Kati Nai 24 - Khumi Common Language Bible

¹ Balam ly Areng my Israela chengchi ai amtheaung hai ai nai ngai hai, nanai pany nai khala, vaichi khala i kamta Areng teng i amo leu nga ai nai atho so y leang bo. Ni ly daichi ka-vym mang y khen cham i,

² Israela khumi mipuichi ly cheng theaung ka-thui ka-thui tai u nai niu. Huna nai khala Tameuh i phailo ly ni teng y tym i,

³ ni ly amo leu hawi, hina nai kamta thui pi: “Hini ly Beora i chapo Balam my thui pi nai amo leu, chai pyn pa-rei niu thai nai keung i leuchi ne.

⁴ Ni ly Tameuh my pei nai leu thai pajau. Mei pali naimy i tahm nai thym khala ati cheaungkhang sa thai nai Tameuh teng i dengdairei kai ly paleung mei y kaniu nai ne.

⁵ Israela chengchi i taichi ly khri pa-rei apu parai na.

⁶ Amjynta na pa-rei prau nai unla keungchi hawi atawm; tavo peang y sa nai akhochi hawi py, Areng my ui nai akjaw keungchi hawi py, tui kangsa y prau nai saitleang keungchi hawi py atawm.

⁷ Nichi salo y kanitui nai hai ai; Kani tui bym pa-rei nga nai khaileaungra y pati ai. Nichi i samrang ly Akad samrang tleaung y py sa thai naira awm iy meingtym tleirei y haiho num ai.

⁸ Tameuh my nichi ai Aikupta pri i dengdairei pahawi bo; nichi ly salen katai kamta atho len. Nichi ly mychi i paleung ka-echi ai tiu nai pajau; paleung ka-echi i hiuchi hawi, nichi i thailihochi ai py khei piupa pawm bo.

⁹ Israela pri ly atho ham nai khrangsi hawi atawm; khrangsi i nai khala ami py ni ai palaw vam y. Israela chengchi ai amtheaung hai nai khumi ly amtheaungra nga ai; Israela chengchi ai pasawi nai khumi ly amsawi lawi teang ai,” napi.

¹⁰ Naibaly samrang Balek ly kado theu nai deaungkho y, my i kiu kasum cheng naimy Balam teng y, “Kai i paleung ka-echi ai pasawi ai nai nang ai kang palau nai ne; na i py vai nang ly nichi ai amtheaung naira tlen thomrei pei pi lawh.

¹¹ Vai nang ly yhm y phai vawi teu! Kai ly nang ai kawn vang langseaungchi pei ai nai adeu i py, huna nai pei ai nai Areng my ngai hai y,” napi.

¹² Balam my, “Nang i samrang yhm y awm nai muku, tangka ngierei pei i py, Areng i leu pei naichi ei vui iy,

¹³ kaimy alyly ati sai py so thai y, nanai nang i savaichi teng y kaimy thui pi yb nai ny y a? Kai ly Areng i leu pei nai ngiereichi naini thui ai khyh,” nanai pathang.

Balam i Kangkhym kangtem amo leu

¹⁴ Balam my samrang Balek teng y, “Vai, kai ly amjo amnauchi teng y kavawi ai; na i py kai vawi y rai khala Israela chengchi my, mo mang y nang i chengchi teng y mana sa ai mo, nanai kaimy pany hai ai,” napi.

¹⁵ Naibaly Balam ly hina nai kamta amo leu thui nai ne: “Beora i chapo Balam i amti pi nai amo leuchi ly Chai pyn pa-rei niu thai nai keung i leuchi ne.

¹⁶ Ni ly Tameuh my pei nai leuchi thai pajau; salo kangteng Tameuh teng i dengdairei cheng naira kanga. Mei pali naimy i tahm nai thym khala, ati cheaungkhang sa thai nai Tameuh teng i dengdairei, kai ly paleung mei y kaniu bo.

¹⁷ Kai ly mo mang i satang dawn nai khala, Israela pri ai kaniu. Huni pri y samrang leaungrei ly angvang parai nai ka-si kamta amteng ai. Huni samrang ly ka-si tempo kamta Israela pri y amteng ai. Ni ly Moba chengchi i lu sa nai keungchi ai tiu iy Setha theaungchi ai pajau vui ai.

¹⁸ Ni ly Edom pri i paleung ka-echi ai tiu nai pajau iy, nichi i pri peang vui ai. Israela pri ly eaung naira nga jojo ai.

¹⁹ Israela pri ly paleung ka-echi ai taphra iy leaungrei py takhawi y na pa-rei tamyh vui ai, napi.

²⁰ Naibaly Balam ly Amalek chengchi ai paleung mei y niu i, hina nai kamta amo leu thui pi: “Amalek pri ly atho awm keh nai pri ne, na i py kangkhym y ly huni pri ly phra seaungkhrang ai,” napi.

²¹ Naibaly ni ly kenit chengchi ai paleung mei y niu i, hina nai kamta amo leu thui pi: “Nangchi i awm nai meingtym ly rym hawi parai, tahi para salo y sa nai tavo tabu kamta chymme nai ne.

²² Na i py Asuria samrang ly nangchi i pri ai tiu nai pajau ai i, langheng y ang hawi vui ai. Huna nai khala nang ly phra naira avum ai,” napi.

²³ Balam ly hina nai kamta amo leu thui bi nai ne: “Tosyh ngan mang y akachu u nai khumichi ly amichi mo?

²⁴ Kupra tlawn i dengdairei paleung ka-e samphochi jeu iy, Asuria pri hawi Eber prichi ai eaung vui ai, na i py nichi ly phra naira avum teang ai,” napi.

²⁵ Naibaly Balam hawi samrang Balek nini ly mymy ni i yhm mang y vawi hawi akyhkyh bo.