Zakaariyaasi 13 - Kafa Linguistics Project

¹ “Ebiyooba Daawitichi kechi asheenaꞌonaa Yerusaalemi asheenaꞌonon axaaxoonaa eeꞌoonoochee xalliyemmi aachi xuupho qecheyemmone” iye.

² Beshe Mawe Doono Yeeri ishichiye: “Ebiyooba shahalleenaꞌochi shigoon showee toommoochee aalliyemmo taane. Aroyee gubb, ciroona shalligeyaachemminaꞌone. Koote keemechinaꞌonaa gonde ayaaneenaꞌonon showoochee aalliyemmo taane.

³ Koniyoona keemoon bi keemigaata, bi indeenaa bi nihoona, ‘Doono Yeerichi shigoona kootoon keemmeto neene; ebich qitemmo neene’ gettemminaꞌone. Keemoon bi keemi gaatoo, biin shiyiti bi nihoonaa bi indeena biin kochemminaꞌone.

⁴ “Ebiyooba keemecho bulli keemoon keemmii bi beegaata, bi beeggiibeeti yaaꞌee naboona yeellemmone. Asheenaꞌon dachoyich huushechi tahoon taheyaachemmone.

⁵ Biyoo ‘Ta, showoon gochaabeeti gochecho taalli, keemecho toono taane; ta bushittinoochee tiijjaꞌa goyee gochecho taane’ gettemmone.

⁶ Ikke asho, ‘Ebi ne achooch beeti mayo amoone?’ iꞌi bi echegaata, ‘Ta shunechinaꞌo kexoochaa ta mayeti mayone’ gettemmone” iye.

Qiddoo Yexxetaa Bageenaꞌo Shaco

⁷ Beshe Mawe Doono Yeeri ishichiye: “Goraadoocho, ta qiddoo toommooch, ta nuuchoo toommooch tibe! Qiddoonoo yexe! Bageenaꞌoo shacemminaꞌone; tawoo ta mochoon gishiisheenaꞌo toommooch tiijjemmo taane.

⁸ Showee toommooch beeti ashoochee, keejje kishoochee gutte kishoo yexaa aallemmone; tunebaani ikke beeroo echemmone.

⁹ Ebi ikke beeroon qaaqqooch deebemmo taane; birewoon ukkoommon ukkiree boonoshin xalliyemmo taane; aachoon ukkoommonoo ukkiree boonoshin haattemmo taane. Boonoshiyoo ta waan corootemminaꞌone; tawoo boonoshi corootoon waayemmo taane. Boonoshin, ‘Ta asheenaꞌone’ gettemmo taane; boonoshiyoo ‘Doono Yeeri, no Nuggishoone’ gettemminaꞌone” iye.