Yowannisi 9 - Kafa Linguistics Project

Aaf Doogoon Yesuusi Wodiyoo

¹ Yesuusi gommona hammiibee, aaf doogo tuneꞌi shiijjeti uroon beeggiye.

² Yesuusichi dabbeenaꞌo “Dojjechocho, hini uro aaf doogo tuneꞌi bi shiijjeto, koni axaaxoon shuunetenane? Biinee biin shiyitinaꞌone?” iꞌi echeheete.

³ Yesuusiyoo ishichiꞌi wochiye: “Hini uro aaf doogo tuneꞌi bi shiijjeto, Yeerichi shuunoo biinna bi bekkemmoyichalli, bi woyee biin shiyitinaꞌo axaaxoon shuunetoyich toonoone.

⁴ Areddoo beetaa, taan wocheti Yeerichi shuunoon tuniyoo nooch qaawiihe; koniyoona shuunoon hakkaachemmi xumo woyemmone.

⁵ Alemooch ta beemmi wottoon, alemoyich bekko taane” iye.

⁶ Ishichiꞌi tiyii showooch cuddiꞌi bi dengiiti dengoon aaf doogo aafooch huuttiye.

⁷ Aroochee uroon “Hamiree Silohami kote aacoochaa machebe” iye. Silohami geto wocheeto getone. Ebich uro hammiꞌi machehe; aroochee bi aafo ciinaa wotteꞌi bi kexooch hammiye.

⁸ Arooba bi giyeenaꞌonaa aaf gommooch koteꞌi bi qollee beetaa beeggitinaꞌona “Hini uro gommooch koteꞌi gijjoon qolleebeeti uro toone?” iyeete.

⁹ Ikkikkeenaꞌo biine iyeete; tunetaa bareenaꞌo “Biin shaahiyalli, bi toonoone” iyeete. Biyoo taane iye.

¹⁰ “Ishigaata, ne aafo aabichiꞌi ciinniye?” iyeete.

¹¹ Biyoo wochiꞌi, “Yesuusi getteebeeti uro dengoon dengiiꞌi ta aafooch huuttiichii, ‘Siloham hamiree machebe’ iye. Ebina hammaa ta machetaa, ta aafo ciinniye” iye.

¹² Asheenaꞌo “Are urochi aaye?” iyeete. “Ta ariyaache” iye.

Woditi Uroon Fariseenaꞌo Echo

¹³ Asheenaꞌo aaf doogo tuneꞌi beebee echeti uroon yechiꞌi Fariseenaꞌo waan daammiyeete.

¹⁴ Yesuusi dengoon dengii huuttiꞌi bi aafoon bi ciichiiti aabo shambetoone.

¹⁵ Ebich Fariseenaꞌo wotta bare asheenaꞌochoommon aabichiꞌi bi ciinnito gaata echeheete. Biyoo “Aroo ta aafooch dengoon huuttiye; aacona macheho; andoo ta aafo ciinnii beetone” iye.

¹⁶ Fariseenaꞌo daggoochee ikkikkeenaꞌo “Hini uro shambetoon oogiyaache; ebich Yeer waanee waato toonoone” iyeete. Tunetaa bareenaꞌo “Axaaxechi asho ebiyoommon malleteenaꞌon aabichiree tuniyoon hakkehe?” iyeete. Boonoshi daggooch shaco giyiye.

¹⁷ Ebich Fariseenaꞌo wochiꞌi uroon “Ne aafoon ciichiiti uroochon ama gettenne?” iyeete. Biyoo “Keemechone” iye.

¹⁸ Ayihudee ukkireenaꞌo bi nihoonaa bi indeenon boonoshi ceeggimmi wottoon, and ciinniibeeti uro aaf doogo tuneꞌi beebee echeto bi tunoon iberiyaaneenaꞌone.

¹⁹ Boonoshinoo “Hini ittoshi bushoone? ‘Aaf doogo tuneꞌi shiijjete’ ittoshi ii beetone? Andochi aabichiꞌi ciinniye?” iꞌi echeheete.

²⁰ Bi nihoonaa bi indeena wochiꞌi, “Hini uro no bushoo bi tunoonaa aaf doogo tuneꞌi bi shiijjoonon ariibeeto noone.

²¹ Tunebaani and aabichiꞌi bi ciinnito gaata, wotta bi aafoon koni ciichiito gaata ariyaano noone. Biin echebote; aroo ooge uroone; aroo bi qellichon geton mawiyaachemmone” iyeete.

²² Biin shiyitinaꞌo ishichito, Ayihudee ukkireenaꞌon boonoshi shattitoyichiye. Ebiyoo Ayihudee ukkireenaꞌo “Yesuusi aroo Kiristoosine” iꞌi miixemmo bi danegaata, aroon Ayihudeenaꞌo kiceebeeti kexoochee boonoshi yookkemmoyich echee boonoshi itoyichiye.

²³ Ebich biin shiyitinaꞌo “Aroo ooge uroone; biin echebote” iyeete.

²⁴ Ebich aaf doogo tuneꞌi beebee and ciinniti uroon wochinnoon ceeggiꞌi, “Yeerichi oogoyicha getiree iberoon yibbaatebe; hini uro axaaxecho bi tunoon no ariibeeto noone” iyeete.

²⁵ Biyoo wochiꞌi, “Axaaxecho tuneba tunaaya ta ariyaache. Aaf doogo ta tunoon, tunebaani and ta ciinon, ebi ikke mooyon baach ariihoye” iye.

²⁶ Boonoshiyoo daakkiꞌi, “Neech amoon halliye? Aabichiꞌi ne aafoon ciichiihe?” iyeete.

²⁷ Biyoo wochiꞌi, “Shiichaꞌa ittoshich getteto taane; ittoshi waayeyaachote; amoon halliya wochinnoon waayoyich qaawii beetote? Ittoshiyoo wotta bi dabboon tunoon qaawii beetote?” iye.

²⁸ Boonoshiyoo biin naaggiibee, “Ne bi dabboo neene; tunetaa no Muusichi dabboo noone.

²⁹ Yeeri Muusich bi geton no ariibeeto noone; tunebaani hini uro amoochee bi waato gaatoona ariyaano noone” iyeete.

³⁰ Uroo ishichiꞌi wochiye: “Amoochee bi waato gaata ittoshi ariyee qayo worganikkiti mooyone; tunebaani bi ta aafoon ciichiitone.

³¹ Yeerin shattii beetochi, bi daaggoonoo tunii beetochi qolloon Yeeri waayehalli, axaaxoon shuuneebeeti asheenaꞌochi qolloon bi waayee qayon ariibeeto noone.

³² Yeeri alemoon bi hallitoochee tiijjiꞌi, koniyoona ‘Aaf doogo tuneꞌi shiijjeti ashi aafoon ciichiitone’ getaa waayeyaanoone.

³³ Hini uro Yeer waanee bi tuneyaan gaata, amoonolla tuniyoon hakkaacheshone” iye.

³⁴ Boonoshiyoo wochiꞌi, “Hini axaaxoona qoqqaanneeꞌa shiijjetocho, nooch dojjiya qaawaa beetine?” iyeete. Aroochee Ayihudeenaꞌo kiceebeeti kexoochee biin kichiyeete.

Boonoshi Mullo Doogo Tuneti Asheenaꞌochon Yesuusi Geto

³⁵ Yesuusiyoo uroon Ayihudeenaꞌo kiceebeeti kexoochee boonoshi kichoon waayehe. Biin daneꞌi, “Ashi Bushoo toommooch ne mulloon tooꞌiyenne?” iꞌi echehe.

³⁶ Biyoo wochiꞌi, “Ta doonocho, bi toommooch ta mulloon ta tooꞌiyemmoyich, aroo konine?” iye.

³⁷ Yesuusiyoo “Biin beeggeto neene. Andoo neenna tookkii yibbaateebeeto aroo taane” iye.

³⁸ Biyoo “Ta Doonocho, ta mulloon ne toommooch tooꞌiito taane” iꞌi biich goyinnehe.

³⁹ Yesuusiyoo “Ciinaaneenaꞌo ciinaa, ciinnii beetinaꞌo doogaa, nalloona boonoshi barbaremmoyich, ta hini alemooch waato taane” iye.

⁴⁰ Biinna tookkii arooch beetinaꞌo daggoochee ikkikke Fariseenaꞌo ishin waayeꞌi, “No wotta aaf doogo noone?” iꞌi echeheete.

⁴¹ Yesuusi wochiꞌi, “Aaf doogo ittoshi tuneto gaata, axaaxoo ittoshich tuneyaacheshone. Tunebaani and ‘Ciinnaabeeto noone’ iyote; ebich axaaxoo ittoshi toommoochee wohaachemmone” iye.