Zakaariyaasi 3 - Kafa Linguistics Project

Zakaariyaasi Yaaꞌoona Qeeshee Guudoon Beego

¹ Bare yaaꞌoona qeeshee guudo Yaasi Yeerichi maraakoo aafooch neexeꞌi bi beetaa Doono Yeeri taach bekkiihe. Sheexaanoo Yaasin taggeya bi qanne badd neexeꞌi beehe.

² Doono Yeerichi maraakoo Sheexaanoon “Sheexaanoocho, Doono Yeeri neen kaarebe; Yerusaalemin kaacciti Doono Yeeri neen kaarebe. Hini uro qaaqqoochee kechiti ciifoommo toone?” iye.

³ Yaasiyoo wooreti tahoon taheꞌi maraakoo aafooch neexee beehe.

⁴ Maraakoo bi aafooch neexee beetinaꞌon “Ebi uro taheti wooreti tahoon shootote” iye. Yaasinoo “Ne axaaxoon ne waanee wokkiito taane; gaawe tahoonoo neech tajjemmo taane” iye.

⁵ Tawoo “Xalloo tuneti qelli caacoon bi qellooch caacote” iyo. Doono Yeerichi maraakoo arooch neexeꞌi beetaa, xalle qelli caacoon bi qellooch caacciyeete; tahoonoo tajjiyeete.

⁶ Aroochee Doono Yeerichi maraakoo Yaasich ishichiye:

⁷ “Beshe Mawe Doono Yeeri ishichiye: ‘Ta gommona ne hamigaata, ta getoonoo ne waayegaata, ta yaafee kexonaa bi addibaaboonooch ukkiroo tunemmo neene. Ebi neexee beetinaꞌona tookki tunee xaaꞌoon neech immemmo taane.

⁸ “ ‘Qeeshee guudo Yaaso, ebin waayebe; ebi neenna tookkii maddeebeeti, gubb woyemmi deꞌe mooyoyich malletoo tuneti asheenaꞌoo ebin waayebeete: Ebiyoche, Ato getteeti ta guunon deejjemmo taane.

⁹ Yaasi aafooch ta kotiiti xaqqo ebiyoche, ebi ikke xaqqooch shabaatte aafo beetone. Are xaqqoochoo qiici kooremmo taane. Hini showee xuꞌoon ikke qemona aalliyemmo taane’ iye Beshe Mawe Doono Yeeri” iye.

¹⁰ Beshe Mawe Doono Yeeri ishichiye: “Ebiyooba ittoshi asho bi ikkikkoona bi woyinoonaa bi balaasoonochi baatooch tuneechi bi giyoon ataallemmone” iye.