JOBA 40 - Khumi Common Language Bible

^1-2 Joba awi, nang ly ati cheaungkhang sa thai nai Tameuh ai tiu lawh ly; vai amnym pi vui ai a? ti y baly patheung ali teang ai a?

Joba

^3-4 Aw Areng, kai ly ka-khum leu katheu lawh bo; nang teng y ati mana kang pathang pajau ai mo? Leu sairei py katheu bi ai nai, atho kaso y leang bo.

⁵ Kai ly leu katheu ai avo nai tleaung y, katheu panawi lawh veng bo.

⁶ Hunaibaly Areng ly alipui khupui theung mang, leu pei bi bo.

Areng

⁷ Vai, nang ly neampacho tatang ne i, angdo iy kai i leu kangdeng naichi ai pathang ba.

⁸ Nang ly kai teng y leu meitang adyh adawi nai by y leang, nanai pany hai nai ka-ma-ra patei ai nai atho sa ai a? Nangmy mang kateng lawm ai nai, kai ai cheh nai sai a?

⁹ Nang ly kai kamta sa thai naira awm a? Nang teng y kai i raawi kamta, kani pajyh nai katyn ka-tawm katyn awm a?

¹⁰ Huna nai katyn awm lawh teu i baly, nang ly tahm awm parai pa-rei amthyp ba; nangmy ai sa thai naira haiho hawimy akhiu ba.

¹¹ Nang ly amy i kado theu nai haiho patheu iy, paleung len amlyh naichi ai khen patyp iy, panem pawn ba.

¹² Nichi ai kamjau khai; khumi hawi y naichi ai avum nai meingtym y tamyh pawn ba.

¹³ Huni khumi bawibawichi ai khaileaung y up iy, tavau pri y kawm cheng ba.

¹⁴ Huna nai khala nang ly amy i haiho hawi eaung nai ne, nanai nang ai tahm pasang manme nai keung ly kai ne ai.

¹⁵ Heng nai amjy pui Behamoth; ai khen cham. Kai ly ni ai sa; nang ai py sa nai ne. Ni ly si kamta acha cha i py,

¹⁶ ni i akeng ly khri pa-rei atho awm i, ni i kajeu athovuichi ly khri pa-rei atho awm.

¹⁷ Ni i tamai ly saitleang keung kamta, angdo teng nai ne; ni i phai athovuichi ly ham parai.

¹⁸ Ni i hiuchi ly kheupaja kamta tang iy, ni i kheuchi ly tamo beangchi hawi atawm.

¹⁹ Ni ly kai i sa nai heng nai amjy bawibawichi theung y, lyh ai hawi parai na a! Sa nai keung my naini, taphra pajau khyh.

²⁰ Ni i sui tlai ai nai i vui y daichi mawichi tlum tlai nai mawichira y achachi prau pi nai ne.

²¹ Ni ly acha aleng phreungchi anui y ambeu reng; Aneaung kapanra i japang eumui reaung theung y aeung reng nai ne.

²² Tavo micheaung sahawi i aleng phreungchi hawi paijeaung keungchi ly ni ai ka-khui pei nai ne.

²³ Ni ly tui ho nai tavo ai jei y, my i meimai y Jordan tavo tui kaho leaung hai nai khala py, amchyh y naimy awm.

²⁴ Ami nai ly ni i mei paju hai iy patiu pajau ai mo? Ti y baly ni i notareang kamsui ai deaung pateung iy, patiu pajau na a?