Zakaariyaasi 11 - Kafa Linguistics Project

Babbereenaꞌo Dihoo

¹ Libanoose! Qaaqqoo ne yigee mixinaꞌon bi maayemmoyich ne kelleenaꞌon qechibe!

² Ciidoocho, yigoo dihitoyich eefe! Ogooge mixinaꞌo aalletinaꞌone. Bashaanee showee meelleenaꞌote, dunjunje shaareenaꞌo dappetoyich woowo, geti eefote!

³ Boonoshi oogo shoottetoyich, qiddeenaꞌochi eefoon waayebote! Yoordaanoosi aachi gashooch beeti dunjunje shaaroo aalletoyich, daahereenaꞌochi gigoon waayebote!

Gutte Qiddeenaꞌo Mooyo

⁴ Ta Nuggishoo Doono Yeeri taach ishichiye: “Basheyemmi bageenaꞌon qiddebe.

⁵ Kemetinaꞌo ebi bageenaꞌon boonoshi guuritoyich sheereyaaneenaꞌone. Bageenaꞌon kemmitinaꞌoo, ‘Gaanneto noone; Doono Yeeri galleteebe’ gettemminaꞌone. Boonoshi qiddeenaꞌoo boonoshich ariqqeyaachemminaꞌone” iye.

⁶ Doono Yeeri ishichiye: “Ebiyee bekk hini showooch beeti asheenaꞌoyich ariqqeyaachemmo taane. Asho bullin bi nuuchoonaa bi taatoonoyich beshiiree immemmo taane. Boonoshiyoo showoon duꞌiyemminaꞌone. Tawoo boonoshi kishoochee wodiyaachemmo taane” iye.

⁷ Ebich kemmii kemee beetinaꞌochi, guureyemmi bageenaꞌon qiddeho. Gutte gumbeenaꞌon deebaa ikkoon Wojjoo wotta ohe ikkoon Ikkittino iyaꞌa shigiiho. Bageenaꞌonoo qiddeho.

⁸ Ikke agenee daggooch keejje qiddeenaꞌon yookkeho. Boonoshiyoo taan shixxiyeete; tawoo boonoshin sheeneho.

⁹ Tawoo bageenaꞌoyich, “Ebiyee gubb ittoshi qiddoon tuneyaachemmo taane; qitemminaꞌo qitibeete; aallemminaꞌo aallebeete; echetinaꞌoo ikkoo baroon maataa boonoshinaa boonoshina ciirebeete” iyo.

¹⁰ Aroochee aageteenaꞌo bullina tookkaa ta giyeti wogoon happoyich, Wojjoo iyaꞌa ta shigiiti gumboon daammaꞌa tiicheho.

¹¹ Ebiyooba wogo happeehe. Ta tuniiton beeggiti, bageenaꞌon kemmii kemee beetinaꞌo ebi Doono Yeerichi qaaro bi tunoon ariiheete.

¹² Aroochee ta boonoshich ishichiyo: “Ittoshich gaaweto tuneꞌi bi bekkegaata, ta shuunee gatiyoon taach qocote; tunebaani ittoshi qayenoo qayote” iyo. Boonoshiyoo ta shuunee gatiyoyich shaashe sheqeelee birewoon taach qocciyeete.

¹³ Doono Yeeriyoo taach qocheti boonoshi gijjoon, “Qondee hachechoyich dufe” iye. Tawoo “Bede gijjoone” iꞌi taach boonoshi immiti shaashe sheqeelee birewoon daammaa Doono Yeerichi yaafee kexooch, qondee hachechoyich duppeho.

¹⁴ Yihudee asheenaꞌonaa Israꞌeeleenaꞌonochi daggooch beeti manaamanittinoon happaꞌa, Ikkittino getteeti guttinnee gumboon tiicheho.

¹⁵ Aroochee Doono Yeeri taach ishichiye: “Eke wotta qiddoochi qiicoon deꞌiree, yeexere qiddoommon tunebe.

¹⁶ Ta bageenaꞌon qiddemmon hini showooch tiijjemmo taane. Biyoo aalletoyich aaxxiyaachemmone; shaceton qaawaachemmone. Baata tiisheenaꞌon shepphe wodiyaachemmone; wodoonoo shiimeyaachemmone. Tunebaani awujjitochi meenon maayemmone; bi shanekkoonoo qecciqeccaayemmone.

¹⁷ Bi bagoon duppiti, yeexere qiddoyich woowo! Goraado bi mochoonaa bi qanne aafoonon koye. Bi mochoo wogibe; bi qanne aafoo tuchimmi dooge” iye.