Zakaariyaasi 4 - Kafa Linguistics Project

Zakaariyaasi Yaaꞌoona Aachee Maqirajjoon Beego

¹ Taanna tookkii yibbaateti maraakoo wottee waaꞌi, tokketeti ashoon tiijjoommon taan tiijjiye.

² Aroocheenoo taan “Amooniye ne ciinnaabeeto?” iye. Tawoo “Bi hullimallo aachoo tuneti maqirajjooniye ta ciinnaabeeto; zayitee qullo bi toommooch beetone; shabaatte ceecheenaꞌoo biich beetinaꞌone; ceecheenaꞌo boonoshi ikkikkoyich woshiqoo giyemmi shabaatte aaheenaꞌo beetinaꞌone.

³ Ebi maqirajjee gaꞌooch gutte zayitee mixinaꞌo beetinaꞌone; ikkoo qulloyee qanne badd, wotta ikkoo qulloyee yooche badd beetone” iyo.

⁴ Taanna tookkii yibbaateebeeti maraakoyich wochaꞌa, “Ta doonocho, eboshi ameenaꞌone?” iyo.

⁵ Taanna tookkii yibbaateebeeti maraakoo “Eboshi bekkiibeeto amoon gaata ariyaachine?” iye. Tawoo “Ta doonocho, ariyaano taane” iyo.

⁶ Aroochee taach ishichiye: “Zerubabeelich getteeti Doono Yeerichi qaaro ebine: ‘Zerubabeelo, ebin ne tuniyemmo ta Ayaanoonalli hakkoona woyee giidoona toonoone’ iye Beshe Mawe Doono Yeeri.

⁷ “Ooge geppoocho, ne amo neene? Zerubabeeli aafooch naqqe gaddoon tunemmo neene. Asheenaꞌo, ‘Am shaahoon gaawehe! Am shaahoon gaawehe!’ geti boonoshi cooki beetaa, aroo taci xaqqoon kichi kotiyemmone” iye.

⁸ Wotta Doono Yeeri taach gettiti qaaro ebine:

⁹ “Hini kechi hecoon heccito Zerubabeeline; biyoo hini kexon hagi qanniyemmone. Aroochee boonoshi waan neen wochee daachiito Beshe Mawe Doono Yeeri ta tunoon ta asheenaꞌo ariyemminaꞌone.

¹⁰ “Giisheche mooyo tuneebeeti aaboon hoxeebeeto konine? Asheenaꞌo tumbin Zerubabeelichi kishooch boonoshi beegiyooba emiremminaꞌone. “Ebi shabaatte ceecheenaꞌo showoo bulliich guuddiibeeti Doono Yeerichi aafeenaꞌone” iye.

¹¹ Aroochee maraakoon “Maqirajjee qanne baddinaa yooche baddinooch beeti ebi gutte zayitee mixinaꞌo ameenaꞌone?” iyaꞌa echo.

¹² Daakkaꞌa biich, “Gutte aachee toongeenaꞌochi gaꞌooch beeti, zayitoon ukkiibeeti ebi gutte zayitee ateenaꞌo wotta ameenaꞌone?” iyo.

¹³ Biyoo taach “Eboshi ameenaꞌo gaata ariyaachine?” iye. Tawoo “Ta doonocho, ariyaano taane” iyo.

¹⁴ Biyoo taach “Eboshi showoo bullichi Doonoyich maddeya huutteeti gutte asheenaꞌone” iye.