Kati Nai 16 - Khumi Common Language Bible

Mosi ai korah, Dathan hawi Abiramchi my tiu nai

^1-2 Levi theaung kohath nupai theung i Izahar i chapo korah ly lu sa nai keung Mosi ai tiu nai ne. Ni hawi abawi naichi ly Ruben theaungra i leaung thomrei ne. Nichi ly Eliaba i chapo Dathan hawi Abiram, Peleth i chapo Ona ne; nichi mang y lu sa nai Israela cheng leaung 250reichi py abawi teang. Hunichi ly mipui phyreichi my vawi nai luchi ne.

³ Nichi bawibawi ly Mosi hawi Aron i mo y jeu achu u iy nini teng y, “Nangni i sa nai sai ly rawn ala bo! Israela cheng bawibawichi ai Areng my vawi iy, Areng ly khumi bawibawichi hawi vanrei awm nai ne. Huna nai y Mosi ly ati mana nai y Areng i khumi mipuichi theung y amymy ai tahm apasang lawh mo?” napi u.

⁴ Mosi ly huni leu thai baly khaileaung y ambeu iy chiu sa bo.

⁵ Naibaly ni ly korah hawi ka-bangchi teng y, “Khawndam khawn mang y, Areng my ami ai vawi takhra nai mo, nanai ang patei pi ai. Areng ly mymy vawi takhra nai khumi ai mymy i maicham sahawi y chei hai ai mang.

^6-7 Khawndam khawn mang y nang hawi nang i nithun abang naichi ly mai laawm syn iy, mai-aichi hawi rimui mui katuichi khai naimy maicham mang y jeu hai u. Huna nai khala ami ai Areng my vawi nai mo, nanai niu u ai. Levi theaung theung i nangchi naini ami tleaungtha tahm apasang u lawh ly!,” napi.

⁸ Mosi my korah teng y napi bi nai ly “Nangchi Levi theaungchi awi, tangai u!

⁹ Israela chengchi i Tameuh ly nangchi ai Areng teng y ahihawi ai nai, Areng i awmra Tabynako theung y kalop sa ai nai hawi, cheng verei i vui kalop sa pi ai nai vawi takhra bo. Hina nai sa ai nga nai ly rumrang kalop palawn lawh a?

¹⁰ Areng ly nang hawi vanrei takhra Levi theungchi ai, hini kalop ang pei nai ne; na i py vai nangchi ly pathyp pi nai keung y atheng ai nai hnei u lawh ly!

¹¹ Nang hawi nang i ka-bang bawibawichi my Aron ai josei u nai ly Areng ai tiu tatang nai teu bo,” napi.

¹² Naibaly Mosi ly Dathan hawi Abiram ai palau nai pato i py nini my, “Kaini kangjeu y leang!,” napi.

¹³ Nini my, “Nang ly kaichi ai teicha teinei awm nai Aikupta pri i dengdairei hini daichi ka-vym theung y padei be ai nai pahawi nai ly paleung anyp y rai a? Vai nang ly kaichi i tlang tleaung y areng amlawn ai nai ngai nai sai a?

¹⁴ Nang ly kaichi ai paitiu khuta thym nai pri y tym hai pajau y iy, kaichi i vui khaileaung hawi kreip akhochi py pei pajau y bo. Vai, nang ly kaichi ai li-tapawp ai nai tau bi nai sai a? Kaini ly nang teng y kang jeu y leang!,” napi.

¹⁵ Hunaibaly Mosi ly nini i tlang tleaung y khri pa-rei kado theu i Areng teng y, “Hini khumichi i talam nai kapathyprachi ly kawn pi mo kyh. Kai ly nichi theung i leaungrei ai py hawi y nai kaso y leang. Nichi teng i keaungngo kano kasau harei py kalo pi vai y leang,” napi.

¹⁶ Mosi my korah teng y, “Khawndam khutawi baly nang hawi nang i nithun abang nai khumi leaung 250reichi ly Areng i awmra Tabynako mang y jeu u; Aron py hu y awm ai mang.

¹⁷ Nangchi khumi luteng ly maichamra talam ai nai amymy i mai laawm syn akyhkyh ly hunira y rimui khai iy syn u ai nai tla,” napi.

¹⁸ Huna nai deaungkho y nichi ly mai laawmchi syn i, huni theung y mai-aichi khai iy, rimuichi py khai; naibaly nichi ly Mosi hawi Aron nini hawi vanrei Tabynako katheu pa-khora y angdo u.

¹⁹ korah ly khumi mipuichi ai pangym iy, Tabynako katheu pa-khora y Mosi nini Aron hawi mo atha naimy angdo u bo. Huna nai thym khala tlenrei khyhmy Areng i nang parai nai kangvang sangso ly khumi mipuichi mo y angvang bo.

²⁰ Naibaly Areng my Mosi hawi Aron nini teng y,

²¹ “Hini Khumi mipuichi i ka-khan y asyn hawi vui; kai ly nichi ai vaimy kataphra pawn ai,” napi.

²² Na i py Mosi hawi Aron nini ly khaileaung y ambeu iy, “Aw Tameuh, nang ly khumi angso bawibawichi i hengra pakeung sangum ne. Khumi leaungrei i kamngo molam y cheng verei ai kado theu hai ai bo a?” nanai takeng.

²³ Areng my Mosi teng y,

²⁴ “khumi mipuichi ai korah, Dathan hawi Abiramchi i tai hawi kamlora y asyn ai nai thui pi,” napi.

²⁵ Naibaly Mosi ly Israela chengchi ai lu sa nai keungchi hawi vanrei Dathan, Abiram teng y chei u.

²⁶ Ni ly khumi mipuichi teng y, “Hini khumi aso y naichi i taichi hawi kamlo y asyh u; nichi i vawn sai ha harei py abi u moh. Kai i leu tangai y baly nangchi ly nichi i kamngo molam y nichi hawi vanrei phra u ai,” napi.

²⁷ Hunaibaly nichi ly korah, Dathan, Abiramchi i tai hawi kamlora y asyh u bo. Dathan hawi Abiram nini ly myni i aju chanauchi hawi vanrei, theu u iy mymychi i tai katheu pa-khora y angdo u nai ne.

²⁸ Mosi my mipuichi teng y, “Kai ly Areng my leu pei nai y hini atitichi sa, nanai py, kaimy i kangai y sa nai ny y, nanai py, nangchi pany pajau ai nai leaungsai ly hina nai ne.

²⁹ Hini khumichi ly Tameuh my pajeng nai ny y naimy dei kari y dei lawh baly, Areng my kai ai pato nai ny y, nanai pany u.

³⁰ Na i py Areng ly thai vai y nai sai sairei sa iy, nichi hawi vanrei nichi i vawnsaichi ai khaileaung my pajawn vui ai i, nichi ly kangheng tang my dei baly, nichi ai Areng my pajeng nai ne, nanai pany u ai,” napi.

³¹ Mosi leu tem phai tem baly tlenrei khyhmy Dathan hawi Abiram nini i kheu chiu nai khaileaung ly ako thla i,

³² nichi hawi vanrei, nini i aju chanauchi, korah nithun abang naichi hawi nichi i yhmtheaung katuichi ai khaileaung my pajawn vui bo.

³³ Hunai deaungkho y nichi ly mymychi i yhmtheaung katuichi hawi vanrei, tavau pri y kangheng tang my ang vum u bo. Nichi ly khaileaung my pajawn nai deaungkho y tama pawn nai ne.

³⁴ Huni meingtym y awm nai Israela cheng bawibawichi py, nichi i vo hang nai katyn thai nai khala, “Angpreng u! achi ai py khaileaung my pajawn lawh na!” nanai aeu u bo.

³⁵ Naibaly Areng my mai kangveaung tla hai i, rimui mui katui talam nai khumi leaung 250reichi mai my kang be bo.

Mai-ai laawmchi

³⁶ Naibaly Areng my Mosi teng y,

³⁷ “Kheupaja mai-ai laawmchi ly talam patyp nai vawnsaichi ne nai deaungkho y, pathyp pi nai keung Aron i chapo Eleaza teng y, huni mai-ai laawmchi ly mai y dei nai khumichi teng i la vui iy, mai-aichi ai meingtym harei y adi hai ai nai tla.

³⁸ Areng i maicham y rimui mui katui talam nai khala, mai-ai laawmchi teaung nai deaungkho y, hunichi ly talam patyp nai vawnchi ne. Hunaibaly amymychi i kamngo molam y dei nai khumichi teng i mai-ai laawmchi la chum baly, angporyp pa-rei thip taphidi iy maicham i vui mymra so. Huni kheupaja phei ly Israela chengchi ai pany hai vau ai,” napi.

³⁹ Hunai deaungkho y pathyp pi nai keung Eleaza ly mai-ai laawmchi la iy, maicham mymra sa ai nai thip taphidi vui bo.

⁴⁰ Aron i kangpreang ny y nai amimi py Areng teng y rimui mui katui leng patlum ai nai maicham mang y tapai ngau y, nanai kheupaja khym my Israela chengchi ai pany hai nai ne. Hini reita ai patawm y nai khumi ly korah hawi ni i nithun abang naichi kamta dei u teang ai. Eleaza ly Mosi dengdairei Areng my leu pei nai ngiereichi sa nai ne.

Aron my khumi mipuichi ai atleu nai

⁴¹ Kani pa-nyh y Israela cheng bawibawichi ly Mosi nini Aron ai, “Nangni ly Areng i khumi phyreichi ai padei hawi bo,” nanai josei u.

⁴² Nichi ly Mosi hawi Aron nini ai josei ai nai jeu achu nai bo y, Tabynako mang y khen angdeang u nai khala, tamai ly Tabynako salo y khiu naimy Areng i nang parai nai kangvang sangso niu u bo.

⁴³ Mosi hawi Aron nini ly Tabynako i mo y chei tapai i, angdo hawi;

⁴⁴ Naibaly Areng my Mosi teng y,

⁴⁵ “Hini khumi mipuichi i ka-khan y asyn hawi veng. Kai ly nichi ai vaimy kataphra ai!” napi. Naibaly Mosi nini Aron ly khaileaung y ambeu hawi bo.

⁴⁶ Mosi my Aron teng y, “Nang i mai-ai laawm lo ly hunira y maichamra i mai-ai khai iy, rimui mui katui ai huni mai-ai salo y khai; Naibaly mai-ai laawm ai khumi mipuichi teng y chei hai kaliki ly nichi i vui reita y kachai so pi kaliki! Areng ly nichi ai kado theu hai nai deaungkho y, nichi tlang tleaung y no kanghawi tym hai dudu bo,” napi.

⁴⁷ Aron ly Mosi my leu pei nai kamta mai-ai laawm la iy, khumi mipuichi theung y angpreng bo. Ni ly khumichi teng y no kanghawi man nai niu baly, mai-aichi salo y rimui mui katuichi khai iy, mipuichi i vui reita y kachai sa pi bo.

⁴⁸ Naibaly ka-jei awm nai no-na hawi vui nai deaungkho y, ni ly heng nai hawi dei nai khumichi sala y angdo.

⁴⁹ korah my tiu nai molam dei nai khumichi bo y, no kanghawi y dei nai khumichi ly leaung 14700rei awm nai ne.

⁵⁰ Ka-jei awm nai no kanghawi anawn chum baly, Aron ly Mosi awm nai Tabynako katheu pa-kho mang y ali teang bo.