ATITI AWM ANGCHEI NAI 35 - Khumi Common Language Bible

Tameuh my Bethela meingtym y Jakob ai amtheaung hai nai

¹ Tameuh my Jakob teng y, “Bethela meingtym y chei ly hu y awm. Ngamjo ai jei nai deaungkho y preang nai thym khala i, nang teng y amteng nai kai Tameuh i vui apathyp ai nai maicham so,” napi.

² Naibaly Jakob ly my i yhm dengtheungchi hawi mymy hawi vanrei awm nai khumi bawibawichi teng y, “Nangchi teng y awm nai tameuh takhrachi ai ly aphi u pawn; nangmychi py apachai u ly ateaung kachaichi amthyp u.

³ Achi ly hi i dengdairei Bethela mang y chei ai; kai patang naira avum nai thym khala sabawm iy, kai chei naira tleirei y kai hawi vanrei awm nai Tameuh teng y apathyp ai nai, huni meingtym y maicham sa ai,” napi.

⁴ Naibaly nichi ly mymychi i kano amchochi py, cheng takhrachi i tameuhchi py Jakob teng y pei u i, Jakob my Sekhem mary sahawi i ngopraibiu keung anui y up bo.

⁵ Jakob hawi my i chapochi theu u nai khala, tengpang sahawi mary i khumichi ly khri pa-rei jei u i, nichi ai hui vam y bo.

⁶ Jakob ly mymy i khumichi hawi Luza mary y tym u bo. Vai ly Bethela napi. Huni ly Kanan pri y awm nai ne.

⁷ Jakob ly amjo teng i nai preang nai khala, Tameuh my amteng hai nai huni meingtym ai ly Bethela, nanai pathi bo. Hunira y maicham sa nai ne.

⁸ Rebeka ai kry nai keung Deborah dei i, veu ai ly Bethela tokalawi mang ngopraibiu keung anui y up. Hunai deaungkho y huni meingtym ai ly “meikatui tla nai ngopraibiu keung,” nanai amyn pathi bo.

⁹ Jakob ly Mesopotamia pri i nai tym bi nai khala, Tameuh my amteng hai bi iy amtheaung hai.

¹⁰ Tameuh my ni teng y, “Nang i amyn ly Jakob ne, Na i py vai dengdairei Israela napi ai,” napi. Hunai deaungkho y Tameuh my Jakob ai ly Israela, nanai amyn pathi bo.

¹¹ Naibaly Tameuh my ni teng y, “Kai ly ati cheaungkhang sa nai Tameuh ne; cho chanau neangneang peung sy. Nang i dengdairei khumi cheng cheaungkhang angpreng ai i, nang ly samrangchi i amsi sangum lawm ai.

¹² Kai my Abraham hawi Isaka teng y pei nai pri ly nang ai kang pei ai; nang bo y nang i kangpreangchi teng y py pei ai,” napi.

¹³ Naibaly Tameuh ly ni teng i nai theu vui bo.

¹⁴ Tameuh my leu pei nai huni meingtymra y Jakob ly pany jo ai nai leungcheng leng iy, huni salo y olive asitui hawi kreip athai hang lei i kachai sa bo.

¹⁵ Ni ly huni meingtym ai Bethela, nanai amyn pathi nai ne.

Rakeli dei nai

¹⁶ Jakob hawi yhm dengtheungchi ly Bethela i nai theu iy Ephrath mary hawi palo rawm nai meingtymra tym baly, Rakeli ly deaungdi tapen ai nai achai i khri pa-rei kajeu no nai ne.

¹⁷ Khri pa-rei kajeu no i, deaungdi syn nai keung my ni teng y, “Paleung mawn moh Rakeli awi, deaungdi neampacho leaungrei tapen bi bo,” napi.

¹⁸ Na i py mymy ly dei enten nai khala chapo ai ly Benoni, nanai amyn pathi; na i py ampo my ly Benjamin, nanai amyn pathi bo.

¹⁹ Rakeli ly dei bo i, veu ai ly Ephrath mary mang y chei nai lam teng y up bo; vai ly huni meingtym ai ly Bethlehem, napi.

²⁰ Jakob my pany jo ai nai hunira y lengseaung pado bo; vaini khrairei Rakeli i tapreaung angawm meingtym pany jo nai ne.

²¹ Naibaly Jakob ly hu i nai asyh iy, Eda yhm ka-sang palem mang y meingtym sa bo.

Jakob i chapochi

²² Huni pri y Jakob awm nai thym khala y, Ruben my ampo i aju katheang Bilaha hawi i ahawi bo. Jakob my pany nai khala y khri pa-rei kado theu. Jakob ly chapo leaung holai nyhrei awm nai ne.

²³ Leah my tapen nai chapochi ly Ruben, (Jakob i chapo chalu) Simeon, Levi, Juda, Isakhar hawi Zebulunchi ne.

²⁴ Rakeli i chapochi ly Josepha hawi Benjamin ne.

²⁵ Rakeli i miseaung nu Bilaha i chapochi ly Dan hawi Naphtali ne.

²⁶ Leah i miseaung nu Zilpah i chapochi ly Kad hawi Aser ne. Huni chapochi ai ly Mesopotamia pri y awm nai khala y tapen nai ne.

Isaka dei nai

²⁷ Jakob ly Abraham hawi Isaka awm nai Hebron mary sahawi Mamre meingtym y awm jo nai ampo Isaka teng y tym bo.

²⁸ Isaka ly saneng chungvai atlo vui tajarei awm bo.

²⁹ Naibaly mymy ly miteaung cheang i dei bo; mymy ai ly chapo Esaw hawi Jakob nini my pavum hawi bo.