Zakaariyaasi 7 - Kafa Linguistics Project

Doono Yeeri Deꞌaani Coomoo

¹ Taatoo Daariyoosi taateti awuddinnee natooba, Kisilewi getteebeeti yiixiyinnee agenee awuddinnee qemooba, Doono Yeeri Zakaariyaasich gettiti qaaro ebine.

^2-3 Beeteeli katemee asheenaꞌo, Sharetseerinaa Regem Meleekinon boonoshina tookkii beeti asheenaꞌona tookkii, Beshe Mawe Doono Yeerichi yaafee kexooch daachiiheete. Ebiyoo Doono Yeerin boonoshi qollemmoyich, wotta qeesheenaꞌonaa keemechinaꞌonon “Meeti naton tuniibee no echetoommon, uuchinnee agenooch eefonaa coomoona nooch qaawiyehe?” getiree boonoshi echemmoyichiye.

⁴ Aroochee Beshe Mawe Doono Yeeri taach ishichiye:

⁵ “Showee asho bullinaa qeesheenaꞌonoyich ishichibe: ‘Besheti shabe natinaꞌooch, uuchinnee agenoonaa shabaattinnee agenoonooch ittoshi coomitonaa ittoshi eeppitona iberoochaa taachiye?

⁶ Maa uchiibee ittoshi echeto ittoshi qelloon emirikkoyich toone?

⁷ Yerusaalemi bi guudoona beeti bi katemeenaꞌona tookkii diggee gaannaꞌa bi beehooba, Negeebi barahoonaa Shefeeli worebe showoonooch asho koteꞌi beehooba Doono Yeeri ta ebiyee aafi keemechinaꞌona ta getteti qaaro ebi toone?’ itone gete” iye.

Kecco Waato Yeerich Deꞌa Getti Qayona Bi Tuno

⁸ Doono Yeeri Zakaariyaasich wochinnoon gettiti qaaro ebine. Biyoo ishichiye:

⁹ “Beshe Mawe Doono Yeeri ta, ta asheenaꞌoyich ishichiyoye: ‘Ibere nalloon nallibote; ittoshinaa ittoshina ariqqeebote; shoodeeshoo getote.

¹⁰ Xuumeenaꞌon, nihaalleenaꞌon, dallaaweenaꞌon, girechinaꞌonoo xuqqaahote; ittoshi mulloona ikkoo baroyich gondoon gabaaye’ iyoye.

¹¹ “Tunebaani boonoshi taach boonoshi gubboon wochiꞌi waayemmon qajjiyeete; boonoshi waamonoo oppeheete.

¹² Boonoshi mulloon xaqqo tuniiꞌi, Beshe Mawe Doono Yeeri ta, ebiyee aafi ta keemechinaꞌona tunaꞌa, ta Ayaanoona ta deejjiti sheeroonaa qaaroonon waayemmon qajjiyeete. Ebich Beshe Mawe Doono Yeeri ta, oogichii kaarehoye.

¹³ “Ta getaa waayoon boonoshi qajjitoyich, tawoo, taan boonoshi ceeggiyooba waayoon qajjehoye.

¹⁴ Boonoshi ariyaani aageteenaꞌo bulli daggooch yubee yongoona boonoshin shaccehoye. Showoo ashaalli shokkoon tunehe. Koniyoona arooch okk hach shaꞌemmo aallehe; ebina gaawe showoon shokko echiiheete” iye.