Zakaariyaasi 9 - Kafa Linguistics Project

Israꞌeeleenaꞌochi Etteenaꞌo Toommooch Woyemmi Nalloo

¹ Ebi Doono Yeeri gettiti wochoone: Doono Yeeri Israꞌeelee yoodeenaꞌon, asheenaꞌo bullinoo ciinnii beetone. Doono Yeeri Hadiraakee showoonaa Damaasiqi katemoonochi toommooch nallemmone.

² Ebi nalloo Hadiraaki danooch beeti Hamaati katemee toommooch, wotta ariyechi asheenaꞌochi katemeenaꞌo tuneti Xiroosinaa Sidooninochi toommoochoo kindemmone.

³ Xiroosi asheenaꞌo boonoshi katemooch mishigoon shuunetinaꞌone. Quttoonaa gommi gasheexi dengoona woddoommon woddeti aachoonaa birewoonon gutitinaꞌone.

⁴ Tunebaani Doono boonoshi hajjito bullin tiijjemmone; boonoshi gaannoonoo baharo qooxxemmoyich tuniyemmone. Ebi boonoshi katemoo qaaqqoona miccemmone.

⁵ Ashiqelooni asheenaꞌo ebin beegiree shattemminaꞌone. Gaazi asheenaꞌo ebin beegiree gaashillemminaꞌone. Eqirooni asheenaꞌoo ebiyoommon tuneree, boonoshi gibenoon kuxxemminaꞌone. Gaazi bi taatoon muccemmone. Ashiqelooniyoo ashaalli shokkoon tunemmone.

⁶ Baribare showee asheenaꞌo Ashidood kotemminaꞌone. Doono Yeeri ishichiye: “Filsixeemeenaꞌochi geecoon shoottemmo taane.

⁷ Damoon boonoshi noonooch boonoshi bechaachemmoyich, eeꞌe maayoonoo boonoshi maataachemmoyich tuniyemmo taane. Curo tuneꞌi echeti boonoshi asheenaꞌo ta asheenaꞌona tookki bacceeree Yihudi yoodoochee ikke gumboommon tunemminaꞌone. Eqiroonee asheenaꞌo Yebusee asheenaꞌochoommon ta asheenaꞌona tookki bacceyemminaꞌone.

⁸ Ginee naayinaꞌo aroona okk hach boonoshi besheyaachemmoyich, ta showee guudoon quyemmo taane. Ta asheenaꞌo duꞌoon ta hajjee aafoona ta beeggetoyich, giidechinaꞌo ebiyee bekk boonoshin neexi hajjaachemminaꞌone” iye.

Woyemmi Taatoo Mooyo

⁹ Tsiyooni asheenaꞌote, oogichi emiribote! Yerusaalemi asheenaꞌote, ililibote! Ittoshi taatoo, cadiqoonaa kochii wochechona gaꞌi deꞌo tunee, kuroon yebbee, kureechi bushoon yebbee, ebiyoche, ittoshi waan waa beetone.

¹⁰ Doono Yeeri ishichiye: “Gaarinaꞌon Efreemee showoochee, ginee haresheenaꞌon Yerusaalemee, aalliyemmo taane. Ginee koyee maꞌoonoo tiichemmo taane. Ittoshi taatoo diggoon aageteenaꞌoyich awaajjemmone. Bi taatittino, baharoochee baharooch bedo, Efiraaxisi aacoochee showee tuggooch bedo, tunemmone” iye.

Doono Yeerichi Asheenaꞌo Kecoochee Wotto

¹¹ Doono Yeeri ishichiye: “Neenna tookkaa damoona wogoon ta giyetoyich, cucheeti ne asheenaꞌon aachaalli oppoochee biishi gawukkemmo taane.

¹² Gibenoona beeti hini qoppeenaꞌote! Ittoshi mishigooch wottebote! Gutte kishoo tuniiree ittoshin diiremmo ta tunoon ta and ittoshich gettoye.

¹³ Yihudee asheenaꞌon maꞌoommon, Efreemee asheenaꞌonoo shangoommon, tuniyemmo taane. Giriikee asheenaꞌon koyoyich, Tsiyoonee asheenaꞌon goraadoommon tuniiree daachiyemmo taane” iye.

¹⁴ Doono Yeeri boonoshi toommoochaa bekkemmone; bi shangoo xeeyoochoommon awureyemmone. Nuggishoo Doono Yeeri tiree qaaroon waayiyemmone; deshi-waani yubee yongoona hammemmone.

¹⁵ Beshe Mawe Doono Yeeri boonoshin quyemmone. Boonoshi etteenaꞌonoo aalliyemminaꞌone. Etteenaꞌochi xeppellee xaqqoon neexxemminaꞌone; woyinee uyoon uchii masheti ashichoommon cookemminaꞌone. Boonoshi etteenaꞌochi damoo, deejjee damoo saanooch ceenniꞌi ufoommon ufemmone.

¹⁶ Ebi aabo shagiyooba, qiddoo bi bagoon bi wodiyoommon, boonoshi Nuggishoo Doono Yeeri bi asheenaꞌon wodiyemmone. Gubbichee toommooch beeti shasho waccoommon boonoshiyoo bi showoochaa waccemminaꞌone.

¹⁷ Am shaahoon malletee gaaweheete! Arooch beeti maayoonaa woyinee uyoona, gurimaashe anaaminaꞌonaa maacheenaꞌonon uummiyemmone.