ATITI AWM ANGCHEI NAI 28 - Khumi Common Language Bible

¹ Hunaibaly Isaka ly Jakob ai palau i ni teng y, “Nang ly Kanan cheng neampachy hawi yhmtheaung so moh.

² Nang ly Misopotamia pri y awm nai ngamsi Bethuela teng y chei; ngampu Labana i chaniu anglo theung i nai leaung leaungrei ai lo.

³ Ati cheaungkhang sa thai nai Tameuh ly nang ai amtheaung hai ai i, deaungdi neangneang peung hai iy nang ai khumi cheng cheaungkhangchi i ampo lawn hai sy!

⁴ Tameuh ly Abraham ai amtheaung hai nai kamta, nang i kangpreangchi ai py amtheaung hai sy; naibaly Abraham teng y Tameuh my pei nai nang i awm nai hini pri py nang amtym sy!” napi.

⁵ Isaka ly Aramean cheng Bethuela i chapo Labana i awm nai Misopotamia pri y Jakob ai pato vui bo. Labana ly Jakob hawi Esaw nini i amhm Rebeka i ampro ne.

Esaw ly aju la bi nai

⁶ Esaw ly Isaka my Jakob ai amtheaung hai iy aju hau ai nai Misopotamia pri y pato jo nai ai py, huna nai Jakob ai amtheaung naira pei nai thym khala, Kanan cheng neampachy hawi yhmtheaung so y ai nai leu taviu nai py,

⁷ Jakob ly ampo hawi amhm i leu tangai naimy Mesopotamia pri y chei jo nai py mymy ly pany bo.

⁸ Esaw ly ampo Isaka my Kanan cheng neampachy ai pom ai nai ngai hai y nai py pany nai ne.

⁹ Hunai deaungkho y Esaw ly Abraham i chapo Ismaela teng chei iy, ni i chaniu Mahalath hawi apom bo. Mahalath ly Nebaioth i tuicho ne.

Bethela meingtym y Jakob i amang amang nai

¹⁰ Jakob ly Beraseba i nai theu iy Haran mary mang y chei bo.

¹¹ Kani dym nai kha y meingtym kachaiy tym i, hu y jei bo. Mymy ly i ai nai aseaung i lengseaung harei ai lu tleang nai ne.

¹² Mymy ly amang mang y khaileaung dengdairei kani y angteu nai khailei mang kani pri amtaw thai naichi ly avum kathiu kalau nai niu bo.

¹³ Naibaly Areng ly mymy sahawi y angdo naimy, “Kai ly Abraham hawi Isaka i Areng Tameuh ne, kaimy nang i aseaung nai khaileaung ly nang hawi nang i kangpreangchi teng y kang pei ai.

¹⁴ Nang i kangpreangchi ly khaileaung salo y spryh kamta peung u ai. Nangchi i khu ka-peang ly tosyh tokalawi, nidym nisi tym pa-rei kau ai; kai ly nang hawi nang i kangpreangchi i saho y khaileaung pri y awm nai khumi bawibawichi ai amtheaung hai ai.

¹⁵ Kai ly nang hawi vanrei awm iy nang i chei naira tleirei y kaimy kang kry ai; kaimy kang awm hai ai; nang ai hini pri y kang pahawi ali teang ai. Nang hawi adeu nai leu angym y ryrei ly nang ai kang khai su y leang mang, nanai leu kang pei nai ly nang pany jo ai nai tla,” napi.

¹⁶ Jakob ly i anglaw i, “Areng ly hini meingtym y awm angchi khyp! Kai kapany y lawh ly!

¹⁷ Hini ly jei ai hawi parai nai meingtym ne na a! Hini meingtym ly Tameuh awmra yhm, kani katheu pa-kho py ne ai,” nanai jei naimy thui bo.

¹⁸ Jakob ly khawn angthodyh ang thau iy lu tleang nai lengseaung la i pany jo ai nai leng bo. Naibaly mymy ly huni lengseaung salo y olive asitui lei i, Tameuh teng y au nai ne.

¹⁹ Mymy ly huni meingtym ai Bethela, nanai amyn pathi bo. (Huni meingtym ly Luza mary kangngym ne.)

²⁰ Naibaly Jakob ly Areng teng y, “Nang ly kai hawi vanrei awm hai ly kai chei naira tleirei y kry jojo ai; teicha teineichi py, ateaungchi py kai ai pei iy,

²¹ ngaai i yhm y kai ai chymme naimy tym hai ali teang baly, nang ly kai i Tameuh ne ai.

²² Hini pany jo ai nai kai i lengseaung leng nai meingtym ly nang ai chiu nai meingtym lawm ai; naibaly nang i amtheaung hai nai theung i horei y harei kang talam jojo ai,” nanai vaineng abeu bo.