ATITI AWM ANGCHEI NAI 22 - Khumi Common Language Bible

Tameuh my Abraham teng y Isaka ai talam ai nai leu pei nai

¹ Kanirei nai khala, Tameuh my Abraham ai cham ai nai ngai i mymy ly “Abraham!,” nanai palau. Abraham my, “Ne, kai hi y awm!” napi.

² Huna nai khala Tameuh my, “Nang i chapo leaungrei awm khyh nai, nang khrei keh nai chapo Isaka ai lo ly Moria pri y chei. Kaimy kang patei nai mawi salo y nang i chapo ai kai teng y apathyp,” napi.

³ Pa-nyh kani khawn angthodyh Abraham ly apathyp ai nai i vui theng acheaung iy keaungngo kano kasau tleaung y tang i, mymy hawi vanrei Isaka ai py, miseaung leaung nyhrei ai py hawi; Tameuh my thui pi nai meingtym mang y amsa u bo.

⁴ Pa-thom kani y Abraham ly khen i, huni meingtym ai palo parai naira y niu.

⁵ Naibaly mymy ly miseaungni teng y, “Keaungngo kano kasau hawi hi y awm hawi jo. Kai hawi deaungdi ly huni mang y chei iy Tameuh ai chiu pajau baly nangni teng y kang vawi hawi ali teang ai mang,” napi.

⁶ Abraham my Isaka ai ly theng apu hai i, mymy ly mai hawi acho syn. Nini ly tako hawi nai thym kha y,

⁷ Isaka my, “Ngaai,” nanai palau. Mymy ly “Ati mo deang awi?” napi. Isaka my, “Mai hawi theng ly syn bo, na i py apathyp ai nai beram ly ma y mo?” nanai deng.

⁸ Abraham my, “Tameuh my sai sairei ka-vo dawn pi ai mang,” napi. Naibaly nini ly vanrei tako hawi bi bo.

⁹ Nini ly Tameuh my thui pi nai meingtym y tym nai khala Abraham ly maicham sa i salo y thengchi khai rym bo. Mymy ly chapo ai kawmrang iy maicham tleaung i theng salo y theng nai ne.

¹⁰ Ni ai padei ai nai mymy ly acho aphiu bo.

¹¹ Hunai thym khala Areng i kani pri amtaw thau naimy kani mang dengdairei, “Abraham, Abraham!” nanai palau. Mymy ly “Areng, kai hi y awm,” nanai pathang.

¹² Kani pri amtaw thai naimy, “Deaungdi cho ai no pei moh; ni ai ati sai py so hai moh. Vai nang ly Tameuh i leu tangai, tahm py khai, nanai kang pany bo. Ati mana nai mo nabaly nang ly nangmy i chapo leaungrei awm khyh nai ai pasai y nai deaungkho y ne,” napi.

¹³ Abraham ly khen aki prei i, beram katai harei kabeng aleng theung taki y ave thleng nai niu. Naibaly mymy ly chei iy patiu i chapo i jeng y leng patlum nai talam bo.

¹⁴ Abraham my huni meingtym ai ly “Areng my ang sa pi rym nai,” nanai amyn pathi bo. Vaini khrairei khumichi my, “Areng i mawi salo y mymy ly ang sa pi rym ai,” nanai thui u jojo nai ne.

¹⁵ Areng i kani pri amtaw thai naimy kani mang dengdairei tlen pa-nyh Abraham ai palau bi nai ly

¹⁶ “Kai, Areng my leu kang pei; kai ly nang ai khri pa-rei amtheaung hai ai. Nang ly kaimy kang pei nai chapo leaungrei awm khyh nai ai malawn py, kai teng y talam ai nai pasai y nai deaungkho y,

¹⁷ nang i kangpreangchi ly pangli spryh hawi kani mang i ka-sichi kamta kang peung hai ai. Nang i kangpreangchi ly mychi i paleung ka-echi ai eaung pajau ai.

¹⁸ Nang ly kai i leu tangai nai saho y, nang i kangpreangchi ai amtheaung hai nai kamta, khaileaung pri y awm nai khumi cheng cheaungkhangchi my py, amtheaung naira nga ai nai kai teng y takeng u ai,” napi.

¹⁹ Naibaly Abraham ly mymy i miseaungni teng y chei ali teang i, mymy i awm nai meingtym Beraseba mang y vawi u ali teang bo.

Nahora i kangpreangchi

²⁰ Kra y nai sala y Abraham ly amnau Nahora i aju Milaka my deaungdi leaung tajarei tapen, nanai thai bo:

²¹ Uz ly chalu ne, Buza ly amnau ne, Kemuela ly Aram i ampo ne.

²² Keseda, Hazo, Pildash, Jidlaph hawi Bethuelachi i ampo ne;

²³ Bethuela ly Rebeka i ampo ne. Milaka my Nahora i vui deaungdi leaung tajarei tapen pi. Nahora ly Abraham i amnau ne.

²⁴ Nahora i aju katheang Reumah my Tebah, Kaham, Tahash hawi Maakachi ai tapen nai ne.