ATITI AWM ANGCHEI NAI 32 - Khumi Common Language Bible

Jakob ly Esaw hawi avum ai nai angveirym nai

¹ Jakob ly khuleaung chei nai lam y kani pri amtaw thai naichi hawi avum.

² Kani pri amtaw thai naichi ai niu baly Jakob my, “Hini meingtym ly Tameuh i awm naira ne,” nanai thui i, Mahanaim, nanai amyn pathi bo.

³ Jakob ly Edom pri y awm nai mymy i amjo Esaw teng y satang thai hai yb ai nai mo mang y pato man bo.

⁴ Mymy ly savaichi teng y, “Nang i miseaung kai Jakob ly Labana teng y awm nai, vai naini kang vawi teang nai bo.

⁵ Kai ly sichi, keaungngo kano kasauchi, beramchi, ma-ichi hawi miseaungchi awm; kai ly nang i meimai kahawi nga ai nai athang khai nai deaungkho y, nang teng y satang kang thai hai man nai ne, nanai amti pi u,” napi.

⁶ Savaichi ly Jakob teng y tym u ali teang nai khala y, “Ngamjo Esaw teng y kaichi tym i, ni ly nang hawi avum ai nai ang jeu dudu veng bo. Mymy hawi vanrei khumi leaung chungvai palyhrei py hawi nai ne,” napi.

⁷ Huna nai khala Jakob ly jei nai kaso tahyn theu i, mymy hawi vanrei awm nai khumichi ai phy nyhrei palawn bo; mymy i beramchi, sichi, ma-ichi, kula-iuchi ai py phy nyhrei palawn teang.

⁸ Ati mana nai mo nabaly, “Esaw my tiu lawh baly angchei i nai pajau vui teu i py, kangkhym i nai ly lawira nga ai,” nanai dawn nai ne.

⁹ Naibaly Jakob ly “Kai i amsi Abraham hawi kai i ampo Isaka i Tameuh, kai i chiu sa nai tangai pi kyh ba! Areng nang my ly kai ai, nangmy i pri, nangmy i amjo amnauchi teng y vawi teang, nang i tako nai tleirei y kaimy kang pahawi ai.

¹⁰ Nang i miseaung kai teng y nang my patei pi nai pahen naira hawi ka-ym awm naira py, kai hawi ataing y nai ne. Jordan tavo angpeang nai khala y, kai teng y cheaungvawi harei awm khyh. Vai kai ly hini phy nyhreichi hawi kavawi ali teang nai bo.

¹¹ Kai i amjo Esaw teng i nai kai ai atleu kyh ba, kai ly khri pa-rei paleung mawn na bo. Deaungdichi hawi neampachychi ai py, kaichi bawibawi ai py ang tiu iy ang padei pawn ai nai ni ly ang jeu nai bo.

¹² Nang i chei naira tleirei y kaimy kang pahawi ai, pangli spryh kamta nang i kangpreangchi kang peung hai ai, nanai nangmy adeu nai leu ai ly pany pi jo kyh ba,” nanai takeng bo.

^13-15 Hu y vumrei jei i, Jakob my amjo Esaw i vui langseaung mi-i nu chungvai nyhrei hawi katai apomrei, beram nu chungvai nyhrei hawi katai apomrei, Kula-iu nu choprawi phairei, si nu vui palyhrei hawi katai horei, keaungngo kano kasau nu apomrei hawi katai horei,

¹⁶ huna nai kamta phy takhra iy, phy ha harei nai y miseaung leaung leaungrei khai. Mymy ly nichi teng y, “Kai i mo mang y tako u man ly phy ha harei akhan rawm naimy ka-thui tako u,” napi.

¹⁷ Mymy ly tako man ai nai miseaung teng y, “Kai i amjo Esaw hawi avum nai kha y, ‘Nang i yhmkeung ly ami mo? Ma y chei ai nai mo? Hini tawnbawichi ly ami i nai mo?,’ nanai ang deng lawh baly,

¹⁸ Hini bawibawichi ly ‘Nang i miseaung Jakob i ne. Mymy ly areng Esaw ai langseaung pei ai nai ang pato man nai ne, mymy ly kangkhym y awm jo rai tapi,’ ” napi.

¹⁹ Hunai kamta pa-nyh i nai ai py, pa-thom i nai ai py, tawnbawi kanghuchi ai lu sa nai keungchi teng y, “hini ly Esaw hawi avum nai khala y nangchi thui pi ai nai leu ne, nanai leu pei bawibawi bo.

²⁰ Nangchi my, ‘Nang i miseaung Jakob ly kangkhym y awm jo rai, tapi,’ ” napi. Jakob ly “Hini langseaungchi deaungkho y kai ly lawira kanga ai, mymy hawi avum nai khala kai ai ang pahen ai,” nanai dawn nai ne.

²¹ Mymy ly langseaung syn naichi ai mo mang y pato chum baly huni vum ly anawn nai tai theung y i bo.

Peniel meingtym y Jakob ani nai

²² Huni vum y my Jakob ly ang thau i ajuni ai py, aju katheangni ai py, chapo leaung holai hareichi ai py, Jabbok tavo vai mang y angpeang hai bo.

²³ Aju chanauchi hawi vanrei, yhmtheaung bawibawichi ai py tavo vai mang y tha nai ne.

²⁴ Mymy leaungrei kangkhym y awm jo. Huna nai khala, khumi leaungrei tym i mymy hawi khutawi pa-rei ani bo.

²⁵ Huni khumi ly pajau y ai nai pany nai khala, amprai naimy Jakob i tangkeang y theaung i athlengthlai vui bo.

²⁶ Huni khumi ly “Khutawi ai bo i, kai ai patlaw jau,” napi. Jakob my, “Kai ai amtheaung hai y baly kang patleaung y leang,” napi.

²⁷ Huni khumi my, “Nang i amyn ly mana mo?” nanai deng; Mymy ly “Jakob,” napi.

²⁸ Huni khumi my, “Nang i amyn ly Jakob, nanai kang palau y ai. Nang ly khumi hawi py, Tameuh hawi py ani i nangmy pajau bo; hunai deaungkho y nang i amyn ly Israela ne sy,” napi.

²⁹ Jakob my, “Nang i amyn kai ai thui pi kyh,” napi. Na i py nimy ly “Ati mana nai kai i amyn pany ai nai ngai mo?” napi. Naibaly mymy ly Jakob ai amtheaung hai bo.

³⁰ Jakob my, “Kai ly mo atha leungtang naimy Tameuh ai kaniu i py kai ly heng jo rai,” nanai thui iy, huni meingtym ai Peniel, nanai amyn patho bo.

³¹ Jakob ly Peniel meingtym i theu nai khala kani si bo; ni ly tangkeang athli nai deaungkho y, ta-krawm ta-krawm naimy tako nai ne.

³² Vaini khrairei Israela kangpreangchi ly tangkeangra i atho vui cho y; ati mana nai mo nabaly Jakob i tangkeang lengli y theaung thlei vui nai deaungkho y ne.