Kati Nai 33 - Khumi Common Language Bible

Aikupta dengdairei Moba pri mang y khuleaung amsa nai

¹ Mosi nini Aron my lu sa iy Israela chengchi ly Aikupta pri i dengdairei cheng theaung ka-thui ka-thui theu u i, nichi i khuleaung satang pany hai ai.

² Areng my leu pei nai kamta, Mosi ly nichi i anawn nai khala tai sa nai meingtym amynchi tajiu typ nai ne.

³ Israela chengchi ly Katlen Vui nai Pawi sa angchei nai bo baly, angchei lo kani holai pangrei kani y, Aikupta pri i dengdairei theu u nai ne. Nichi ly Areng my ama hai nai saho y, Aikupta chengchi i mei ka-niu y Ramese mary dengdairei theu u bo.

⁴ Huna nai thym khala Aikupta chengchi ly Areng my pajeng naira avum nai chapo chaluchi i veu up thym nai ne. Huna nai pajeng nai molam y, Areng ly Aikupta chengchi i tameuhchi tleaung y sa thai naira len keh nai sai patei pi nai ne.

⁵ Israela chengchi ly Ramese mary i dengdairei theu u chum baly Sukkoth meingtym y tai u bo.

⁶ Hu i dengdairei daichi ka-vym kachawnra i Etham meingtym y tai u.

⁷ Naibaly nichi ly Bala Zephon tai naira nisi ngan mang Phihahiro tai naira mang y ali u teang i, Mikidol tai naira sahawi y anawn u.

⁸ Nichi ly Phihahiro tai naira i nai theu u iy, pangli kamsen angpeang u i, Etham daichi ka-vym y kani thomrei lam tako u nai bo y, Marah meingtym y tai u bo.

⁹ Nichi ly hu i nai theu u bi i, tuikho holai nyhrei awm nai hawi chamleaung keung vui saryhrei prau nai Elim tai naira y tym u.

¹⁰ Naibaly nichi ly Elim i dengdairei theu u bi i, Su-a pangli katheaung sahawi y tai u.

¹¹ Hunaibaly Sin daichi ka-vym y tym u.

¹² Hu i nai baly Dophka tai naira py,

¹³ hu i nai baly Alusa tai naira py anawn u nai ne.

¹⁴ Hu i nai amsa u bi i, khumichi i vui nei ai nai tui by y nai Rephidim meingtym y tym u.

^15-37 Nichi ly Rephidim tai naira i dengdairei Hora mawi mang y chei nai lam y anawn nai khala tai naira meingtymchi ly: Sinai daichi ka-vym, Kibroth Hatava, ti y baly “Ka-lam tapreaung,” Hazeroth, Rithmah, Rimon Perez, Libnah, Rissah, Kehelatha, Sepher mawi, Harada, Makheloth, Tahath, Terah, Mithka, Hasmona, Moseroth, Ben Jaakan, Horahkidak, Jobatha, Abronah, Ezijokeba, Zin daichi ka-vym (huni ly Kadesa ne), Edom pri khujyh y awm nai Hora mawichi ne.

^38-39 Areng my leu pei nai kamta, Pathyp pi nai keung Aron ly Hora mawi salo y lyn kalau bo. Israela chengchi ly Aikupta pri i dengdairei theu nai bo y, saneng vui palyhrei pa-ngo lo, lo si kani harei kani y, Aron ly saneng 123rei awm i, huni mawi y dei bo.

⁴⁰ Huni neng khala Kanan pri tokalawi mang y peang nai samrang Arad ly Israela chengchi ang jeu u bo, nanai satang thai.

^41-49 Hora mawi i dengdairei Moba adym mang y chei nai lam y Israela chengchi anawn nai khala tai nai meingtymchi ly: Zalmonah, Punon, Oboth, Moba pri theung i Abarim, Dibon Kad, Almon Diblathaim, Nebo mawi sahawi i Abarim mawi, Beth Jeshimoth hawi Akasia leaunghawi sala Jeriko mary kangka Jordan tavo vai Moba adymchi ne.

Jordan tavo angpeang y rai khala Areng i leu pei naichi

⁵⁰ Jeriko kangka Jordan tavo vai i Moba adymra y Areng ly Mosi dengdairei

⁵¹ Israela chengchi i vui leu pei nai ly “Nangchi Jordan tavo angpeang iy Kanan pri theung y kun u nai khala,

⁵² huni pri y awm nai khumi bawibawichi ai patheu pawn ai nai tla. Nichi i lengseaung tameuh myn, tamo ngan tameuh mynchi hawi nichi i chiu nai meingtym ngiereichi ai taphra pawn ai nai tla.

⁵³ Kai ly nangchi teng y huni pri pei nai deaungkho y, nangchi ly huni pri ai tiu iy khuteng sa u ai nai tla.

⁵⁴ Israela cheng theaungchi hawi nupai bawibawichi teng y, huni pri ai tambe va iy phy pi ai nai tla. Nupai nawi, di ka-lyp khaileaung phy paji pi ai nai tla.

⁵⁵ Na i py nangchi my huni pri i khumichi ai patheu y lawh baly, hu y awm nai khumichi ly khrukhra hai nai keungchi lawm ai i, nangchi ai ang tiu ai.

⁵⁶ Nangchi ly huni pri i khumichi ai patheu pawn y lawh baly, kai ly nichi i tlang tleaung y tym hai ai nai pajengra ly nangchi i tlang tleaung y kang tym hai lawh ai,” napi.