I THESALONIKA 4 - Khumi Common Language Bible

Tameuh i kangai amhi amtlau nai

¹ Hunaibaly amjo amnauchi awi, kangkhym i naira y ly nangchi i awm ai avo nai sai hawi, Tameuh ai kawn hai ai avo nai sai ly kaichi teng i dengdairei nga u nai kamta ly (ne mang ly nangchi ly hunai kamta awm nai bo) awm ra awm ra ai nai, kaichi ly Areng Isu y takeng nai kang pachei nai ne.

² Kaichi my Areng Isu i saho y ati leu kang pei mo, nanai ly nangmychi ly pany u veng bo.

³ Nangchi ly chai naira nga iy, angai naira anawn u veng nai ly Tameuh i kangai ne he!

⁴ Naibaly Tameuh ai pany y nai Cheng Takhrachi i ngai phi teng y nai deaungkho y paleaung nai kamta ny y naimy,

⁵ leaung leaungrei ly chai naira y hawi tahm khai naimy amy i tlang ai ly apako u bawibawi sy;

⁶ hunira y ly ami py tamang iy amy i amjo amnau i tlang tleaung y atiti hawi y nai so moh sy; ati mana nai mo nabaly Areng ly huni bawibawira y ly vawitheung tha nai keung ne; kaichi py kang thui pi rym iy kang pany hai chum veng bo.

⁷ Tameuh my ly chai y naira y awm ai nai achi ai ang palau y leang, chai naira y awm ai nai ang palau nai teu.

⁸ Hunai deaungkho y hini leu tahm khai y nai khumi ly khumi ai tahm khai y nai ny y i, nangchi teng y Phailo Kachai ai ang pei nai Tameuh ai tahm khai y nai teu.

⁹ Na i py amjo amnauchi ai tamen nai leu ly ami py nangchi ai tajiu pi ai nai aly by y; nangmychi kypkyp my atamen leungtang ai nai Tameuh my patiu veng bo;

¹⁰ ne, Makedonia pri verei y awm nai amjo amnauchi i tlang tleaung y ly nangchi ly huni kamta sa u khypkhyp nai ne. Na i py amjo amnauchi awi, nangchi ly hunai kamta sa ra sa ra ai nai hawi,

¹¹ kham pajau kyh naimy awm u ai nai hawi, amymy i atiti sa u ai nai py, nangchi i kiu y sa u tanga ai nai kang pachei nai ne;

¹² hunaibaly nangchi ly ati sai py avaw y iy angam mang i khumi i ka-niu y meitang naimy awm u thai ai.

Areng ang jeu nai

¹³ Na i py amjo amnauchi awi, khumi takhra athang khai naira pipi by y naichi i kamta paleung mawn u y ai nai, nangchi ly i ngym chum naichi i satang pany y ai nai kang ngai y leang.

¹⁴ Isu ly dei i angthau teang bo, nanai achi ym makho baly, Isu y i ngym chum naichi ai ly Tameuh my mymy hawi vanrei ang hawi teang ai.

¹⁵ Hini ly Areng i leu y kaichi ly nangchi teng y kang thui pi nai ne. Achi, Areng ang jeu nai khala y khrairei heng rai naichi ly, i ngym chum naichi ai ly pipi kalym vui y ai.

¹⁶ Areng mymy kypkyp ly aeu nai katyn hawi, kani pri i amtaw thau nai salo keh i raawi hawi, Tameuh i baw katyn hawi kani mang i dengdairei ang satla kathiu ai; naibaly Krista y dei chum naichi ly angthau u man ai;

¹⁷ huni bo y ly achi vai heng naichi ly Areng ai lamchung ai nai kani laileaung y mymychi hawi vanrei khupanym theung y achi ai ang la kalau ai; hunaibaly achi ly Areng teng y deungtasarei awm jojo ai.

¹⁸ Hunai deaungkho y hini leu y ly awm hai nem u leungtang.