ATITI AWM ANGCHEI NAI 14 - Khumi Common Language Bible

Abram my Lota ai atleu nai

¹ Babulon samrang Amraphela, Elasar samrang Ario, Elam samrang Kedoraloma hawi Koiim samrang Tidal napi nai samrang leaung palyhreichi ly

² Sodom samrang Bera, Komora samrang Birasa, Adamah samrang Sinaba, Zeboim samrang Semeber, Bela samrang ti y baly Zoar samrang leaung pangreichi ai tavai tiu u bo.

³ Huni samrang leaung pangreichi ai ly Sidim leaunghawi y avum i nai asa u. Huni meingtym ai vai ly pangli kadei napi nai ne.

⁴ Mymychi ly saneng holai nyh ryrei Kedoraloma i peang nai theung y awm u; na i py saneng holai thomrei saneng y, nichi ly mymy ai tiu u bo.

⁵ Saneng holai palyhrei saneng y Kedoraloma hawi mymy mang y abawi nai samrangchi ly tavai tiu i Asateroth Karnaim mary i Rephaim cheng ai py, Hama mary i Zuzim cheng ai py, Kiriathaim adym i Emim cheng ai py pajau vui iy,

⁶ Edom pri mawitleaung y awm nai Horit chengchi, daichi ka-vym y awm nai Elparan mary y tym pa-rei tleh ai nai hui u bo.

⁷ Naibaly nichi ly amki prei i Kadesa mary mang y vawi u ali teang. (Huni ly Enmisapa mary napi.) Nichi ly Hazazon Tamar mary y awm nai Amori chengchi ai py, Amalek chengchi i pri verei y py tiu i eaung bo.

⁸ Naibaly Sodom samrang, Komora samrang, Adamah samrang, Zeboim samrang hawi Bela samrangchi ly Sidim leaunghawi y tavai tiu ai nai tavaimichi ai palau u ali teang bo.

⁹ Elam samrang, Koiim samrang, Babulon samrang, Elasar samrang leaung palyhreichi ly samrang leaung pangreichi hawi tavai atiu u nai ne.

¹⁰ Huni leaunghawi theung y ly angawmchi, ketara humchi khri pa-rei awm nai deaungkho y Komora samrang hawi Sodom samrang ly tavai atiu nai thym khala y angpreng hawi vui i, huni angawm theung y tla hawi mei bo; na i py samrang leaung thomrei ly mawi mang y angpreng u i tleaung u nai ne.

¹¹ Tavai eaung nai samrang leaung palyhreichi ly Sodom hawi Komora samrang i teicha teineichi hawi atitichi la pi pawn iy tako u veng bo.

¹² Abram amnau i chapo Lota ly Sodom mary y awm nai ne; nichi ly Lota ai patiu iy, yhmtheaungchi la pi pawn bo.

¹³ Na i py khumi leaungrei ly tleaung i, Amori pri Mamre i peang nai dengkeaung thengreung sahawi y awm nai Hebrai cheng Abram teng y thui pi. Mamre hawi amnau Esakola hawi Anerchi ly Abram hawi nai asa naichi ne.

¹⁴ Abram ly amnau i chapo ai patiu vui bo, nanai thai i mymy i tavaimi leaung 318 rei palau iy samrang leaung palyhreichi ai Dan mary tym pa-rei hui bo.

¹⁵ Naibaly mymy i tavaimichi ai amkawm hai akyhkyh iy vum y paleung ka-echi ai tiu u nai ly eaung bo. Damaska tosyh Hobah mary khrairei hui u.

¹⁶ Paleung ka-echi my la pi pawn nai vawnchi nga bawibawi teang. Mymy i amnau i chapo Lota hawi yhmtheaungchi, neampachychi, langheng hawi naichi ai py hawi u ali teang bo.

Melkhizadeka my Abram ai amtheaung hai nai

¹⁷ Abram ly Kedoraloma samrang hawi takhra samrangchi ai pajau nai bo y vawi ali teang i, Sodom samrang ly Shaveh leaunghawi y Abram ai lamchung ai nai chei bo. (Huni meingtym ai ly samrang i leaunghawi, nanai py palau.)

¹⁸ Naibaly salo kangteng Tameuh i pathyp pi nai keung Salem samrang Melkhizaedeka my tako hawi kreip hang Abram teng y syn pi;

¹⁹ “Kani hawi khaileaung sa nai keung, salo keh i Tameuh my Abram ai amtheaung hai sy,” nanai thui i amtheaung hai bo.

²⁰ “Nang i paleung ka-echi ai sum hai nai keung salo kangteng Tameuh teng y palo nai awm sy!,” napi. Naibaly Abram ly Melkhizedeka teng y tavai atiura i nga nai vawnsaichi theung i horei y harei talam bo.

²¹ Sodom samrang my Abram teng y, “Tavai tiura i nga nai vawnsaichi ly lo teu; na i py kai i khumi bawibawichi ai ly pei ali teang ba,” napi.

²² Abram my ni teng y, “Kani hawi khaileaung sa nai keung salo keh Areng Tameuh i mei ka-niu y vai kai vaineng abeu mang.

²³ Nang i vawn nanai ly phainai vui harei py, ti y baly kalang vui amairei py lo y leang mang; kai my Abram ai nang hai nai na a! ti lawh na.

²⁴ Kaimy i vui ati sai py kang lo pi y leang; kai my i khumichi i la nai kamthum naini kala khyh. Na i py kai hawi nai asa naichi Aner, Esakola hawi Mamrechi amji u sy,” napi.