Zakaariyaasi 1 - Kafa Linguistics Project

Doono Yeeri Bi Asheenaꞌon Ceego

¹ Daariyoosi taateti guttinnee natoobee shimittinnee agenooch Iidi bushoochi bushoo Beraakiyi bushoo keemechi Zakaariyaasina Doono Yeeri gettiti qaaro:

² Beshe Mawe Doono Yeeri Zakaariyaasi asheenaꞌoyich ishichi bi gettemmoyich gettiye: “Doono Yeeri ta, aafi ittoshi qaabbechinaꞌo toommooch oogichii kaareto taane.

³ Tunebaani and ittoshich gettoye: Ta waan wottebote; tawoo ittoshi waan wottemmo taane.

⁴ Ittoshi qaabbechinaꞌon shaahiyaahote. Ebiyee aafi keemechinaꞌo boonoshich, ‘Beshe Mawe Doono Yeeri, ittoshi gonde gommonaa gonde shuunoonoochee wottebote, itone’ iꞌi gettiyeete; tunebaani boonoshi waayemmon qajjiꞌi ta getoonoo aaxxiyaache iyeete.

⁵ Ittoshi qaabbechinaꞌo and aayeete? Keemechinaꞌoo bulli yemeenoon beeyeheete?

⁶ Ittoshi qaabbechinaꞌo ta maddechinaꞌo tuneti keemechinaꞌona ta getteti ta qaaroonaa ta qociyoonon quyo boonoshi qajjitoyich sheereetinaꞌone. “Boonoshiyoo boonoshi shuuneti gondoyich ayiniꞌi, ‘Beshe Mawe Doono Yeeri tuniiya bi gabitoommon, no gommoommonaa no shuunoommonon no toommooch bi tuniyoo tatoone’ itinaꞌone” iye.

Zakaariyaasi Yaaꞌoona Haresheenaꞌon Beego

⁷ Daariyoosi taateti guttinnee natooba, Shebaaxi getteebeeti aaraa ikkinnee agenee hiyaa awuddinnee qemooba, Doono Yeeri bi qaaroon Iidi bushoochi bushoo Beraakiyi bushoo keemechi Zakaariyaasich gettiye. Zakaariyaasiyoo ishichiye:

⁸ “Ikke asho ceelle hareshoon yebbeꞌi bi beetaa xumi yaaꞌoon beeggeho. Biyoo bambooch, hadaasee michi daggooch neexeꞌiniye bi beeto. Bi gubb ceelle hareshoo, daashe hareshoonaa nacce hareshoona beetone.

⁹ “Tawoo ‘Ta doonocho, eboshi ameenaꞌone?’ iyo. “Taanna tookkii yibbaateebeeti maraakoo ‘Eboshi ameenaꞌo gaata neech bekkiyemmo taane’ iye.

¹⁰ “Aroochee hadaasee michi daggooch neexeꞌi beeti uro ‘Eboshi showoo bulliich boonoshi guuddemmoyich Doono Yeeri deejjitinaꞌone’ iye.

¹¹ “Boonoshiyoo hadaasee michi daggooch neexeꞌi beeti Doono Yeerichi maraakoyich ‘Showoo bullin guuddeto noone; showoo bulli shashewimiꞌi kotetone’ iyeete.

¹² “Aroochee Doono Yeerichi maraakoo ‘Beshe Mawe Doono Yeero, Yerusaaleminaa Yihudee showooch beeti katemeenaꞌonon ne sheerito shabe natone. Boonoshin ne maaraachemmo aati wottooniye?’ iye.

¹³ Doono Yeeriyoo taanna tookkii yibbaateebeeti maraakoyich emirikkiibeeti, goggiyee qaaroona wochiye.

¹⁴ “Aroochee taanna tookkii yibbaateebeeti maraakoo taach ishichiye: ‘Ebi Beshe Mawe Doono Yeeri gettiibeeti qaaroon awaajjibe: “Yerusaaleminaa Tsiyooninoyich oogichii qanaateto taane.

¹⁵ Tunebaani diggoona koteti aageteenaꞌo toommooch oogichii kaareto taane; giishechoon ta kaaremmona boonoshi ta asheenaꞌon woddoon duꞌiitinaꞌone” gete’ iye.

¹⁶ “Ebich Doono Yeeri ishichiye: ‘Ta ariqqoona Yerusaalem wotteto taane. Ta yaafee kexo wochinnoon arooch hakkemmone. Yerusaalem qellayee woderoo geecheyemmone’ iye Beshe Mawe Doono Yeeri.

¹⁷ “Wotta daakki ishichi awaajjibe: Beshe Mawe Doono Yeeri ishichiye: ‘Ta katemeenaꞌo wochinnoon gaannoon michemminaꞌone. Doono Yeeri ta wochinnoon Tsiyoonin goggiyemmo taane; Yerusaaleminoo kaaccemmo taane’ itone gete” iye.

Zakaariyaasi Yaaꞌoona Awudde Qaroon Beego

¹⁸ Bare yaaꞌoona kaama ciinnaꞌa, awudde qaroon beeggeho.

¹⁹ Taanna tookkii yibbaateebeeti maraakoyich “Ebi qaro amoone?” iyo. Biyoo “Yihudee showoon, Israꞌeelee showoonaa Yerusaaleminon shacciti qaroone” iꞌi taach wochiye.

²⁰ Doono Yeeriyoo awudde qemminaꞌon taach bekkiihe.

²¹ Tawoo “Eboshi waabeeto amoon shuuneyane?” iyo. Biyoo “Ebi qareenaꞌo, koniyoona kaama qaallaachemmoyich, Yihudee showoon shacciti qareenaꞌone. Ebich ebi qemminaꞌo waabeeto, boonoshin shatiiya, Yihudee showoon shacoyich boonoshi qaroon tiijjiti aageteenaꞌo qaroon tiichane” iye.