Zakaariyaasi 14 - Kafa Linguistics Project

Yerusaaleminaa Aageteenaꞌonochi Mooyo

¹ Doono Yeerichi nallee aabo waa beetone. Boggechinaꞌo ittoshi waanee boonoshi boggiton ittoshi ciini beetaa qoodeyemminaꞌone.

² Doono Yeeri, Yerusaalemin boonoshi kochemmoyich, aageteenaꞌo bullin kicemmone. Katemoo yecheyemmone; kexinaꞌoo bosheyemminaꞌone; maacheenaꞌo giidoona yeshaa mecheyemminaꞌone. Katemee ashoochee qato kecaa hammemmone. Tunebaani aroochee echemmi asheenaꞌo katemoochee ciroona aalleyaachemminaꞌone.

³ Aroochee Doono Yeeri ginooba bi koyoommon ebi aageteenaꞌon keyi kochemmone.

⁴ Ebiyooba Doono Yeeri Yerusaalemi ciinooch, aabi-keyo waan beeti Zayitee Michi guudi toommooch neexemmone. Zayitee Michi guudoo aabi-keyoochee aabi-gimo waan gaaheree oogeti bamboon tunemmone. Guudochi qato dambi-waan, qato wotta deshi-waan tunemmone.

⁵ Ittoshiyoo guudon gutta keexxiꞌi Atsel shaggiti bamboona woccemmo ittoshine. Yihudee taatoo Uziyaahi yemeenooba showoo qewetaa ittoshi wocoommon woccemmo ittoshine. Ta Nuggishoo Doono Yeeri woyemmone. Yaafeetinaꞌo bulliyoo biinna tookki woyemminaꞌone.

⁶ Ebiyooba aqqoo woyee doshoo (caagibano) beetaachemmone.

⁷ Aroobee aabo, areddoonaa xumoona tuneyaani, kuxeyaani areddoo tunemmone. Ebi aabeechon ariibeeto Doono Yeerine. Xum bekko tunemmone.

⁸ Ebiyooba kashee aaco Yerusaalemee xuupphemmone. Qato aabi-keyo waanee baharooch, qato wotta aabi-gimo waanee baharooch woccemmone. Ebiyoo qaawoonaa yooyonooch kuxeyaachemmone.

⁹ Doono Yeeri showoo bulli toommooch taatemmone. Ebiyooba Nuggishoo, Doono Yeeri baach, ceekkemmoo, bi shigo baach tunemmone.

¹⁰ Showoo bulli Geebee tiijji Yerusaalemaa deshi-waan beeti Rimoon beddaahaa, shaddeeree naqqe gaddoon tunemmone. Tunebaani Yerusaalemi, Biiniyaami Kelloochee tiijjiree ebiyee aafi kellee xaaꞌooch beddaahaa, Uxeree Daneexi Kellooch beddaahaanoo, wotta Hanaaneeli Dilaaloochee tiijjiree taatoochi woyinee hiicci oppooch beddaahaa bi xaaꞌooch beshiree beeyemmone.

¹¹ Yerusaalemi ashi beeyi xaaꞌoon tunemmine; wochinnoon aallo bi toommooch shagaachemmone; asheenaꞌo keqqaalloon diggoona beeyemmine.

¹² Yerusaalemin kocha tiyiti aageteenaꞌo toommooch Doono Yeeri kupphe biiyoon deebemmone. Batt baatoona neexe boonoshi beetaa, boonoshi meeno oqqemmone; boonoshi aafo bi qophoochaa, boonoshi heciyoo kookkoochaa oqqemmone.

¹³ Ebiyooba Doono Yeer waanee oogeti keqqoo boonoshi toommooch kindemmone. Asho bi ikkikkoona bi nuuchoo kishoona yeshiichi ikkoo baroon kochemmone.

¹⁴ Yihudee asheenaꞌoo Yerusaalemaa koyemminaꞌone. Bi guudoona beeti aageteenaꞌo bullichi gaanno, dofee aachoo, birewoonaa tahoona kiceyemmone.

¹⁵ Ebiyoommi naxo haresheenaꞌon, bicereenaꞌon, gaaleenaꞌon, kureenaꞌonaa kaambooch beeti gijjeenaꞌo bullinon yexxemmone.

¹⁶ Aroyee gubb, Yerusaalemin waa kochiti aageteenaꞌo daggoochee, qitoochee muriccitinaꞌo bulli Taatoo, Beshe Mawe Doono Yeerich goyinnoonaa Bashee (Yambaaree) Baaroon baaroonoyich, nati natooch woyemminaꞌone.

¹⁷ Showee toommeexi aageteenaꞌo bulli Taatoo, Beshe Mawe Doono Yeerich goyinnoyich Yerusaalem womo boonoshi qayigaata, amiyo boonoshich dihaachemmone.

¹⁸ Gibitseenaꞌoo baaroon baaroyich womo boonoshi qayigaata, Doono Yeeri Bashee (Yambaaree) Baaroon baaroyich waataani aageteenaꞌo toommooch bi deebiti naxoommi naxoon boonoshi toommoochoo deebemmone.

¹⁹ Gibitsee asheenaꞌonaa Bashee (Yambaaree) Baaroon baaraani aageteenaꞌo bullina sheereyemmi sheeroo ebine.

²⁰ Ebiyooba haresheenaꞌochi qetteexi qaaxillooch “Doono Yeerich Yaafeeto” ii beeto qiicaa kooreyemmone. Doono Yeerichi yaafee kexooch beeti, eboshiyoo maayi kachiyoyich gaacciibeeti gubeenaꞌo, deejjee gudee ciinooch beeti quppe saaneenaꞌochoommon yaafeetinaꞌo tunemminaꞌone.

²¹ Yihudee showoonaa Yerusaaleminooch beeti gubeenaꞌo bulli, Beshe Mawe Doono Yeerich yaafeetinaꞌo tunemminaꞌone. Deejjoon giddiyoyich waa beetinaꞌo bulli shexxeenaꞌon daamiree deejjee maayoon kachiyemminaꞌone. Ebiyooba Beshe Mawe Doono Yeerichi yaafee kexooch giixeebeeti asho koniyoona daneyaachemmone.