Ezekiela 41 - Khumi Common Language Bible

¹ Naibaly huni khumi ly kai ai, meingtym kachai napi nai Achura yhm sala umtang takun mang y hawi i, Achura yhm kunra pa-kho lam pata cham bo. Huni lam ly katho miu tariurei,

² ka miu horei awm; Huni i langvawi lamtang dengpangchi ly miu pangrei awm bawibawi nai ne. Umtang kakau pata cham nai khala, jeang miu vui palyhrei, ka ly miu apomrei awm nai avum.

³ Naibaly ni ly theung mang katem keh takun mang y kun bo. Huni takun mang y kun nai lam pata cham i, katho miu nyhrei, ka ly miu tariurei awm; langvawi lamtang i dengpangchi ly katho miu saryhrei awm nai ne.

⁴ Huni khumi ly hini takun pata cham bo; huni ly jeng ka miu apomrei awm riri nai ne. Naibaly ni ly kai ai, “Hini meingtym ly khri pa-rei chai parai nai meingtym ne,” napi.

Achura yhm dengpangchira y tabi iy sa nai takunchi

⁵ Huni khumi ly Achura yhm theung i angpang katho pata cham i, miu tariurei awm; huni dengpangra tabi iy Achura yhm tengpang ka-ki, miu palyhrei kau nai takunchi awm.

⁶ Huni takunchi ly sambeu thomrei awm i, sambeu harei y takunchy phairei awm bawibawi nai ne. Achura yhm mang i dengpangchi ly salo sambeu angpang tleaung y tho keh. Hina nai kamta takunchy ai dengpangra tabi iy sa ai nai jeng y, katho len nai angpang tleaung y panui iy sa nai ne.

⁷ Hunaibaly anui sambeu i nai sala sambeu y py, sala sambeu i nai salo sambeu y py chei u pajau nai ne. Achura yhm angpang ka-ki i takunchychi mo y khailei kalen nyhrei awm; huni takun awm nai deaungkho y Achura yhm dengpangchi i katho ai anui mang dengdai salo keh khrairei adyhsy, nanai angam mang my niu pajau nai ne.

^8-11 Kai ly Achura yhm ka-ki khailei kheubyn kakau awm nai niu; huni ly tengpang sahawi i khaileaung kakau tleaung y miu tariurei asang i, Achura yhm dengpangra sa nai takunchychi i kheutang hawi ahyh. Huni takunchy i angam mang angpang ly miu pangrei tho; khailei kakau hawi pathyp pi nai keungchi i takunchi sala, Achura yhm tengpang ka-ki khaileaung adym kakau miu apomrei awm. Achura yhm tosyh ngan mang y awm nai takunchyra kun ai nai katheu pa-kho harei, tokalawi ngan mang y awm nai takunchychi mang y kun ai nai katheu pa-kho harei awm. Achura yhm ka-kira y awm nai khailei kheubyn kakau ly ka miu pangrei awm nai ne.

Nidym ngan mang y awm nai yhm

¹² Achura yhm nidym ngan mang khaileaung kakau kachawn y yhm harei awm; huni ly jeng miu vui takawrei, ka ly miu vui saryhrei awm. Huni yhm angpang jeungrei ly katho miu pangrei awm nai ne.

Achura yhm i kau nai sai

¹³ Huni khumi ly Achura yhm angam mang verei pata cham bo. Huni ly jeng miu chungvairei awm; Achura yhm nithun mang dengdairei khaileaung kakau tako prei iy, adym angam mang Achura yhm kachawn katem tym pa-rei ly miu chungvairei awm.

¹⁴ Langvawi lamtang mang i khaileaung kakau raurei, Achura yhm mo mang tako prei iy pata cham i, miu chungvairei awm nai ne.

¹⁵ Huni khumi ly langvawi lamtang i kheupo raurei, Achura yhm nidym ngan mang y pata cham i, miu chungvairei awm nai avum bo. Achura yhm chai parai nai meingtym hawi khri pa-rei chai parai nai meingtymra kun nai dengpangchi ai,

Achura yhm i kamsi kamdichi

¹⁶ paichi dengdai thaibeng pa-kho khrairei dengkeaung pjeng pajyn typ bo. Hini thaibeng pa-khochi ai py mym iy khai pajau nai ne.

¹⁷ Achura yhm angtheung dengpangchi ly katheu pa-kho salo y tym pa-rei,

¹⁸ chamleaung keung mynchi, kheruben mynchi thiu iy ka-pu sa nai ne. Takun taki jeungrei, angchei y chamleaung keung myn, huni bo y kheruben myn, huni bo y chamleaung keung myn, hunai kamta thiu nai ne. Kheruben myn ha hareira y meimai nyhrei awm.

¹⁹ Khumi meimai hawi khrangsi meimai ne i, khumi i meimai ly chamleaung keung harei mang y mo tha iy, khrangsi meimai py takhra chamleaung keung harei mang y mo tha;

²⁰ hina nai kamta angpang jeungreira y, paichi dengdai katheu pa-kho salo y khrairei, mynchi thiu nai ne.

²¹ Kachai meingtymra i katheu chenghengchi ly keng palyhrei chenghengchi ne. Khri pa-rei chai nai meingtym katheu pa-kho mo y, dengkeaung maicham hawi atawm nai harei awm.

Dengkeaung maicham

²² Huni ly miu palyhrei asang iy miu thomrei kau; huni i taki yhmmawmchi, anui kheutang hawi dengpangchi ly dengkeaung hawi sa. Huni khumi my, “Hini ly kai, Areng mo i sabawi ne,” nanai kai ai ang thui pi.

Katheuchi

²³ Kachai meingtym mang y kun nai lam katem y py, khri pa-rei chai nai meingtym mang y kun nai lam katem y py, katheu ha harei awm.

²⁴ Hunichi ly sala mang paeaung ai nga nai katheu dawn nyhrei ne.

²⁵ Kachai meingtym mang kun nai katheu dawnchira py, dengpangchira y kamta chamleaung keung mynchi hawi, kheruben mynchi thiu nai ne. Huni bo y kunra meingtym katheu angam mang py, dengkeaung hawi kip nai harei awm.

²⁶ Huni takunra y thaibeng pa-khochi awm i, dengpangchira py chamleaung keung mynchi thiu nai ne. Achura yhm sahawi i takunra py dengkeaung hawi kip naichi ne.