Zakaariyaasi 8 - Kafa Linguistics Project

Yerusaalemi Wochinnoon Shuuneyemmi Tuno Gibenikkeyoo

¹ Beshe Mawe Doono Yeeri taach ishichiye:

² “Beshe Mawe Doono Yeeri ta ishichaabeeto taane: Tsiyooni katemoyich oogeti qanaato taan yechitone. Bi etteenaꞌon ta kaaremmoyich tuniiti qanaatoon qanaateto taane” iye.

³ Doono Yeeri ishichiye: “Tsiyooni katemooch wottemmo taane; Yerusaalem beeyemmo taane; Yerusaalemiyoo Gibeneeti Katemee, getaa ceekkemmine. Beshe Mawe Doono Yeeri ta guudo Yaafeeti Guudo getaa ceekkemmone” iye.

⁴ Beshe Mawe Doono Yeeri ishichiye: “Geeneti genneenaꞌonaa doonjeenaꞌona wochinnoon Yerusaalemi addibaabooch kotemminaꞌone. Boonoshi ikkikkoona geenee baayoochee tiyitona tugoon tugemminaꞌone.

⁵ Arooch kaachiibeeti anaami bushiisheenaꞌonaa maache bushiisheenaꞌona katemee addibaabeenaꞌooch ceennemminaꞌone” iye.

⁶ Beshe Mawe Doono Yeeri ishichiye: “Ebiyooba ebi mooyo curo tuneꞌi echeti asheenaꞌoyich worganikkito tuneꞌi bekkoon hakkiye; tunebaani taach worganikkiton tuneꞌi bekkoon hakkaache” iye Beshe Mawe Doono Yeeri.

⁷ Beshe Mawe Doono Yeeri ishichiye: “Ta asheenaꞌon aabi-keyo waani showoonaa aabi-gimo waani showoonoochee biishemmo taane.

⁸ Yerusaalem boonoshi beeyemmoyich boonoshin wochi deebemmo taane. Boonoshiyoo ta asheenaꞌo tunemminaꞌone; tawoo gibeneeti, cadiqe boonoshi Nuggishoo tunemmo taane” iye.

⁹ Beshe Mawe Doono Yeeri ishichiye: “Beshe Mawe Doono Yeeri ta yaafee kechi heco hecheehooba keemechinaꞌo keemmiti keemoon and beddaahaa waayeebeeti ittoshi, yaafee kexon shuunoyich ittoshi mochoon kupphiibote.

¹⁰ Ebi aroyee aaf ashich shumaayoo, gijjoyichoo kiraayoo qocheyaanoone. Asho bulli ikkoo baroo toommooch bi tiyemmoyich ta tuniitoyich, kechii beetonaa giyii beetona konichona diggoo aalloone.

¹¹ Tunebaani and, ebiyee aaf ta tuniitoommon hini curo tuneꞌi echetinaꞌo toommooch tuniyaachemmo taane” iye Beshe Mawe Doono Yeeri.

¹² “Boonoshi maayi yaroon diggoona shookkemminaꞌone; boonoshi woyinoo aafemmone. Showoo maayoon shakkiyemmone; amiyo shimaayoochee dihemmone. Ebi bulli mooyon curo tuneꞌi echeti ta asheenaꞌo woraashemmoyich tuniyemmo taane.

¹³ Yihudee asheenaꞌonaa Israꞌeeleenaꞌonote, aageteenaꞌo daggooch uppetooch haddeeto ittoshine; tunebaani and ittoshin wodiyemmo taane. Ittoshiyoo diiroo tunemmo ittoshine. Shattaahote; ittoshi mochoo niraaye” iye.

¹⁴ Beshe Mawe Doono Yeeri ishichiye: “Ittoshi qaabbechinaꞌo taan oogichii boonoshi ippiihooba ikke amoonolla ayinaanoon boonoshi toommooch gondoon tuniiya maacceto taane.

¹⁵ Tunebaani and Yerusaaleminaa Yihudinoyich ebiyoommon gaawe mooyon tuniiya maacceto taane; illa shattaahote.

¹⁶ Ittoshi tuniyemmi mooyinaꞌo eboshine: Ittoshinaa ittoshina ibere yibbaatoon yibbaatebote; ittoshi addibaaboochaa diggoon deebemmi, ibere nalloon nallibote.

¹⁷ Ittoshi mulloona ikkoo baroyich gondoon gabaaye; kootoon wogeyaahote. Eboshi bullin tiyaaraabeeto taane” iye Doono Yeeri.

¹⁸ Beshe Mawe Doono Yeeri taach ishichiye:

¹⁹ “Awuddinnee agenooch, uuchinnee agenooch, shabaattinnee agenoonaa aashirinnee agenoonooch coomeebeeti coomoo Yihudee asheenaꞌoyich emiree baaree aabo, emiroona wucwuci baaree aabo tunemmone. Tunebaani ittoshi iberittinoonaa diggoona beemonon shunote” iye.

²⁰ Beshe Mawe Doono Yeeri ishichiye: “Meeti katemoochee dofee asheenaꞌo woyemminaꞌone.

²¹ Ikke katemooch beeti asheenaꞌo bare katemooch beeti asheenaꞌo waan hamiree, ‘Doono Yeerin qolloyich, Beshe Mawe Doono Yeer waan wottoyich no hammaa beetoyich, ittoshi waataa hambone’ gettemminaꞌone.

²² Dofee asheenaꞌonaa giidechi aageteenaꞌona, Beshe Mawe Doono Yeeri ta waan wottoonaa qolloonoyich Yerusaalem woyemminaꞌone” iye.

²³ Beshe Mawe Doono Yeeri ishichiye: “Ebiyooba baribare noonoona yibbaateebeeti aageteenaꞌoochee, aashire asheenaꞌo ikke Ayihudo waan waa, bi qoreddee caappoon yeshiichi, ‘Yeeri ittoshina tookkii beeto bi tunoon no waayetoyich ittoshina tookki hambone’ gettemminaꞌone” iye.