AMTENG HAI NAI 3 - Khumi Common Language Bible

Sardisa palau takhra i vui tajiu nai

¹ “Naibaly Sardisa avang i kani pri i amtaw thau nai teng y hinai kamta tajiu: ‘Tameuh i Phailo saryhreichi hawi, ka-si saryhrei awm nai keung i leu thui nai ly hini ne he: Nang i atiti sa naichi ly kapany; nang ly heng, nanai amyn amthang teu i py dei nai ne.

² Atyp ly, vai khrairei awm nai, atiti dei vi dei vi nairachi ai khaw hai, ati mana nai mo nabaly nang i atiti sa naichi ly Tameuh i mei ka-niu y angym nai kaniu y leang.

³ Nang i nga chum nai hawi thai chum nai py adawn vau ly; huni ai ly patawm jojo iy uikhei ly. Naibaly nang ly atyp y baly kai ly khumi kangviu kamta kang jeu ai, naibaly kai i kang tym ai nai neng nang pany ai ny y.

⁴ Ne mang ly nang ly Sardisa avang y mychi i ateaung eng hai nga y nai amyn phyreichi awm: nichi ly ataing nai deaungkho y ateaung kangleung amthyp naimy kai hawi vanrei aleaung ai.

⁵ Pajau nai keung ai ly hunai kamta ateaung kangleung amthyp hai ai, naibaly heng naira cha-iu theung i nai mymy i amyn kataphra pi ai ny y: Ngaai i mo y hawi, ni i kani pri i amtaw thau naichi i mo y py mymy i amyn ly kaimy asa hai ai.

⁶ Kano awm nai khumi ly palau takhra kamkawmchi teng y Phailo i leu thui nai ly thai sy,’ napi.

Philadelphia palau takhra i vui tajiu nai

⁷ “Naibaly Philadelphia avang i kani pri i amtaw thau nai teng y hinai kamta tajiu: Chai naira awm nai hawi, meitang awm nai keung, Davida i saw awm nai, paeaung iy ami py kho pajau y nai, kho iy ami py paeaung pajau y nai i leu thui nai ly hini ne he:

⁸ Nang i atiti sa naichi ly kapany ; khen cham, ami py kho pajau y nai katheu am-eaung angchi nai ly nang i mo y kakhai pi bo; nang ly sa thai naira neangneang by y i py, kai i leu patawm iy kai i amyn apha y, nanai kapany.

⁹ Khen cham, Juda tatang ny y naimy, ka-chawi thui iy Juda angam nai Setan i achu nai kamkawmchi ai ly, khen cham, nichi kypkyp ai ly nang teng y katym hai iy, nang i kheu keung y ambeu hai ai i, nang ai katamen, nanai nichi ai kang pany hai ai.

¹⁰ Nang ly kai i kham tanga nai leu patawm nai deaungkho y, khaileaung pri y awm naichi ai cham ai nai, khaileaung pri verei y tym ai cham nai neng y ly kapalawi ai.

¹¹ Kai kang jeu praw ai:ami py nang i areng lukhym lo pi y ai nai nang i atiti awm angchi nai ly patawn cheng.

¹² Pajau nai keung ai ly kai i Tameuh i achura yhm y ly yhmmawm kapalawn ai i, ni ly hu i dengdairei ly tlen py theu bi ai ny y; naibaly ni tleaung y kai i Tameuh amyn hawi, kai i Tameuh teng i nai satla kathiu nai Jerusalem kangtha i amyn hawi, kaimy i amyn kangtha py katajiu ai.

¹³ Kano awm nai khumi ly palau takhra kamkawmchi teng y Phailo i leu thui nai ly thai sy,’ napi.

Leiodikeia palau takhra i vui tajiu nai

¹⁴ “Naibaly Leiodikeia avang i kani pri i amtaw thau nai teng y hinai kamta tajiu: ‘Areng lawn nai, pany hai nai keung ka-ym awm nai hawi meitang, Tameuh i atiti sa nai pakeung i leu thui nai ly hini ne he:

¹⁵ Nang i atiti sa naichi ly kapany: nang ly savai py savai y, bi py bi y. Nang ly savai nai py ne sy, bi nai py ne sy kang ngai hai.

¹⁶ Hunaibaly nang ly bi py bi y, savai py savai y nai bi um nai deaungkho y, kai i labeaung i nai kapathawi vui ai.

¹⁷ Nang my ly, Kai ly nang chy bo: yhmtheaung py awm, ati sai py katakang y leang, nanai thui; naibaly nang kypkyp ly ngari py tla, pahen ai nai py awm parai, kamawn py kamawn, mei py paju, beng tlenrei py ne, nanai nang pany y.

¹⁸ Hunai deaungkho y nang ly nang naira nga thai ai nai, mai y pachai chum nai muku hawi, nang i beng tlairei awm nai kangji kangngai nai sai amteng y ai nai ateaung kangleungchi amthyp thai ai nai hawi, nang i mei y atamui nai rimui py kai teng y van ai nai kadawn hai.

¹⁹ Kai i tamen nai ngiereichi ai ly parip py kang parip, chip py kang chip: hunai deaungkho y atho sa jojo iy, uikhei ly.

²⁰ Khen cham, kai ly katheu ahawi y angdo i katakhei: ami py kai i raawi thai iy katheu paeaung pi baly, kai ly mymy teng y kun iy mymy teng y biu cha ai i, mymy py kai teng y cha teang ai.

²¹ Kai ly pajau i Ngaai teng y ni i areng atehra y ka-teh nai kamta ly, pajau nai keung ai ly kai teng y kai i areng atehra y ka-teh hai ai.

²² Kano awm nai khumi ly palau takhra kamkawmchi teng y Phailo i leu thui nai ly thai sy,” napi.