Zakaariyaasi 2 - Kafa Linguistics Project

Zakaariyaasi Yaaꞌoona Qeellee Woderoon Beego

¹ Bare yaaꞌoona kaama ciinnaꞌa, qeellee woderoon bi kishooch yechiti uroon beeggeho.

² Tawoo “Amoochiye ne hammaabeeto?” iyaa biin echo. Biyoo “Yerusaalemin qeelliyane ta hammaabeeto; qeelleree bi gidoonaa bi maacoona ambicho gaata beeggane” iꞌi taach wochiye.

³ Taanna tookkii yibbaateebeeti maraakoo aaf qaxirimmona, bare maraakoo biinna daneya waahe.

⁴ Biichoo ishichiye: “Woci hamiree qeellee woderoon yechiti ebi gurimaashoyich, ‘Bi daggooch beeti ashoonaa gijjoonochi meetoochee tiyitona Yerusaalemi uxeraalli katemoon tunemmine’ gete!

⁵ Doono Yeeri ‘Ebi katemee guudoona qaaqqee uxeroon tunemmo taane; ta oogee yiiroona bi daggooch beeyemmo taane’ itone” iye.

Keccetinaꞌo Boonoshi Showooch Boonoshi Wottemmoyich Ceekko

⁶ Doono Yeeri ishichiye: “Showee awudde kelloona ittoshin shacceto taane; tunebaani and dambi-waani showoochee tibote.

⁷ “Baabloonee showooch beeti keceenaꞌote, Yerusaalem wottebote.

⁸ Ittoshi achooch shaggimmo ta aafee aachoon kochite getone” iye. Aroochee Beshe Mawe Doono Yeeri bi asheenaꞌon boggiti aageteenaꞌoyich ishichi ta gettemmoyich gettiye:

⁹ “ ‘Ta mochoon ittoshi toommooch tiijjemmo taane. Guuno tuniiꞌi ittoshi hajjitinaꞌo wochiree ittoshin boggemminaꞌone’ gete” iye. Ebi tunehooba, Beshe Mawe Doono Yeeri, taan wocheto tunoon ariyemmo ittoshine.

¹⁰ Doono Yeeri ishichiye: “Yerusaalemi asheenaꞌote, ta, waaree ittoshi daggooch beeyemmo ta tunetoyich shoddebote; emirishoo getote” iye.

¹¹ Ebiyoobee aabooch meeti aageteenaꞌo Doono Yeer waan wottemminaꞌone. Bi asheenaꞌonoo tunemminaꞌone. Biyoo ittoshi daggooch beeyemmone. Ittoshiyoo ittoshi waan taan wocheto Beshe Mawe Doono Yeeri tunoon ariyemmo ittoshine.

¹² Doono Yeeriyoo yaafeeti showoochaa Yihudin bi hajjoon tuniyemmone. Yerusaalemin wochinnoon kaaccemmone.

¹³ Doono Yeeri yaafeeti bi beeyi xaaꞌoochee tiyitone; ebich meeno taheti asho bulli bi aafooch minnakanna gettaaye.