ATITI AWM ANGCHEI NAI 36 - Khumi Common Language Bible

Esaw i kangpreangchi

¹ Hini ly Edom napi nai Esaw i kangpreangchi ne;

² Esaw ly Kanan cheng neampachychi ai pom nai ne i, hunichi ly Hiti cheng Elon i chaniu Adah, Hivit cheng Zibeon i chapo Anah i chaniu Aholibamah hawi;

³ Nebaioth i tuicho, Ismaela i chaniu Basemathchi ne.

⁴ Adah ly chapo Elipha ai tapen; Basemath ly chapo Reuel ai tapen;

⁵ Aholibamah ly chapo Jeusha, Jalam hawi korah ai tapen. Hini chapochi ai ly Esaw Kanan pri y awm nai thym khala y tapen naichi ne.

⁶ Naibaly Esaw ly ajuchi hawi chapo chaniuchi, mymy i khumi bawibawichi hawi Kanan pri y awm nai khala nga nai vawnsaichi py, tawnbawichi py la achu iy amnau Jakob hawi palo parai nai pri mang y ang pyn jo bo.

⁷ Ati mana nai mo nabaly nini ly tawnbawichi khri pa-rei nawi nai deaungkho y sui tlaira meingtym ake i, vanrei awm hawi pajau y nai ne.

⁸ Hunai deaungkho y Esaw ly Edom pri mawi tleaung mang y khuteng sa bo.

⁹ Edom chengchi i amsi Esaw i kangpreangchi ly hinichi ne:

^10-13 Esaw i aju Adah ly chapo Elipha ai tapen; Elipha ly Teman, Omara, Zepho, Katam hawi Kenaza napi nai chapo leaung pangrei tapen. Naibaly Elipha i aju katheang Teman ly chapo Amalek ai tapen. Esaw i aju Basemath ly chapo Reuel ai tapen. Reuel ly Nahath, Zerah, Shammah hawi Mizah napi nai chapo leaung palyhrei tapen.

¹⁴ Zibeon i chapo Anah i chaniu, Esaw i aju Aholibamah ly Jeusha, Jalam, Korah napi nai chapo leaung thomreichi ai tapen.

¹⁵ Hinichi ly Esaw i kangpreangchi ne. Esaw i chapo chalu Elipha ly Teman, Omara, Zepho, Kena,

¹⁶ korah, Katam, Amalek chengchi i amsi pajo ne. Hinichi ly Esaw i aju katheang Adah i tapen nai kangpreangchi ne.

¹⁷ Esaw i chapo Reuel ly Nahath, Zerah, Shammah hawi Mizah chengchi i amsi pajo ne. Hinichi ly Esaw i aju Basemath i tapen nai kangpreangchi ne.

¹⁸ Hini ly Esaw i aju, Anah i chaniu Aholibamah my tapen nai Jeusha, Jalam, Korah cheng kangpreangchi ne.

¹⁹ Hinichi ly Esaw i kangpreangchi ne.

Seira i kangpreangchi

^20-21 Edom pri y awm yb nai Horit cheng Seira i chapochi ly hinichi ne: Lotan, Shobal, Zibeon, Anah, dishon, Ezera hawi Disanchi ne.

²² Lotan ly Heman hawi Horit nupaichi i amsi pajo ne. (Lotan i tuicho ly Teman ne.)

²³ Shobal ly Alvan, Manaha, Ebala, Sepho hawi Onam nupaichi i amsi pajo ne.

²⁴ Zibeon ly Aiah hawi Anah napi nai chapo leaungnyhrei awm, (Hini Anah ly ampo i keaungngo kano kasauchi ai teicha patlai nai daichi ka-vym theung y tuibi tavochychi niu nai keung ne.)

^25-26 Anah ly dishon i ampo ne; dishon ly Hemdan, Esaban, Itharan hawi Kheran nupaichi i amsi pajo ne. Anah ly Aholibamah napi nai chaniu leaungrei awm.

²⁷ Ezera ly Bilahan, Zaavan hawi Akan nupaichi i amsi pajo ne.

²⁸ Disan ly Uz hawi Aran nupaichi i amsi pajo ne.

^29-30 Edom pri y awm nai Horit khumi chengchi ly Lotan, Shobal, Zibeon, Anah, dishon, Ezera hawi Disanchi ne.

Edom samrangchi

^31-39 Israelachi theung y peang nai keung samrang by y rai khala y Edom pri y peang nai samrang ka-thuichi ly hinichi ne: Bora i chapo Bela ly Dinhabah mary y peang, Samrang Bela dei nai khala y Bozrah mary Zerah i chapo Jobab my peang, Jobab dei nai khala y Teman mary i Husham my peang, Husham dei nai khala y Bedad i chapo Hadad ly Avith mary y peang, (Ni ly Moba pri theung y tavai atiu nai khala, Midian chengchi ai eaung nai keung ne) Hadad dei nai khala y Masreka mary i Samlah my peang, Samlah dei nai khala y tavo peang y awm nai Rehoboth mary i Shaul my peang, Shaul dei nai khala y Akhabo i chapo Bala Hanan my peang, Bala Hanan dei nai khala y Hadad my Pau mary y peang. (Ni i aju ly Matred i chaniu, Mezahab i katu Mehetabela ne)

^40-43 Esaw i kangpreang Edom nupaichi ly Timna, Alvan, Jethetha, Aholibamah, Elah, Pinon, Kenaza, Teman, Mibaza, Makdiela hawi Iramchi ne. Mymychi i awm nai meingtym ai py cheng amyn hawi pathi iy hunichira y awm u bo.