Kati Nai 17 - Khumi Common Language Bible

Aron i cheaungvawi

¹ Areng my Mosi teng y,

² “Israela theaung holai nyhreichi ai lu sa naichi teng i, leaungrei y cheaungvawi ha harei, cheaungvawi holai nyhrei ly, nang teng y jeu hai sy. Lu sa nai leaung leaungrei ly cheaungvawira y amy i amyn tajiu typ ai nai tla.

³ Levi theaung i cheaungvawira y ly Aron i amyn tajiu typ ai nai tla. Cheng theaung lu sa nai leaungrei y cheaungvawi ha harei awm bawibawi ai nai tla.

⁴ Huni cheaungvawichi ai kai i awmra Tabynako mang y syn iy, nang ai kai ka-vum sa reng nai Leu Maikawm Pawm mo y khai.

⁵ Kaimy vawi takhra nai khumi i cheaungvawi ly sai ampho ai mang. Huna nai kamta sa baly Israela chengchi my nang i tlang tleaung y avawrei josei nai anawn u ai,” napi.

⁶ Hunaibaly Mosi ly Israela chengchi teng y thui pi i, cheng theaung lu sa nai leaung leaungreichi my cheaungvawi ha harei, cheaungvawi holai nyhrei Mosi teng y tym hai bo. Aron i cheaungvawi py holai nyhrei theung y abawi teang.

⁷ Mosi my cheaungvawi bawibawichi ai Tabynako theung i Areng i Leu Maikawm Pawm mo y khai bo.

⁸ Kani pa-nyh Mosi ly Tabynako theung y kun nai khala, Levi theaung Aron i cheaungvawi ly sai ampho nai niu. Huni cheaungvawi mang paumyn hawi pau py angdai iy, baden athai kangmyn py athai!

⁹ Mosi my Israela chengchi teng y cheaungvawi bawibawi patei i, nichi ly huna naichi niu u bo; naibaly lu sa naichi ly mymychi i cheaungvawi la u teang.

¹⁰ Areng my Mosi teng y, “Aron i cheaungvawi ai ly Leu Maikawm Pawm mo y khai hai ali teang. Hini tiu reng nai Israela chengchi my josei baly dei u ai, nanai pany hai naira ne i, Aron i cheaungvawi ai ly huni meingtym y khai ai nai tla” napi.

¹¹ Areng my leu pei nai kamta Mosi ly sa bo.

¹² Israela chengchi my Mosi teng y, “Kaichi i vui ly tem na bo!

¹³ Tabynako sahawi y tapai nai khumi luteng dei ai na baly, kaichi bawibawi ly dei be ai nai teu bo!” nanai thui u nai ne.