yhm dengtheungchi ly amo theu naimy cho nei u.

²⁷ “Nangchi i marychira y awm u nai Levi theaungchi ly mychi peang nai yhmtheaung by y nai deaungkho y, nichi ai dawn hai ai nai py tami u moh.

²⁸ Saneng thomrei y tleirei, nangchi ly amti amjangchi theung i horei y harei ly nangchi i marychi theung y pateung achu ai nai tla.

²⁹ Huni teicha teineichi ly Levi theaungchi i vui ne, nichi ly angchei i dengdairei yhmtheaung katui by y. Naibaly nangchi i marychi theung y awm u nai cheng takhrachi, nurochochi hawi lumai neampachychi i vui ne. Nichi ly hunichi theung i ngai nai ryrei la iy cha pajau. Huna nai sa baly nangchi i Areng Tameuh my nangchi sa nai tleirei y amtheaung hai ai.