ATITI AWM ANGCHEI NAI 3 - Khumi Common Language Bible

Khumi my leu tangai y nai

¹ Tameuh my sa nai tawnbawi cheaungkhangchi theung y, pavui ly li-tapawp naira y cheng keh nai ne. Pavui my neampachy teng y, “Tameuh my akho theung i thengthai athai cheaungkhangchi cha ai nai tlo y, ang napi nai ly ne khyp a?” napi.

² Neampachy my, “Akho theung y awm nai thengthai athai cheaungkhang kaini cha pajau.

³ Na i py akho umtang i thengthai ly Tameuh my teaung py teaung moh, cho py cho moh, cha lawh baly kaini ly dei takengkei ai, ang napi,” nanai pathang.

⁴ Pavui my, “Huni ly ny y leang, ma! dei hawi ai moh.

⁵ Nangni cha nai dengdairei hawi nai hawi y nai pany ai i, Tameuh kamta lawm lawh ai nanai, Tameuh my pany na a,” napi.

⁶ Neampachy ly thengthai keung i apu nai sai, thengthai athai py cha ai paleung ka-no awm nai sai mei y niu bo. Huni khyh ny y, tau cheng naira awm baly mana tanrei hawi ai mo, nanai dawn nai hawimy athai jaw iy cha vui nai ne. My i juvo ai py pei i, ni py cha teang.

⁷ Thengthai athai cha hawi chum baly, nini ly tlang ka-keu awm nai apany hawi i, mymyni i vui thaidu ngam sarip iy apam hawi bo.

⁸ Huni kani dym tengsa neng y Areng Tameuh ly akho theung y jeu nai katyn thai hawi i, myni ai niu y ai nai dengkeaung keungchi theung y aheu hawi vui bo.

⁹ Na i py Areng Tameuh my neampacho ai, “nang ly ma y awm mo?” nanai palau.

¹⁰ Huna nai khala neampacho my, “Akho theung y nang jeu nai katyn kathai i, tlang ka-keu nai y kai ly kang jei nai, aheu vui nai ne,” nanai pathang.

¹¹ Tameuh my, “nangni ly tlang ka-keu naimy awm, nanai ami my ang thui pi mo? Kaimy cho moh, kang napi nai thengthai athai ly cha hawi bo lo-oh?” napi.

¹² Neampacho my, “kai ai nang my pei nai neampachy my thengthai athai ang pei i kacha lawh bo,” nanai pathang.

¹³ Areng Tameuh ly neampachy teng y, “Nang ly ati mana nai y hina nai sa lawh mo?” nanai deng baly neampachy my ly “Pavui my ang parawi nai deaungkho y kacha lawh bo,” nanai pathang.

Tameuh my pajeng nai

¹⁴ Areng Tameuh my pavui teng y, “Nang ai ly hini molam y kang pajeng ai; daichi mawi bawibawi theung y nang ly amsawi lawi sy. Vai i dengdairei nang ly kajeu mang jawn iy heng nai ryrei spryh cha ai nai tla.

¹⁵ Nang hawi neampachy ly leaung leaungrei aniu ngai y ai nai kang sa; nang i kangpreang hawi neampachy i kangpreang ly paleung ka-e awm jojo ai. Neampachy i kangpreang my nang i lu y chiu piupa ai i, nang my nichi kheu patui y patiu ai,” napi.

¹⁶ Naibaly Tameuh my neampachy teng y, “Deaungdi aniu nai khala patang ai nai, deaungdi tapen nai khala y py khri pa-rei patang hai ai. Nang ly juvo i kangai awm iy, juvo i anui y leu tangai naimy awm jojo ai nai tla,” napi.

¹⁷ Naibaly Tameuh my neampacho teng y py, “Nang ly aju i leu tangai iy kai my cho moh kang napi nai thengthai ly cha lawh nai deaungkho y khaileaung ly nangmy i vui amsawi lawi bo. Nang ly kajeu ka-rei ka-leu nga ai nai nangmy deungrei patang parai naimy kalop sa ai nai tla.

¹⁸ Khaileaung i nai aleng hawi acha cheaungkhang kang prau hai ai i, huni theung i amti amjangchi cha ai.

¹⁹ Nang ai sa nai khaileaung y ali teang y ryrei ly ka-ui leaung pa-rau na pa-rei akawm parai naimy kalop sa iy cha ai nai tla ai. Nang ai khaileaung hawi sa nai ne i, khaileaung lawm ali teang ai,” napi.

²⁰ Adam my aju ai ly Evi, nanai amyn pathi; ati mana nai mo nabaly mymy ly khumi bawibawichi i amhm lawm nai deaungkho y ne.

²¹ Areng Tameuh my Adam hawi aju i vui mawi peih hawi ateaung sa pi i, nini ai ateaung hai bo.

Adam hawi Evi nini ai akho theung i patheu vui nai

²² Naibaly Areng Tameuh my, “Vai ly hini khumi ni ly hawi nai hawi y nai pany thai nai amychi kamta lawm bo. Heng hai jojo nai keung i athai cha iy heng ai nai pei y leang bo,” napi.

²³ Hunai deaungkho y Areng Tameuh my ly khumi ai Eden akho i nai patheu iy, khaileaung hawi sa nai khumi ai khaileaung y li hlau sa hai bo.

²⁴ Naibaly hengra dengkeaung sahawi y ami py ahai pajau y ai nai, amlang nanai mai haisau hawi Kherubenchi ai akho nisi ngan mang y tamcheaung amo hai bo.