Zakaariyaasi 5 - Kafa Linguistics Project

Zakaariyaasi Yaaꞌoona Macaafoon Beego

¹ Wochinnoon kaama ciinnaꞌa, qoddeti macaafo yongee toommooch yoobbii beeton ciinneho.

² Maraakoo “Amooniye ne ciinnaabeeto?” iꞌi taan echehe. Tawoo biich, “Ta ciinnaabeeto bi neexo hiye hiroo, bi maacoo aashire hiroo tuneti, yongee toommooch yoobbiibeeti qoddeti macaafooniye” iyaꞌa wochiyo.

³ Aroochee bi taach ishichiye: “Ebi arooch showee toommo bulliich woyemmi ufo kooreetone; ebi macaafooch ikke baddaa kooreetoommon gaajjiibeeto bulli aallemmone; wotta bare baddaa kooreetoommon, kootoon wogeebeeto bulli aallemmone.

⁴ Beshe Mawe Doono Yeeri ishichiye: ‘Ufon deejjemmo taane; ebi ufoo gaayo kexonaa ta shigoona kootoon wogeebeeto kexonooch giyemmone; aroochoo beeyemmone. Bi mixonaa xaqqoonon echiyaanoon kexon aalliyemmone’ itone” iye.

Zakaariyaasi Yaaꞌoona Mokkooch Beeti Ureen Beego

⁵ Taanna tookkii yibbaateebeeti maraakoo ta waan giddeꞌi “Kaama ciiniree, ebi waabeeti mooyo amo gaata beege” iye.

⁶ Tawoo “Ebi amoone?” iyaꞌa echeho. Biyoo “Ebi mokkoone; ebi mokkooch beeto showee toommo bulliich beetinaꞌochi xuꞌoone” iye.

⁷ Xuuree guufo gaxxeemmona ikke ure mokkee maacooch kotaꞌa beetin beeggeho.

⁸ Maraakoo taach “Ebi ure gondeechi shaahiyeene” iye. Aroochee mokkee maacooch ureen xuqqii giijjiye. Xuuree guufoonoo mokkee toommooch wochii guuppiye.

⁹ Aroochee kaama ciinnaꞌa, gutte genneenaꞌo ta waan waa beetaa beeggeho. Yongoo boonoshi qoshooch beetone. Boonoshi qoshoo maannaakkee qoshoommi kupphoone. Ebi genneenaꞌo mokkoon showoochee tiijjii shimaayooch yoobbiyeete.

¹⁰ Taanna tookkii yibbaateebeeti maraakoon, “Mokkoon boonoshi daammiibeeto amoochiye?” iyaꞌa echeho.

¹¹ Biyoo taach, “Kexon biich hagga Baabloonee showoochiye boonoshi daammiibeeto. Kexo hagaa qannitoyee gubb mokkoon arooch kotiyemminaꞌone” iꞌi taach wochiye.