Zakaariyaasi 6 - Kafa Linguistics Project

Zakaariyaasi Yaaꞌoona Awudde Gaarin Beego

¹ Wochinnoon kaama ciinnaꞌa, awudde gaari gutte guudochi gutte daggoochee kechii boonoshi beetaa beeggeho. Guudinaꞌoo gooshee guudinaꞌone.

² Batti batti gaari geecheebeeto ceelle haresheenaꞌona, guttinnee gaari geecheebeeto aaꞌi haresheenaꞌona,

³ keejjinnee gaari geecheebeeto nacce haresheenaꞌona, wotta awuddinnee gaari geecheebeeto baandere haresheenaꞌonane; bulliyona giidechinaꞌone.

⁴ Taanna tookkii yibbaateebeeti maraakoon, “Ta doonocho, eboshi ameenaꞌone?” iyaꞌa echeho.

⁵ Maraakoo taach “Eboshi neexee boonoshi maddeebeeti, showoo bullichi Doono Yeeri aafoochee kechii waabeeti, shimaajji awudde yongeenaꞌone.

⁶ Aaꞌi haresheenaꞌona geecheebeeti gaari, dambi-waani showooch, nacce haresheenaꞌona geecheebeeti gaari, aabi-gimo waanee showooch, baandere haresheenaꞌona geecheebeeti gaari, deshi-waani showooch hammemminaꞌone” iye.

⁷ Ebi nagixiibeeti haresheenaꞌo kechiꞌi showoon guudda afaafineheete. Maraakoo “Hamiree showoon guudote” iye. Boonoshiyoo hammiꞌi showoon guuddiyeete.

⁸ Ebiyee gubb maraakoo “Dambi-waani showooch hammiti haresheenaꞌo Doono Yeeri kaaro aqqemmoyich tuniitinaꞌone” iꞌi ta waan cookiye.

Yaasi Gubbichoon Uko

⁹ Doono Yeeri taach ishichiye:

¹⁰ “Baabloonee waati keceenaꞌo, eboshiyoo Helidaayi, Xobbiyaahinaa Yedaayina waanee aachoonaa birewoonon deꞌe; arooboo Sofoniyaasichi bushoo Yosiyaasi kexooch hambe.

¹¹ Boonoshi waanee aachoonaa birewoonon deꞌiree gubbichoon shuunebe. Ebi aroon Yehotsedeeqichi bushoo, qeeshee guudo Yaasichi shimbooch ukiibe.

¹² Biichoo Beshe Mawe Doono Yeeri ishichiye: ‘Bi shigo Ato getteeti asho hinine; biyoo bi xaaꞌoochaa gafgappemmone. Doono Yeerichi yaafee kexonoo haggemmone.

¹³ Doono Yeerichi yaafee kexon haggemmo biine. Taatee oogoon deꞌiree, taatee qeenooch koteechi bi asheenaꞌon qeejjemmone; bi taatee qeechi gaꞌoochoo qeeshoon tunemmone. Guttiyona ikkittinoona, diggoona shuunemminaꞌone’ itone gete.

¹⁴ Gubbichoo Helidaayich, Xobbiyaahich, Yedaayinaa Sofoniyaasichi bushoo Heninoyich, Doono Yeerichi yaafee kexoochaa shalligichoo tunemmone.

¹⁵ Wohooch beetinaꞌo waaree Doono Yeerichi yaafee kechi shuunoon gaachemminaꞌone. Beshe Mawe Doono Yeeri taan wocheto bi tunoon ebiyooba ariyemo ittoshine. Ittoshi Nuggishoo Doono Yeerichi qaaroyich mulloochee tiijjiꞌi deꞌa ittoshi getigaata ebi tunemmone” iye.